ICJ Biaceih Zung Ah A Kalmi Perhkalh Thawng Catial Nuam Tuk

Kawlram cozah pi tazaa an cuainak ICJ biaceih zungpi cu lam pathum an i tonnak lei hoih in mithi ruak bang aa suang deldul ko. Minung cu chim lo, ui le ar pakhat taktak hmanh a chumtual le a velchum ah an i chawk lo. King ririei tein a um.

Ka hei naih deuhdeuh ka hun zoh deuhdeuh cu tiva kamah a bawkmi, a thimi bang mit i chinh riangmang in saseh ding a bawhmi tisar tlang bantuk hna ka hei lawhter thulh ngai. A chung luhnak kutka pahnih a um. Pakhat cu mawṭaw luhnak a si.

A dang pakhat cu minung luhnak a si ve. Kutka pahnih ah kutka cawngtu panga an um. Nu pahnih, pa pathum. Zei bantuk uniform hmanh an i hruk lo. Zung hmai ah a kalmi lampi le orhlei in a rami lampi karlak ah hri an zam i, “ We stand with” a timi pawl an dir. Minung 250 hrawng an si lai dah.

Kehlei ah a kalmi lampi a va donghnak ah OIC lei ṭang an dir ve. Catar an i put len ve nain a va hla nawn caah an ca a fiang lo. Minung 50-60 cu an si ve lai. Keimah bantuk mi laklawh pawl hi orhlei a kalmi lampi cungah kan um i, ṭuanvo ngeitu hna le Media pawl lawngte deuh an si caah voihnih le voithum in kan i ṭhial hnu a donghnak ah “We stand with” a timi pawl hnulei kan va phan ve. Suimilam 9:30 ah ASSK a phan lai ti a si i, sml 9:00 hrawng ahcun Kawl pawl an thi a hung lin deuh ngai. Lam laifang in maw a rat lai, orhlei lam in dah a rat lai, asiloah kehlei lam in dah a rat lai timi a fiang lo caah kan umnak kan i thawn lehlek.

Tlawmpal ah palek pahnih nih rang pakhat veve an i cit i, lam pathum i tonnak hmai ah an hong dir. Ziah rang cu ka ti hna i, rang fim a si an ka ti. A va si le si lo ka hngal lo. Luklak ah lam laifang lei in “phiit” an tum i, mawṭaw PK pahnih an rak choi colh ve. Cun, palek mawṭaw pakhat nih a rak zulh. An hnuah mawṭaw pali hrawng an rak i zul i, pakhat hnu pakhat in biaceih zung kutka chungah an liam diahmah ve. Culio ah “We stand with Daw Aung San Suu Kyi” tiin zung hmai ah zapi an au len. Keilei lam a donghnak ah a dirmi hna zong an au len ve i, an catar an thlir len ve fawn. A va hla deuh caah an aumi a biafang ka thei kho lo i, an catar zong ka fiang kho ve lo.

Culio ah khua zaza in ka ruat i, Bawi Jesuh le Pilot siangpahrang pa kong kha ka thinlung mitthlam ah an hong cuang vuaimai. Bawi Jesuh kha an tlaih i, Pilot siangpahrang pa sinah an chuahpi. Pilot siangpahrang pa nih a sualnak ka hmuh ṭung lo a ti hna nain, mi zapi nih “that ko. that ko” tiah an au i, misual pa Barnabas tu kha “luat seh. luat seh” tiah, an au. Ka lungah a hung chuak ngaimi cu, Bawi Jesuh a thih kha “that u…..that u” a titu hna ca zong a si ko i, a sualnak ka hmu lo a titu pa ca zong a si ko mu timi ka lungah a hung chuak ngai.

Mi cheukhat nih ICJ zung hmai i “We stand with ASSK” tiah, va au len ve hi kan duh. Mi cheukhat nih kan doh ve. Cucu minung phung a si ko. Minung pakhat cio nih duh khawhnak nawl kan ngei cio i, doh khawhnak nawl zong kan ngei cio ve. Asinain, The Hague khua i ICJ zungah keimah ka va kal ve hi “We stand with ASSK” tiah, va au len ve dingah a si theng lo. OIC lei ah va ṭang in ASSK va hro len ding le va pamh len dingah a si fawn lo.

Kawlram cozah pi tazaa an cuai timi cu Kawlram a hmunh chung tuanbia in a hmun ve ko lai caah tazaa an cuai lio a hmun le a hma thengmang ah va um ve i, a minung pawl an cawlcangh ning le an biachim le an mithmai va hmuh ve thengmang kha Laikhal pa keimah caah ‘’zei pi’’ ka hei ti bia khi a si ko. A chung kan luh khawh lo caah a minung le an biachim kan hmu hna lo nain, a pawngkam ah kan i helhum ve ko i, a hnuah a minung le an biachim zong kan theih ṭhan ṭhiamṭhiam ko caah ASSK le NLD ka ṭanh tawnmi kai leet bak lai lo ka hei ti ko.

By: Perhkalh Thawng 

 

 337 total views,  1 views today

This function has been disabled for Chin 11 News.