Hi Bantuk Biacah Tha Hi Tampi In Share Cio Hna U Sih, Tuanbia Dawh Kan Tialpi Ko U

Lai Khuapi Khuabawi Hna Sin Ah Biacah: Tuanbia Dawh Kan Ṭialpi Ko U! 1988 buainak hi ṭhangthar nih kan mitthlam in kan cuanh tikah kan tuk a sum. Video kan zoh tikah kan thin a lin. Caan tawite an rak ti mi cu kum 32 tiang bak a rak rau. 1988 buainak nih Asia ram ah ralzaam tam bik pawl a kan chuahter. Hriamtlai phu tamtuk a chuahter hna. Minung chan khat cu zei terek lo ah a liam ko.

Nihin 2021 buainak a hung chuak ṭhan. 88 buainak kualkhat ai hel ṭhan sual lai hi nihin ṭhangthar (Gen Y & Gen Z) nan fale nih kan ṭih bik mi le kan duhlo bik mi a si. Cu lam kan zulh ṭhan ahcun nan fale kan hmailei (future) a tlau bak ko lai. Kan pawcawmnak, fimcawnnak le zatlangnun cu muihnak khur ah kan phum ṭhan sual lai hi zaanmang chia bang hmanh ah kan hmu duh lo.

Communist le Monarchy ukphung muisam in ralkap sahrang nih rumra, hihai le nawlngeihnak an hun i lak ṭhan ding mi cu a ruah hin kan ruat kho hrim lo. Hi hnu kum 30 chung kan miphun le kan khuatlang hi 88 hnu bang an kan uk ṭhan ahcun kan miphun a tlau nak ding lam a si telai. Mipi duhnak in thim a si mi kan Lai khuapi khuabawi hna; caan tawite cu hmailei kong ruat in nan calvun hun sur ulaw khua hun ruat ko uh ti kan duh hna.

Kan khuatlang sang le veng uknak le nawlngeihnak cu nan kut cung ah mi tam-u duhnak in kan chiah. Chiat ni ṭhat ni le nipi nileng caan ah bochan ṭiapmap tein kan in domhcawi ciahmah mi hna nan si. Nan palh ah nan ṭhat ah mi tam-u thim mi an si timi democracy nunphung zulh in kan in zulh ko hna. Asinain, nihin kan boruak le kan nikhua sining kan zoh tikah a kan deuh tu Lai Khuapi khuabawi kan in hmuh hna tikah a poi kan tituk.

Mipi Sin Ah I Ṭom Ko U! Mipi nih thim mi nan si. Cu ca ah mipi sin ah nan i ṭom awk a si. Ralkap le palik cu mipi thim mi an si lo. GAD zung hmanh nih 𝘢𝘢𝘯𝘢𝘴𝘪𝘯 kuttang rianṭuan kan duh lo tiah acozah rian nuar in mipi sin an ṭan lio ah cun mipi sin ah nan i ṭom awk te khi a si. Kan mipi nan huhphenh hna awk a si. A herh ahcun nan khuabawi ṭuannak kha le nawlngeihnak kha mipi sin ah nan ap awk a si cang. A ruang cu nawlngeihnak kha mipi ta a si ruangah a si.

Naihrawng thawngchuak kan theih mi chung in Lai khuapi ah sangbawi le khuabawi hna nih 𝘢𝘢𝘯𝘢𝘴𝘪𝘯 duhlonak an au tikah Palik le ralkap thlah mi ngiathlai tu hna sin ah report nan pek hna ti a si. Hihi a si awk hrim a si lo. Zeiruang ah dah Facebook cung ah parthlaknak le zahthlaih nan ton ti ahcun khuabawi dirhmun ah an in chia tu hna mipi kha 𝘢𝘢𝘯𝘢𝘴𝘪𝘯 uknak zulh in mingiatthlai nan bawmh hna ruang ah a si. Mipi sin ah nan dir lo ruangah a si.

Mipi Lei Ah Nan Dir Ahcun : Kan in bochan hna nak le kan in tlaihchan hna nak a ṭhangcho lai. Nan nih cu kumkhua in nan chan a ṭim cang. Nan hruaimi khua le tlang, nan hruai mi mipi le chanto mino hna nih Democracy ramthlennak ca ah thlanti, caan le nunnak pek an ngamh lio, a caan lio te ah nan mipi sin nan dir ahcun khuabawi nan si tilo tiang an in ‘upat’ hrimhrim hna lai. Kan in philh ti hna lailo. Cucu Khuabawi taktak cu an si.

Ram mipi uk le pen duh ah mah chungkhar cangaikhorh in hriamnam he uknak a la mi ralkap 𝘢𝘢𝘯𝘢𝘴𝘪𝘯 hi an nawl nan zulh hna awk a si lo. 88 lio ah an rak zulh sual hna ruang ah kum 30 leng kan tuar cang kha nan hngalh ko lai. Cu ca ah Lai khuapi khuabawi vialte hna, dirhmun an petu mipi sin ah dir ko u. A herh ahcun CDM ah i tel cang u. Hi caan ah 𝘢𝘢𝘯𝘢𝘴𝘪𝘯 kan teilo ahcun nan fale cu hriam maw kan tlaih lai, thong inn dah kan fuh lai timi lam pahnih lawng a um cang. Tuanbia dawh kan ṭialpi u! Pathian nih fimnak in pe ko hna seh. Credit: Salai Ṭial Hram Ling