Hakha-Thantlang Fanu Fapa Vialte Hna Sin Cakuat

(Laiholh lawng nih AA le Kawl ralkap a tei lai, Sal lungput ngeimi nih cun Lai Miphun sang bik kan si ti bantuk hi an ning an i zahter ti si. A poh lo an ti, ti si)

Hakha-Thantlang kan ti lai maw, Lai fanu fapa hna hi Chin-Kuki-Mizo vialte fonh ah a Lai bik ah ummi kan si. Curuangah Lai Miphun kan sinak zong hi a rak si kho. Phun dang chim ahcun Central miphun kan si. Bahu miphun kan si. Miphun dang caholh zong a tlawm bik thongkhat cu aa cawm kho ding kan si. A cung i “central ke Bahu” hi kan cawm cia mi an si. Mah bantuk holh cawm hi doh ding a si lo. Kan holh than cho nak le nunnak tu a si deuh. Laiholh si lomi rumro holh tu kha doh ding cu a si. “Apawte,ka pawte,a cacapa cicicaca cha” tiah holhtheihlo bantuk in a holhmi zong kha Bible Holh theih lo nak in doh deuh ding khi a si ning tak ahcun a si cuh.

Holh cawm kong ahcun Mirang le bang nih cun Kum thong a rau cang mi ah khan an rak pemh diam cang. Nain Laimi cheukhat Laiholh ka țanh bak ve a timi nih tu ni tiang ah an pemh rih lo. “Siikan” ngeih herh van ti ning law, Laiholh ka țanh a timi cheu khat nih cun “Siikaan” cu zei dah si? Laiholh si țung lo ti i, van sawi kha thiam bik ah an ruah. Laiholh ka țanh ti țung ah Laiholh hmanh na thiam lo hi an ka ti tawn. “Siikaan” cu Laiholh in zei a si kun ka ti hna i” pakhat le pakhat an holh lehmi aa dang dih. Nundawh ti na, ningcang tlai ti na, a phunphun cun an van leh nain an ‘poh’ lo ngai. A fuh lo tak khi a si. Kha bantuk kha hruh țanh a si i, keimah ka țanh daan hi fim țanh a si. Mizo biafang tiang hmanh in pakhat hnih cu Laimi lak ah a leng cang mi a si ahcun ka hman tawn. Cawm thiam hi a herh ngai.

Hakha-Thantlang hi mi van chia taktak kan rak si nak a um. Cu cu kan Van chiat ruangah si loin a vanțha bik kan sinak a hman kan thiam lo. Lai tuanbia thok ri in Chin-Kuki-Mizo vialte lak ah a rak Lar Bik kan si, a thawng bik le upat bik mi kan si. Hakha Khua chungah Mizo nih an Mar tawdau in Holh timi cu mang hmanh ah rak manh ngam lo ding khi a si. Kan mah Lai pawl tu cu, MIZO Mar khua nganngan ah duh tawk in tlang a rak khawngmi kan si.

Cu kong cu um rih seh law, Kawlram he kan i peh tik zong ah Chin phun tenge vialte nih Hakha Laiholh thiam cu an rak uar tuk. Peng tam pi ah tlangholh zong a rak si. Kawl bantuk in ruru hranghrang in kan rak tuah hna lo. Thawngtha mei kan va phorh hna. Kan dawt hna, kan cawisan hna, a si nain Kawl nih Ralkap thazaang bochan in Hakha Laiholh a rak Lar nak vialte ah khan țhennak thlaici an tuh ciamman i, a kho colh ko. Fungfek he, kut tum he an den ciamman hna i, cu tluk fak in a hrem tu hna Kawlholh cu a dawtu hna Laiholh nak in a let zakhat in an upat deuh cang. An uar deuh cang. Hakha Laiholh thiam a herh lo.

