Hi Kong Hi Fiang Tukin Langhter A Si Cang!

Tu zan an debate cu zoh a nuam ngai. A voikhat lio naak in tu tan cu President Trump a ti tha. Biden zong a tha ve nain a voikhat lio naak in a lei aa khukkhak deuh ngai.

Moderator nu hi Democrat a si i, a hramthok hrawng cu a tha ngai nain a lai hrawng in cun a color chuak pah. Trump biachim a tan lengmang. Biden cu voikhat hmanh a tan lo; Biden chim nolh a time poah cun a onpiak lengmang.

A caan ahcun biahalnak thar a vun tuah i Biden lawng a hal i Trump lehter loin lanh tak a timh tawn; Trump nih a hal hnu lawngah a chimter than lengmang. Theih khawh ngai a si.

Bia a halmi hna a tam. An bia lehmi hna zoh tikah Trump nih a tei ngaingai. Tuzan cu ahodah American mipi caa riantuantu taktak a si timi a vun lang.

Atu lioah a lar ngaimi Joe Biden fapa i Ukraine le Taluk i rian a tuannak kong a hal. Joe Biden nih cun lih a si a ti than, Hunter computer an hmuhmi zong hi Russia kut a si tiah nawnnok a timh than. Trump nih a duh lo kho tuk.
Taluk in tangka tam tuk na hmuh ve ko tiah Biden nih a tuk ve nain Trump nih aa leh tha lo. 2013-15 lio thil a si. President ka tuan hlan a si a ti. Ka ngol diam cang tiah a leh.

A voikhatnak ah khan Virus ruangah US khar than le khar than lo kong hal an rak si. Trump nih cun sianginn zong an kai lai; restaurant le business vialte kan on lai a ti. Kan sunghmi a tam pinah nunnak a rawk tuk a rak ti. Biden nih cun US khar than ding in a rak chim. Trump nih ‘na khar lai maw?’ tiah a rak hal than i, ‘yes” a rak ti. Asinain Joe Biden nih cun kan khar lai ka ti lo tiah tu zan aa pheh than.

Miphun thleidannak kong a hal than hna. Biden nih miphun thleidannak ngei bik na si. Hi vialte kan tonmi buainak hi nangmah ruangah an si a ti. Trump nih miphun thleidannak ka ngeih lei ngeih lo cu tiah Asian,minak le miphun dang hna caah rian a sermi a vun chim; Inn Raang ah miphun dang he tonnak an ngeihnak le tangka in a bawmhnak hna vialte a chim. Kum 8 chungah zei hmanh tuahmi nan ngei lo tiah Obama le a kawi pa cu a phomh hna.

Election kongah naite zong Proud Boys (Trump tanhtu or vun raang kal sual pawl) min in Taluk, Russia le Iran nih vote thlatu pawl sinah thihpheihnak le hrocernak ca an kuat hna ti a si. Lam dang zong in an i hrolh len than ti an theih.

Biden nih Russia cungah na nem tuk tiah Trump a ti. Keimah naak in Russsia cungah a hrang deuhmi an um lai lo. Dan ka tatmi tluk in a hohmanh nih dan nan tat hna lo; NATO ka thawntermi zong hi Russia tlaihhipnak caah a si tiah a leh.
A sau i, lanh tak ko cang u sih law, a donghnak ah a halmi hna cu President tling u law an vote duh lomi hna sinah zeidah nan chim lai tiah a hal.

Kahin Joe cu politically correct tein biachim a thiam ngai. Rualrem tein kaarhlaang ti ding in ka sawm hna lai; party pakhat president lawng ka si lai lo; American mipi president ka si lai a ti.

Trump nih cun politically correct ngaiin a chim lo. American mipi caah zeitluk in dah rian a tuan khah a langhter. A donghnak a chimmi cu ‘hlawhtlinnak nih a kan fonh than te ko lai’ (success will unite us) a ti. Hi catlang te nih hin president a tuan hnawh chan a langhter ngai tiah ka ruah.

North Korea kong in, climate kong in health care in mipem kong in issue tam ngai a hal hna. Biden nih million in illegal mipem kan ngeihmi hna hi miphun sinak ka pek hna lai a timi nih an lung a lawmhter ve hna lai.

SOURCE: LUTHUR TIN HRE