Hakha Le Thantlang Kar Ah Motor Accident In Minung Pakhat Nunnak Liam

Hakha le Thantlang kar Pialva pawng ah motor aa let nutung pakhat a thi.
Hakha le Thantlang kar, Timit in meng khat tluk Pialva pawng ah Light Truck motor December 6 chun 10:00 hrawng ah aa let i Haiphai khuami Pi Tum Kil a thi.

“Kuhchah ah anmah motor in ruakhumh ah an kalnak ah lamthlang ah an i leh hi a si. Zeiruang ah an motor aa leh hi hngalh a si rih lo. A mawngtu hi Benjamin a si i, a thi mi hi a nupi a nu (a pi) kum 48 minung Pi Tum Kil a si,” tiah Hakha sii-inn tuanvo ngeitu pakhat sin in kan theih.

Benjamin zong hi a lu le a hmai, cun a tak pum zong aa khawng nain a lung cu a fim ko. Asinain motor cung ah aa ciit mi hi anmah pahnih lawng an si ca ah thawng fiang theih a har rih tiah a cunglei sin in kan theih.

Hi thawng he pehtlai in micheu nih “Hakha Timit ah ngakchia December thla thar don ah a kal mi motor aa let i ngakchia a tlawm bik pali an thi,” tiin a thei mi an um. Cucaah The Hakha Post nih Timit ah hlathlainak a va tuah i cubantuk thawng a um lo.

“Kanmah Amazon Private sianginn zong phone in minung tamtuk nih an rak kan chawnh, ‘nan sianginn ngakchia an si tiin’ thawng kan theih i kannih sianginn kan si lo, kan lungre a thei ngai,” tiah Amazon in Sayama nih The Hakha Post ah a chim. Credit: The Hakha Post. Photo: TCP 

 

 191 total views,  1 views today

This function has been disabled for Chin 11 News.