Zei ah dah kan hman lai an ti cang. Hakha Laiholh doh kha phun țanh bik le thiam bik ah a relmi Laimi an um hna. Cu Caah cun Hakha-thantlang vialte zong sual zia kan thiam herh ve cang. Lemnak in Holh hi rak karhter khawh a si lomi ah aa tel rua. Mizo nih Mar tawdau holh an larter mi zong khi lemnak in si loin ruru hranghrang in cawlnak in a rak si. Kawl holh kan uar tuk mi zong hi Kawl pawl an i țhatter le lemnak ruangah si loin ruruhranhrang ruang tu ah a si. Hakha le Thantlang khua bak ahcun Ruruhranghrang hman a herh diam cang khi a si. Laiholh in a holh lomi paoh met caan a nai cang hih. A thin ka phawh ngai mi nan um lai nain lem khawh cu pei nan si lo cu. A chuih in chuih lawlaw kan duh leh hna hih. Nan fa le chan ah Laiholh holh lo ahcun Ningzak le zahthlak taktak ah chuak ding in a ser fawi tuk.

Chin Miphun vialte lak ah cu hlan vialte lung nem bik kan si. Peng dang vialte daw bik tu kan si. CNA tiang in an i fimter tuk ruang le țhat ter tuk ruang ah Hakha-Thantlang fa nih cawm mi an si nain an Ralkap lak ah Laiholh an lar ter lo. Kum nga kum ruk um cang mi hmanh nih “Rawl Na Ei cang maw? Ti hmanh fiang tein an chim thiam lo. Ka tial cia a si caah za rih seh hi kong cu mu: tikah… Kan i țhatter tuk mi le fimter tukmi vialte kha kan Ram bitnak lawng si loin Kan Limhaang zornak ah a cang cang. A ngai ngai ah Vawlei Cung Miphun thong tam tuk um nak ah hin Capital Holh pei Tlangholh si dih ko cu.

Falam pawl nih heh tiah Capital holh tlangholh an hman lo nak Ram lole State um hnga maw tiah Google ah an kawl len nain an hmu țha kho lo. A zei a si hmanh ah Laiholh hi tlangholh ding caah Van lei in khaukhih mi a rak si. Cucu a kaungțhe phaw kan herh. A tak in canter kan herh. Halkha Holh le Ral hro nak timi phung thluk kha zapi hngalh a si. CNA zong ah Hakha Holh te kha țha te le fek te in a ho mithmai hmanh zoh loin rak hmanmi siseh law, AA vialte hi hro-chawih dih an ngah cang lai.

Nain Ralhronak holh cawisang loin țihhrut holh tenau le kawl holh an uar tuk ruangah Caw eek pon lak ah an pil dih cang. Laiholh a hmangmi le a pommi lawng nih a țhar in Ralkap derh i, Ralhro nak ah kan Pupa nih an rak hmanh mi Holhpi kha a țhar in kan larter a herh lai. Cutikah cun a lulu bak in Chin unau dang zong nih an upat țhan lai. AA zong kan tei hna lai. Laiholh lawng nih AA a tei lai. Laiholh lawng nih Kawl ralkap a tei lai. Ka cabia a dotu pawl nih nan theih ding ahcun nan techin fapar nih cun nan mah nakin ka cabia hi a let zakhat in an uar deuh te lai.

Note: zapi nih Like duh ruangah ka țialmi a si lo. Fak duh ruangah a si fawn lo. Like duh le Fak duh ahcun midang vialte nak zong in a let zakhat țial ding ka thei deuh rih ko. Cupin ah bia-nem bik hman zong ka thiam bik rih ko. A thin khenh mi an um lai zong ka theih ko. Ka chim lomi ka theih cia mi tam tuk rih. Nain mah hi cabia bantuk hi zapi nih cun an Like lem lo nain Lai phun țanh tak tak nih cun an uar bik mi an si. Phun țanh pawl caah rawl bantuk a si. Lai miphun damnak cabia a si. A tuchan ah do tu an um hmanh ah hmai lei chan ahcun zapi nih History bantuk in an cawn lawng si loin an ciah te ding khi a si. Ka cabia pakhat chung lengmang ah hin Fimbia le theihtlei an um zungzal.

Credit: Siang Bawi

 477 total views,  1 views today

This function has been disabled for Chin 11 News.