Joe Biden Cu Vawlei Cung Pumpi President Si Aa Tim Mi, Thiltha Lo A Duh Lomi Pasal Tha Taktak!

Biden cozah nih Covid-19 viccine 200 million bak US mipi caah order ko cang hi. Misifak zawn ruattu, US ram dawtu, mi nunnem le mi tha, US ca lawng si loin vawleicung pumpi president si ai tim mi, thiltha lo a duh lomi pasaltha taktak asi. Viccine hi Biden minung lawng vai chun hmasa usihlaw Trump minung pawl cu Trump nih van in order piak ve hna sehlaw a tha tuk hnga!

A ruang cu Biden thil paoh cu nan duh lai kan zum lo i mu cun tutiang Trump tanh molh in molh rih mi pawl, Biden cu ka president asi lo Trump hi asi, a timi pawl tete hi Alaska khi in pe hna sehlaw khika ah khin nan president ah Trump hei sisehlaw a tha men lai. Nan pastor ah nan doctor vei khi a hei si hnga, nan prophet ah vei te pawl rual khi an hei si than sehlaw, nan politician ah kawi vei khi a hei si than hnga amahbelte like le comment pek nan fel lo ahcun an so paw kho ti lai lo i an in zaam tak te sual hna hnga dek maw! Catialtu: Chelsea Bawi

The White House: Trump Nih Thlahnak Bia A Chimmi: THE PRESIDENT: Ka American hawi le hna: Kan ram sersiam dingah, kan ram a thinlung tharchuah dingah, rammi cung i cozah zumhawk a tlaknak remhsiam dingin a liamcia kum 4 chung thazaang kan chuah. A tawinak chim ah cun, America lenhnganter than dingin lohma kan i awt – American mipi dihlak caah. US president 45nak dirhmun in ka term a donghnak ka tuah tikah hin, kan dihlak in kan limmi rian ruangah nan hmaika ah lunghmui ngaiin ka dir. Tuah dingin kan rat hnawhmi kan tuah ko cang – a dang tampi kan tuah chihmi a um rih.

Tutan zarh chungah hin, cozah thar apnak kan tuah lai, cucaah kan ram a himtertu le a thanchoter khotu a si khawh nakhnga thla kan campiak hna lai. Saduhthahnak nganpi kan ngeih hna, vanthatnak zong kan hampiak hna – hihi a biapi ngaimi biafang a si. Chingchiahtlak kan khuallam a kan kalpitu mi a cheukhat an chung i lunglomhnak langhter bu in biahram thok ka vun duh ta. A pakhatnak ah, First Lady, Melania, nih a ka dawt a ka dirkamh mi ruangah a cungah kai lawm hringhran. Ka fanu Ivanka, ka tupa Jared, ka fapa Barron, Don, Eric, Tiffany le Lara…an dihlak cung zongah kai lawm hringhran. Ka umnak vawlei hi ceunak le lomhnak in nan khahter. Vice President Mike Pence le an nu Karen, cun a chungkhar dihlak cungah kai lawm hringhran.

Cun kan ram caah an thinlung a bung i ral a tutu ka Chief of Staff Mark Meadows, White House Staff le Cabinet members pawl vialte le kan cozah rian ah lu ai hlinhtu vialte cungah kai lawm. Cun a hleice in an cungah lunglomhnak langhter ka duhmi hna an um rih: US Secret Service hi an si. Ka chungkhar le keimah ko hih nan cungah a zungzal in leiba kan ngei. White House Military Office, Marine One le Air Force One, Armed Forces le ram pumpi ah a ummi law enforcement dihlak nan cungah ka lunglomhnak langhter ka duh. A hleice in American mipi nan dihlak cungah kai lawm. Nan President kan simi biaka chim cawk lo in kai lunghmuih. Hitluk caantha nan ka pekmi cungah kai lawm. Hihi a liannganmi thil a si.

Khat le khat kar ah lungtlinlonak tete a um ko lai nain, kannih cu khuaruahhar, zoh a dawhmi, zumh a tlakmi, daihnak a tanhmi ram kan si, kan ram thangcho seh, a hlawhtling seh, tha seh, ti a duh pengmi kan si kha kan philh hrimhrim hna lai lo. Ram lianngan kan si hrimhrim ko.

