ICJ Ah Rohinya Miphun Nih Teinak An Hmuh Ahcun A Cang Khomi Thil

ICJ ah Rohinya kan dirpi ahcun thil a cang khomi kan theih awk tete. Kawlram cozah hrauitu lubik pawl cu OIC ram hna ai awh in Gambia nih vawlei biaceih zung ICJ ah taza a cuai.

Mahhi kong hi Chinmi lak zong ah a linsa ngaingaimi a si. Kawl miphun le NLD party pawl nih Suu Kyi an dirpinak cu khualak ah i chok in an aupi len cang. Kawlram Khrihfa tampi zong nih Suu Kyi caah thla an campiak. Zei ti pungsan in thla an cam timi bel cu kan thei lo.

Khah cuti si ahcun Gambia nih Kawlram taza a cuaimi hi 99% cu Rohinya ruang ah a si. Rohinya pawl an cihmih na timh hna. A bubu in na thah na nawn hna i hloh dih na zalh hna caah UN phung na buar ti ruangah Ganbia ram nih ICJ ah taza  a cuainak cu a si. Suu Kyi zong nihin December 8, 2019 ah ICJ zung a umnak Nertherland lei ai thawh cang.

Khah si ahcun ICJ ah Kawlram cu sung seh. A sual ko tiah baiceih tu hna nih ti hna sehlaw zei thil dah a chuak kho timi cu theih a si lo. Nain upadi thiamsang hna nih an chim ciomi cu Kawlram hi a sual ko a palh ko ti a si ahcun taza an cuaimi hna Suu Kyi te pawl, Min Aung Hlaing te pawl hi tlaih an si lai ti a si. Cu ti a si lo ahcun Bangladesh ah a ummi Rohinya pawl hna tha tein an kirnak ding le Rohinya nih nuhrin covo tha tein an hmuh khawhnak ding, humhimnak an hmuh khawhnak ding kha Kawlram cozah nih a tuah lai ti a si.

Kawlram mi a simi poh nih kan theih awk thil a um. Cucu Kawlram caah tih a nung ngaimi cu Rohinya hi an si. ICJ ah Kawlram a sungh ahcun Rohinya miphun pawl hi Kawlram ah Citizen pek an si a hau cang lai. Rohinya nih an duh mi hi rammi sinak citizen pek le state pek te hna a si ve. Cu ruang ah hriamtlai zong an um i Kawlram palik sakhan 30 zong an rak kah bal khah.

Rohinya nih Kawlram mi sinak tling, Kawlram hi an vawlei a si venak tling rammi sinak an ngeih ahcun Rohinya miphun hi fa an hring kho tuk. Milu an karh a rang tuk. Bangladesh ralzam camp lawng ah khin ting 10 reng lo an um. Cu ruangah Rohinya miphun hi tha tein thlahdorh i Kawlram mi ah cohlan ahcun tuhnu kum 20  ahcun Rakhin ramkulh khi Rohinya miphun a khat dih ding an si.

Caan a hun rau lai i an milu karh a ran tuk ruangah Rakhine ramkulh lawng hamnh si loin Kawlram ah Rohinya miphun a tam tuk manh ding khi an si. Kanmah Chinmi ca zong ah Paletwa ah khin Rohinya miphun tamtuk a rak kai ding khi an si. Kawlrammi sinak citizen tling an ngeih ahcun an duhnak poh ah an um kho cang cu mu. An kal kho cang tinak a si.

Muslim an si fawn tikah ralhrang he an i pehtlai lai ti zong an phang. Musil ram pawl sining khi an tuak. An milu karh a ran tuk ruang ahhin hmailei Kawlram mi caah tih a nung tuk te sual lai ti an phan ruangah Kawlram cozah nih Rohinya miphun hi thangcho kho loin a umter hna nak in a si. Kawlram miphun humhim  a duh ruangah a si. An mah an chuahkeh taktak nak a simi Bangladesh ah kirter dih a timh hna nak in a si.

Rohinya miphun hi an tuar ning cu a fak bak. Kawlram chung ah an mah khua ramri hrawng lawng ah an um kal kho. Kawlram chung an duhnak poh ah an umkal kho lo. Kawlram cozah nih an namnet ngaingai hna. Mah vialte khi Kawlram ramkhel pawl nih an miphun runven an duh caah a si.

 

 256 total views,  2 views today

This function has been disabled for Chin 11 News.