Japan Prime Minister Nih Covid-19 Dirhmun Le Olympics Timhtuah Nak Kong Biafiang A Chim

Nihin tiangah Covid-19 pulrai zawtnak hi a damh kho taktak mi sii-ai hmuh a si rih lo caah le control khawh mi zawtnak a si lo ruang ah Tokyo ah tuah dingmi Olympics hi a si thiam rih lai lo tiah Japan Prime Minister Shinzō Abe nih cun a chim.

2020 kum chung Olympic cu hmaikum 2021 July thla chung ah tuah ding in vawlei cung Olympic Committee vialte hnatlak in rak thawn a si ko cang nain nihin Covid-19 dirhmun zohtik ah control khawh a si rih lo caah 2021 ah tuah ding mi zong cu kan thawn than a herh ko tiah zong PM Shinzō Abe nih cun a chim.

Cun covid-19 kong he pehtlai in vawlei cung sii-ai thiamsang hna nih an chim ning ah cun damh khawh nak ding le control khawh nak ding hi kan hmu kho hrimhrim rih lo, hi pulrai zawtnak Covid-19 rungrul a that kho mi sii-ai hmuh chuah khawh ding hi cu lam hla ngai ah a um rih ko tiah an chim mi ruang ah 2021 Olympic zong cu kan thawn rih ko lai tiah an ruahdomh pah hi a si.

Cun PM Shinzō Abe nih a chim rih mi cu vawlei cung minung nih pulrai zawtnak tihnung Covid-19 hi kan tei cang tiah thawngthanh nak tuah asi hnu lawng ah Olympic hi hnangam tein kan tuah ngam lai i lentecelh nak zong kan thok ngam ding a si hnga tiah zong a chim. Japan ramchung ah Covid-19 zawtnak rungrul a ngei cang mi hna minung 13,895 an si cang i a thi mi hi 413 an si cang tiah NHK thawngzamh ah an langhter.

Ref: DVB

 182 total views,  1 views today

This function has been disabled for Chin 11 News.