Joe Biden Caah Ruahchan Nak A Tha Chin Lengmang, Vote 32 Lawng A Herh Ko Cang Hih

US President thimnak cu a hlankan in thimfung an kuatmi cabawm mail voting ruangah atu tiang thimfung an rel thlu kho rih lo. Democrats minung tam deuh nih cabawm, mail in vote thlak dawh an si. Republican nih hin thimfung kuang bak ah thimfung thlak dawh an si.

Atu tiang an dirhmun ahcun Biden caah ruahchannak a hung tha than. Electoral college vote 270 a duhmi chungah 238 a hmuh cang caah electoral vote 32 lawng ngah a herh cang. Michigan electoral vote 16 le Wisconsin i electoral vote 10 a hmuh ahcun Joe Biden 270 a tling lai tei khawhmi dirhmun a phan kho. Mah hmun hnih ahcun Biden vote tlawmte in a thawn lio a si. Biden nih Wisconsin i a sungh sual asilole Michigan i a sungh sual ahcun a dih bak ve lai.

President Donald Trump nih electoral vote 270 a herhmi chungah 213 a hmuh cang. A dang electoral vote 57 a herh rih. Cucaaah President Trump nih atu lio i a tei cuahmahnak Pennsylvania electoral vote 20, North Carolina 15, Georgia 16 le Alaska 3 a laak hmanh ah hin 54 lawng a si i, a dihlak electoral college voite 267 lawng ngah dawh a si. Cucaah Michigan hi Trump nih a tei hrimhrim a herh ve. Michigan a teimi poah nih President tlin dawh a si.

Catialtu: Salai Lairamthang