Kan Capitol an luhhnawh ruangah kan mipi vialte an lau dih. Politic min in buainak tuahmi paoh cu American nih kan sunhsakmi an doh a si. Cu bantuk thil cu zeitik hmanh ah ngaihthiam a si lai lo. Cuhlan nak hmanh in, a tu cu kan i hrawmmi rothil cuan in kan lung kan i rual le, mah le party lawng tanhnak lanh in kan zapi nih kan i tinhmi lei ah kar kan hlan a hau cang. A liamcia kum 4 ah khan President a co mi lakah politic ramleng in Washington a phanmi hi keimah lawng ka si. Politician rian ka tlai bal lo, inn sa ka si i, khua a cuan i thil a si khomi tuak le taan a thiammi cu ka si. American nih phaak dingah an i batmi hmunsang a um ko, ti ka theih caah President kai cuh hi a si. America hi a hmasabik (first) kan i hmaithlak chung paoh cu kan ram nih a tuah khawhmi hi ramri a ngei lo, ti ka theih.

Khahlan ka riantuahmi cu ka kal tak i, a har ngaingai mi buantual ah ka chuah. Asinain, thatein tuahtuan ko ah cun thiltikhawhnak a phunphun a umnak buantual a si. America nih tampi nan ka pekthenh, cucaah kei zong nih pekthenh ve hna kan duh caah a si. Kan ram i rian ai zuammi ramdawtu minung million tampi hna he kan tuanbia chungah a liangnganbikmi political movement kan ser khawh. Vawleicung tuanbia ah a nganbikmi economy zong kan ser khawh. America hi lianngan than seh, ti kan duh cio caah “America First” tiin kan kalpi hi a si. Kan ram nih a mipi a renh khawhnak dingah phung kan remhsiam. Kan i hmaithlakmi hi Right le Left party kong a silo, kan ram a thatnak le vawlei pumpi a thatnak ding hi kan i tinhmi a si.

Mipi thlacampiaknak le tanpi nak thawngin, aho ruah phaak lo in rian kan tuan kho. Hi taitai kan tuan khawh lai hi ahohmanh nih an ruat bal lo. American tuanbia chungah Tax cuts package le remhnak nganbik kan tuah. Cuhlan cozah nih an tuah khawh bal lo mi rian a thattu phung kan hrawh dih. Ai rawkmi kan trade deal kan remh, Trans-Pacific Partnership thalo le a si kho lo mi Paris Climate Accord kan chuahtak, S. Korea he deal tuah ding bia kan ceih, USMCA in NAFTA kan thlen – cucu Mexico le Canada ah a si – hlawh a tling ngaingai.

China cungah tax a rii kan khiah, a dang tein China he deal kan tuah than. Kan min thutnak catihang hmanh a ro hlan ah China virus nih vawleipi a kan tlunh dih colh. Kan cawhlehnak pehtlaihnak cu khulrangtein ai thleng colh, dollar billion tampi cu US ah a lut, asinain, Virus nih kan kehleng a kan phelh. Vawleipi nih a tuar, asinain, America economy cu a thattuk ve caah ram dang nakin cun ai ning cingcing ko rih. A hram rak fek hlah sehlaw, a tu bantuk hin chuahnak lam a hmu kho hnga lo. Kan meitha kan tuahtamh, vawlei cungah zinaan le gas a chuahterbik kan vun si cang. America i rian sernak kan tuahtamh, African Americans, Hispanic Americans, Asian Americans, nunau — cun a mikip ca ti awk in tuanbia chung unemployment rate tangbik tiang kan thumh khawh fawn.

Kum tlawmte chungah Income a karh, thlahlawh a karh, American Dream sersiam a si, million tampi sifahnak in an luat. Khuaruahhar thil a si. Stock market a thang, caan tawite chungah 148 tiangin stock market ai khawt. Cun pension lahkhah a karh. 401(k)s hi cuhlan ah a phan bal lo. Nihin kan hmuhmi thanchonak pawl hi cuhlan ah kan hmu bal lo. Cucu Pandemic hlan le hnu ah a cangmi an si. American sehzung pawl kan sersiam, sehzung thong tampi kan on, “Made in the USA” timi biatlang dawh cu kan i hman kho than cang. Riantlai chungkhar an khuasak i nincan deuhnak dingah, child tax credit a let 2 in kan chap, childcare le development caah bomhnak biatak tein kan karhter. Hmailei rian tlai kho te dingin, tiah minung million 16 lenglo training pek dingin private cawnpiaktu pawl he rian kan tuahti hna.

