Hakha Motor Accident in Minung pahnih Nunnak A Liam!

Hakhathar le Hniarlawnthar karlak ah lung phortu motor a tlak i minung (2) an nunnak a liammi kong he pehtlai in a nunnak a liammi chungkhar lei nih lam rianttuan in lam a khamtu report an timh, tiah thawng kan theih.

Rual Tling Cung (kum 25) le Ram Tha Hmung (kum 21) nih an khalhmi lung phor motor cu April 20 zinglei sml. 10:00 ah Hakhathar le Hniarlawnthar karlak, Presbyterian biaknak pawng cho kai kho loin a tolh i, lamthlang ah fak ngaiin a tla.

Ram Tha Hmung cu a hmun ah a nunnak a liam i Rual Tling Cung hi sii-inn an phakpi hnu ah a nunnak a liam ve.Cu kong he pehtlai cun Hakhathar le Hniarlawnthar karlak ah lamphah rian a ttuan i, Rual Tling Thang te motor kalnak nawl a pe lotu lamphah ttuanvo ngeitu kha thihlohnak a tongmi chungkhar lei nih report an timh hna hi a si.

Lam an phahmi hi pe 35 hrawng a kaumi a si i cu chung ah cun pe 18 kau hi lungphah ding in rian an ttuan cuahmahmi cu a si.

Rual Lian Cung (Acung) le Ram Tha Hmung (Atang) nundam in an um lio i an rak tlonlen tti lio. Hawikom aa daw ngaimi an si. (Photo – Ngaihchiatnak Tong Chungkhar)

“Kawlram chung lamphah rian zulhphung ning ah hmun khatkhat ah lamphah rian an ttuan ahcun “Lam Kan Phah Lio a Si” timi catar tarpiak le kal lo ding timi theihnak hri zong zampiak awk a si. Cun, motor an kal khawh nakhnga motor tlum in lam onhpiak ding a si (Hmunhma a um ko ahcun). Asinain, lam a phahtu lei nih a cunglei tuah awk vialte hi pakhat hmanh an rak tuah lo. Ahohmanh nan kal kho lo tiah lam an kham. Motor a tlak hnu tu ah a cunglei tuah awk pawl hi an tuah dih tthan,” tiah thihlohnak a tongmi chungkhar he naihniam pakhat nih a chim.

Atu bantuk in lam riantuantu lei nih lam an kham caah Ram Tha Hmung te nih lam onhpiak ding in an hal hna lio ah kap hnih karlak ah i mawhchiatnak le i sikcaaknak tlawmpal zong a um.

Lam khamtu lei nih Ram Tha Hmung te cu Presbyterian biakinn pawng cho in kal ding in an fial hna. Hi cho hi lungphormi motor cu chimlo motor ttha pipi hmanh Special Gear in an kai tawnnak a si, tiah a theitu hna nih an chim.

Ram Tha Hmung te motor cu a kai khawh ti lo tik ah a tolh i lamthlang ah faak ngaiin a vung tla i atu bantuk hin nunnak pahnih hmakhatte ah a ziamh hi a si.

Lam a khamtu Pu xxxx cu a nunnak a liammi minung pahnih i chungkhar hna nih report an timh i, April 27 zaan sml. 7:00 ah khan kap hnih tonnak an ngei.

“Ahmasa ah cun Pu xxxx nih hin lam ka kham hna lo tiah aa pheh peng. Asinain, lamkham a tongmi pawl nih kanmah zong ahlan ah na kan kham dih tiah an ti hnu ah aa vuankhaan tthan. Lam a khamtu Pu xxxx nih thihlohnak a tongmi chungkahr cu tangka ting 5 veve liam ding in a hal hna. Cu ruang ah cun thihlohnak a tongmi hna chungkhar i cingla rualchan pawl an thin a hung ngaingai. Cucaah, tuzan cu zeihmanh biachahnak kan tuah kho lai lo an i ti i, tonnak cu an ngol,” tiah tonnak ah aa telmi minung pakhat nih The Chin Journal ah chim.

Chungkhar lei nih tangka liamhrulh le tazacuainak thengmang tuah hi kan duhmi a si lo; Asinain, hi kong ah lam a khamtu pa nih aa pheh zungzalmi hi kan celh lo, tiah an ti i report tuah an timh hi a si.

 182 total views,  1 views today

This function has been disabled for Chin 11 News.