ICJ Kong Ah Rakhine Le Chin Zohkheknak – Salai Ceu Bik Thawng

ICJ kongah Rakhine le Chin zohkheknak

Ataktak ahcun ICJ kong hi Rakhine pawl nih an huat bikmi le an phur rit bikmi Rohingya/Bengali pawl kha Kawl ralkap nih tampi a thah hna I ting 5 renglo Bangladesh ram ah a pawnchuahmi hna kong tazacuaimi khi asi. Phundang in chim ahcun ICJ timi hi Rakhine ram Kong, an ram ah biaknak dang le miphundang khuhchilhtu pawl ethnic cleansing tuahmi asi caah anmah Rakhine miphun pawl khi an inuamh bik ding te khi asi.

Asinain Rakhine pawl cu zei an chim lo. Atu hi Rakhine ka um lio si i ICJ kong TV zong an zoh lo i an ceih lo. Chinram Hakha Falam Mindat peng bang ICJ kong Kawlram dirpinak sandah an piah ve lo. Lawmhnak le dirkamhnak bia an chim ve lo.

Ka motor mongtu Rakhine pa nih a chimmi cu “Hi Kawl pawl le Ralkap pawl cu zumh awk zeihmanh um lopi” a hei ti men ko. Rakhine hriamtlai AA zong nih ICJ a dirkamhnak bia a thanh.

Cu lakah kannih Chinmi— UN nih dirkamh peng ahau rihmi miphun, dinnak a dirpimi Khrifa miphun nih UN/ICJ biakhiah hlan ah kap ttanh in hehchet kan rak aumi hi cu a poi tuk ee.

ICJ ah Suh Kyi a kal (or) khalo a poi lo -a kal awk asi-asilo tiah buai awk lo. I al can si ti lo.

Asinain hi tazacuainak case a thuk tukmi -zapi nih zakkhat ah pakhat hmanh kan theih rih lomi (kanmah achung ummi taktak hmanh nih kan thei kan ti ngamlo) thil, ICJ zong nih kong ceih liomi, thil dik theih rih lomi le biakhiah rih lomi thil ah zapi nih fawi tukin biakhiahnak le ttanh hleimi kan ngeih cia hi cu a poi tuk.

Kawlram maw na ttanh Gambia hei ti phun. Ralkap maw na ttanh ARSA Muslim hei ti phun. Zei ram le zei miphun le zei buu ttanh caan si lo. A dikmi chuah ding kha thlacam ding si.

Atu i “anih kan dirkamh” tiah sandahpiah mi le FB ah catialtu 99.99% nihhin ICJ kong le Kawl ralkap genocide kong hi a pelpawi hmanh an/kan thei taktak lo.

Cucaah ka nolh ko rih lai- zeihmanh ah buai hna hlah usih: Amos bia bang dingthlulairel biachahnak a um nakding tu kha thlacam ko hna usih!

Crd: Salai Ceu Bik Thawng

 

 233 total views,  1 views today

This function has been disabled for Chin 11 News.