Pulrai nih a kan tlunh caah, khamnak si phun khat lawng hmanh si lo in, phun 2 kan ser. Kan i ruahnak rangin an ser. A si kho lai lo, an ti. Asinain, kan tuah khawh ko. “Khuaruahhar sii” tiin min kan bunh i a tu zongah cu ti cun kan auh hi a si. Vaccine sernak dingah hin a dang cozah nih cun kum 3 in kum 10 tiang an i rauh kho men. Kannih cu thla 9 lawng kan i rauh. A kan liamtaktu vialte cungah kan ngaih a chia. Anmah philhlonak ah, hi pulrai hi a tu in zungzal tiang hloh cikcek dingin bia kan i kam.

Pulrai nih vawlei cung economy thalo in a hrawh lio ah, kannih nih cun a ran khawh cungin kan economy kan chanhchuah khawh. Economic bomhnak caah, tiin $4 trillions deng kan bomh hna, rian million 50 kan chanh, rianlo dirhmun hi hnarcheu hrawng kan khamh. Hi vialte kan tuahtuanmi hi kan ram nih a hmuhton bal lo mi lawngte an si. Healthcare kongah duhthim ding le khat le khat lung i hmuhthiamnak kan ser khawh, siiai chuahnak cu a lam kip in kan dirpi, a bikin kan mipi nih an duhning zulh in kan tuah khun, cucu zeidah a si, tiah cun, vawlei cungah siman ai dengbikmi ram si khawh i zuam hi a si.

VA Choice, VA Accountability, Right to Try, kan thok, cun criminal justice zong kan remh. US Supreme Court ah biaceihbawi thar 3 kan namhneh hna. Kan Constitution a sullam leh dingin federal biaceihbawi 300 hrawng rian kan pek hna. Ramri humhaak dingin kan mipi nih Washington he hnatlaknak an tuah hi kum tampi a si cang. An duhnak kan tlinter cangmi cungah kai lawm i, tuanbia chungah US ramri hau kan sa. Cuhlannak thadeuh in rian an tuah khawhnak dingah, kan ramri cawngtu pawl le ICE officers pawl cu hriamnaam thatha kan pek hna i, kan phung le kan ram a himnak dingah thazang kan chuahter hna.

Cuhlan ah a um bal lo mi ramri himnak cu a rai lai mi cozah kut ah lunghmui ngaiin kan ap khawh. Hi kongah hin Mexico, Guatemala, Hondura le El Salvador he hnathlaknak kan tuah cangmi a si i, a thar in meng 450 tiang hau thar kan sa. Kan thazaang hi ram chungah siseh, ramleng ah siseh kan thawnter chinchin. Vawlei nih a kan upat than cang. Cu upatnak cu maw vun sung than hna lai u ci. UN ah America a nawlngeihnak a phu kan hlam than cang, kan duhnak a pelte hmanh ai tel lo nak vawleicung huap i deal paohpoah cu kan chuahtak dih hna. A tu cu NATO zong nih dollar billion a zaza in an thawh ve cang. Cuhlan kha cu a si te a rak si lo. Vawlei pi nih a duhherh mi cu pei kanmah nih kan tuarpiak dih hna cu. A tu cu vawleipi nih a kan bomh ve cang.

Cun zeidang vialte nak hmanh in, $3 trillion kan hman i kan ralkap thazaang kan sersiam, America ah sermi thilri lawng hmangin. Kum 75 chungah US Armed Forces tengnge pakhat kan ser chap: Space Force, ti a si. Kan hnung spring ah khan, Florida i Kennedy Space Center ah ka dir i, kum tampi hnu ah American rockets in vandum (space) lei panh in American mifim pawl avoikhatnak an i thawh lio ka vung zoh. Kan ramdang hawi pawl he kan i hawikomhnak kan thanchoter, China ralchanh dingin cuhlannak cakin vawlei cung ram pawl hawi ah kan ser hna.

ISIS pennak kan hrawh, an phu a dirhtu pa al Baghdadi kan thah. Iran ralkap cozah kan dironh, vawleicung terrorist nganbik Iran ralbawi Wasen Soleimani kan thah. Jerusalem cu Israel khualipi ah kan namhneh i, Golan Heights ah Israel a nawlngeihnak kan namhneh. Ramdang he ralthatein kan i pehtlaihnak ruangah, Middle East ah tuanbia chung khumh awk tha in daihnak lungtlinnak kan tuah khawh. Ahohmanh nih a si khawh lai an rak zum lo. Abraham Accords nih hmailei remdaihnak le lungrualnak caah kutka a on cang. Hihi Middle East ah niceu dawh chuah ai thoknak a si. Kan ralkap pawl zong inn lei kan tlunter cuahmah cang hna.

