Hriamtlai Phu Nih Khualtawn Lam An Phih/Khar Mi Ruang Ah Kan Unau Khua 42 Rawl Ei Ding An Ngei Ti Lo

Myanmar Tatmadaw nih Arakan state, Ann pengkulh chung ah a um mi hna khua 42 cu motor khualtlawn lam le tilawng khualtlawn lam vialte an phih/khar piak dih hna. January thla thok khan khualtlawn lam vialte an phih/khar dih ruang ah ei-din ding ti rawl kong ah lungrethei ngai in an um ko cang hna tiah Chin Human Rights Organization (CHRO) spoke person Salai Alian nih cun a chim.

“January 16 hrawng khan cun ei-din ding an rak ngei ti hna lo. Ei-din kong ah lungrethei in a um mi hna khua 42 an si i cu chung ah cun Chin mi minung 10000 an um hna. Rawl ei ding facang an ngeih ti lo caah Ba le thing bahra pawl hi rawl caah an ei mi a si” tiah a chim hi a si.

Hi khua 42 hna nih a bik in an i cawmnak hi Ann khua in Kan-Taung-Gyi khua ah tilawng hmang in ei-din ding facang le herhhai dang an rak lak tawn nak a si. Asinain a tu ah cun AA hriamtlai phu sinah ei-din ding ti-rawl a phak khawh lo nak ding ah tiin Myanmar Tatmadaw nih khualtlawn lam vialte cu a phih/khar dih hi a si.

Hi kong he pehtlai in bawmhnak peknak ah ai tal ve mi Salai Win Mg nih cun “tangka cu ngei ko hna hmanh sehlaw ei-din ding ti-rawl cawk ding facang a um lo. Thing thei le anhringso pawl lawng hi rawl caah an ei mi a si ko. An caah facang tun 50 zong pek hna ding kan timh ko nain khualtlawn lam an phih/khar dih ruang ah kan pek khawh hna lo hi a si” tiah zong a chim ve.

Rawl ei ding a ngeiti lo mi hna khua 42 chung ah hin khua 37 cu kan Unau Chin mipawl an um nak a si i khua 5 hi Arakan mi pawl an um nak a si.

Source: The Tahan Post

 123 total views,  1 views today

This function has been disabled for Chin 11 News.