Hakha Mizaw He Motor Aa Cit Timi Thantlang Peng Minung Tampi Quarantine An Tuah Dih Hna; Khuate Um Zong An I Tel

TCP-Thantlang| 30 April 2020| April 29 zinglei ah Hakha in kum 18 nu sin ah COVID-19 Positive hmuh mi he Kalay myo in motor aa cit ti mi tiah ruah mi hna Thantlang peng in minung 8 hna cu ni 21 chung Quarantine tuah dingin April 29 ni ah an tawlrel colh ve hna tiah tuanvo ngeitu sinin theih a si.

April 6 ni ah Kalay myo in Hakha-Thantlang motor aa cit timi an si tiah ruah mi Thantlang pengin minung 8 chung ah Home Quarantine in minung 4, Hospital Quarantine in minung 2 le Na-ta-lah sianginn ah Facility Quarantine in minung 2 chiah colh an si. Hi minung 8 chungah Thantlang khua chung um mi pin ah Thantlang peng khua te ah khuasa mi Khua hnih zong an i tel ve tiah theih a si.

“Minung 8 an si, nizan (April 29) ni ah kan auh dih hna. Cu chungah Home Quarantine, Facility Quarantine le Hospital Quarantine tiin chiah an si. Cu cungah minung 4 hna zong swab kan lak hna i Yangon zawtnak cheknak zung ah kan kuat lio hna zong a si. Hi chung ah Thantlang khua chung um mi lawng si lo in khuate lei zong an i tel, Home Quarantine timi ah khan khuate um hna zong aa tel ve lai.”tiah Thantlang peng COVID-19 zawtnak kongah chimrelnak nawl ngei Dr. Van Lian Hum nih TCP ah a chim.

Thantlang khuachung ah hi zawtnak in a hlan kan runvennak zong felfai tein tuah peng le mizapi sinah ralrinnak kong tlangau in theihternak tuah peng a si pin ah Thantlang khua ah hi zawtnak a um ahcun tiin Volunteer mino zong phu hninh tiangin dirh le an rian hma cio zong chimhcawn piak an si cang.

“Yangon ah an kuat mi hna result zong zei hmanh a fiang rih lo nain i ralrin cu a sual lo caah hi minung 8 he aa neihniam mi deuh mi han zong Quarantine chiah piak in kan ngiatthlai piak hna seh law kan duh.”tiah Volunteer mino bu hruaitu pakhat nih TCP ah a chim.

“Hakha mizaw he aa pehtlai mi minung hna le thil sining kong cu a dikthlir in hlathlai lio a si nak kong le felfai tein Quarantine tuah an si lai nak kong Chin ramkulh chimphuannak nawlngei tu Soe Htet nih April 29 ni ah TCP ah a chim.

Facility Quarantine tuah mi hna hi inn chungkhar lei nih rawl an chanh hna ah cun penguk zung lei nih nikhat minung khat 3000 in an pek hna lai. A tu lio minung 8 an ngiatthlai mi hna zong an ngandam ko tiah theih a si.

Hikong he aa pehtlai mi thawngpang thar kan zulh dawi lio zong a si.

 426 total views,  1 views today

This function has been disabled for Chin 11 News.