Kum sawm tampi chungah ah Raltuk dingmi a thar a chuahpi lotu President ka si caah kai lunghmuih khun. Zeidang nak hmanh in, America ah cun cozah nih mipi an duhmi a tuahpiak, timi ruahnak sunglawi hi a hram ka thok khawh. America rampi pakhat cio an duhnak tuah hi lam a kan hruaitu ceu, kan North Star le ai rawkkho lo mi kan zumhnak a si. Zumhtlak kan si nak hi mi a cheukhat ca lawng ah si hlei lo in, kan fale le, kan rampi le kan ram caah a si. President dirhmun in kai hmaithlak bik mi cu, American riantuantu le chungkhar hi an si. A fawimi lam kai thim bal lo, a harbikmi lam a si. Soisel a tong lo bikmi lam kai thim bal lo. A harmi raltuk kai thawh, har ngaiin ral ka tu i, nan ka thimhnawh chan a si bangin duhthimnak harsabik pawl zong ka tuah hna. Nan duhherhnak cu kai hmaithlakbikmi le sunghkhaan lo tein ka sunghsakbikmi thil a si.

Hihi kan ram caah ro nganbik a si lai, tiah ruahchannak ka ngei. Kan dihlak tein kan ram cungah kan rammi nawlngei than kho dingin kan sersiam hna. Pumpaak i uk khawhnak lam kan ser. America ah hin mizeihmanh hrelh an si lo, ti mi lungput kan sersiam, zeicahtiah mikip hi biapi dih an si i, awaan ngei kho an si dih hna. Kan mipi kip hi ai rualmi sithatnak, rualrangtein zohkhenhmi, ai rualmi nuhrin covo an i ngeih khawh nakhnga heh tiah thazaang kan chuah. Zeicah tiah kan dihlak in Pathian nih ai khat cio in ser kan si dih. Upatnak he a mikip hi zohkhenh ding an si, an authawng theihpiak ding an si, cun an cozah nih an authawng an theihpiak hna awk a si. Nan ram cungah zumhawk nan tlak, ka cozah zong hi nan cungah zumhawk a tlak zungzal.

Rammi kip nih rian an hmuh khawhnak dingah le an chungkhar cio an zohkhenkhawhnak dingah ram kan sersiam. Kan mipi an himnak dingah communitie caah rian kan tuan, hngakchia ca an cawn khawhnak dingah sianginn caah rian kan tuan. Kan upadi cawisan a si nak dingah kan nunphung kan cawisan, kan miraltha pawl kan cawisan hna, kan tuanbia kan humzual, phung a zulmi kan mipi pawl hi zeitikhmanh ah nautauh an si lo. Kan dihlak tangrual in kan limmi rial vialte ruangah kan lung ai hmuih awk a si. A sunglawi mi thil a si.

A tu cu White House ka chuahtak ve cang lai caah, kan dihlak kan i hrawmmi ro hnursuan a ton sual lai ka phannak kong ka langhter lengmang. Vawleicung ram thawngbik kan si bangin, ramdang sinin zuamcawh le hnursuang kan tong lengmang. Asinain, tih a nungbikmi cu mah le mah kan i zumhraih ti lo dingmi hi a si. Kan ram a lenhhngannak cungah zumhnak kan ngeih ti lo ding hi a si. Ram pakhat hi a lungput rup tein a thawng. Kan man rup tein a thawngmi kan si. Kan mipi hna thinlung a cawlcanghtertu zumhnak rup in a thawngmi kan si.

Ram pakhat nih a tuanbia, a sunhsakmi thil le a miraltha cungah zumhnak a ngeih a ngei lo ah cun, cu ram cu a thangcho kho ti lo. Zeicahtiah cu pawl cu lung i khawhnak le kan biapitnak langhternak dingah a hrampi an si hna. A liamcia caan chung i America nih zeibantuk harnak ngangan hmanh a tei khawhnak a ruang cu kan ram vel a ngeihnak le a thatnak le i kan i tinhmi cungah zumhsualnak kan ngeih lo ruangah a si. Cu hna cung i zumhnak kan chiahmi hi kan thlai hrimhrim hna lai lo. America kan zumhraihnak hi kan hlawt hrimhrim hna lai lo. Ram pakhat a sunparnak cu kan zatein kan i hrawmmi rammi kan sinak (phunthawh) runven le thanchoter hi a si. Asullam cu, zatlang in kan i tinhmi i hmaithlak hi a si: kan dihlak kan i hrawmmi rorah.

