Hakha Le Thantlang Karlak Ah A hohmanh Khualtlawn Lo Ding

Thantlang khuami a tam deuh an zaam, Thantlang-Hakhar kar lamli lo ding ralrin pek

Chin Ramkulh, Thantlang khuapi chung le pawngkam hrawng kahdohnak a chuah ca ah khuami a tam deuh cu a him nakding hmun ah an zaam i, TRC nih Hakha le Thantlang kar khual tlawn lo ding le i chawhleh lo ding in mizapi sin ah ralrinnak ca mizapi sin ah a tial.

Thantlang khuapi chung ahhin August 25 ah a voi khatnak cem a chuak i September 7 ah aa thok than tiah CDF – Thantlang nih cathanh an chuah mi chung in theih a si.

Thantlang khuami pakhat nih, “Khuachung i kahdohnak a chuak hnu khuami a tam deuh hi cu mahle chungkhar himnak a si lai ti ruahnak hmun cio ah zaam dih a si. Khua a hlum mi hi kan tlawm deuh cang,” tiah a chim.

Cun, Thantlang le Hakha kar kong he pehtlai in TRC nih, “Thantlang le Hakha kar ah mizapi nan him khawh nakhnga i chawhleh rih lo ding,” tiah Facebook cahmai in mizapi sin ah ralrinnak ca a tial.
Thantlang khuachung i SAC mithat phu nih bomb thlak ruang ah kum 15 ngakchia telh in minung pathum an nunnak a liam, hliam a tuar mi an tam. Cun, khuachung kahnak ruang ah inn pakhat zong ciam dihlak in a kaang. Hakha le Thantlang kar lam zong ah SAC mithat le CNA/CDF ralkap kar kahdohnak a chuak pah tawn. SAC mithat lei zong tampi an thah khawh hna.THP