Cu rorah a laifangah a ummi cu zalongtein mah le hmuhning langhter khawhnak, zalong tein biachim khawhnak, zalawngtein biahal khawhnak ngeih hi a si. Mizei kan si, zeitin dah hi hmun hi kan phaak, ti kan i philh citcet ah cun, kan ram ah politics lei namhnulnak le nautatnak hmuithlaam kan lenter colh ko lai. Cucu a ruah hmanh ruah ngam lo ding khi a si. Zalawngtein debate tuah onh lo mi nih hin kan tinhmi a chungmuru le caan saupi kan i hmanmi phung a hrawh. America ah cun, thialkaam khawh lo mi phung hranhram in kan luhpi lo. Asiloah, cucu khakha, ti phun in biachim le holhrel, phung le phai zulhter, hei ti bantuk zong kan teitanh lo. Cu pawl cu kan tuah hna lo. America hi kan rem lo mi hna ram kilven le humhaak a haumi a ralchia mi hna an umnak ram a si lo. Cucu kan sining a si ve lo. Cu bantuk sining cun zeitik hmanh ah kan si fawn lai lo.

Kum 250 lenglo chung harsatnak a phunphun um ko hmanh seh, zapi ngeihlo mi ralthatnak, mah le mah i zumhraihnak, zalonnak hi kan i dirpi zungzal. Cucu continent (ram) thar halh dingin minung million in an lung a rak laaktu hna le West ah khuasaknak thar sersiam dingin a cawlcanghtertu hna lungput cu a si. Ral ram ah kan ralkap pawl an lung a thawntertu hna le vandum chung tiangin kan mifim pawl a phaaktertu hna cu Pathian nih a kan pekmi zalonnak hi a si.

A liamcia kum 4 kong ka ruah than caan paoh ah, zeidang kong nak hmanh in ka mithlaam ah a cuang khun mi hmanthlak pakhat a um. Motor tampi he khual ka tlawn fatin te, minung thongthong in ka hmuh hna. Lam kan zawh lio ah an chungkhar in an ra hna i, kan American flag pi cu lunghmui ngaiin an kan zau/ziit hnawh. Ka lungthin tawng lo in a um bal hrimhrim lo. Keimah dirpi duh ruang lawng ah an rat a si lo kha ka fiangtuk. Kan ram an dawt zia le an dirpi zia langhter duh ah an ra hna. Tuanbia chungah US hi a liannganbikmi ram a si, timi mipi nih kan i zumh. Cu nih cun kan mipi lung a hmunkhatter hna. Vawleicung ram vialte lakah kan ram cu ruahchannak ram, ceunak ram, sunparnak ram a si. Hihi a sunglawitukmi ro le rah a si caah zeibantuk dirhmun zongin kan kilven a hau.

A liamcia kum 4 chungah khan, cu bantuk tein cun rian kan tuan. Riyadh a ummi Muslim hruaitu hna thokin, Warsaw ah a umi Polish mipi sin tiang, cun UN General Assembly ah a ummi Korean Assembly an dirhmun tiang, Beijing i Khammi Khuapi in Mouth Rushmore thladeem lei tiang, nan caah, nan chungkhar caah, kan ram caah ral ka tu. Cu vialte lakah. America ca ko ah ral ka tu, ka dir – cu ram cu a himmi, a thawngmi, ai zumraimi le a luatmi ram a si.

A tu cu Wednesday chunhnu cun cozah thar kut ah nawlngeihnak ap kai timh cang bangin, movement kan thokmi hi ai thokka lawng a si, ti hi theihter kan duh hna. Hibantuk hi cuhlan ah a um bal hrimhrim lo. Ram pakhat nih a rammi a renh hna hrimhrim awk a si, timi hi ai rawksawn awk a si lo, ni khat hnu ni khat in a thancho chinchin awk lehlam a si.

American mipi nih ramdawtnak hi an thinlung chungah an chiah cung paoh cu, hi ram hi a tuah khawh lo dingmi thil hi a um hrimhrim lai lo. Kan communities pawl an thangcho lai. Kan mipi an thangcho lai. Kan phung le kan phai upat a si lai. Kan zumhnak a thawng lai. Cuhlannak in kan hmailei caan hi a ceu deuh fawn lai. Hi a liannganmi hmunhma hi lunglomhnak le zumhtlaknak lungthin te he ka chuahtaak cang lai. Kan ram caah, kan fale caah a thabikmi a ra lio ko, timi ruahchannak le zumhnak he ka chuah tak cang lai.

Nan cungah kai lawm, dam tein. Pathian nih thlua in chuah hram hna seh. Pathian nih the United States of America hi thlua chuah ko sawhseh! Catialtu: Chelsea Bawi