Hakha Khuapi Cu Ralhrang Ruangah Christmas Le Kum Thar An Tuah Kho Lai Lo

Hakha Christian Minister’s Fellowship Nih Tukhum Christmas Le Kum Thar Cu Hlunghlai Ngai In Tuah Lo Ding In An Thanh!

Tukum 2022 Christmas le Kum Thar cu hlunghlai tuk in tuah lo ding in Hakha Christian Minister’s Fellowship(HCMF) nih cathanh an chuah, tiah theih a si.
An cathanh chungah tukum Christmas le Kum Thar cu voidang bantukin tuah a si lai lo. Hlunghlai te le nuam tein Christmas le Kum Thar kan tuah khawh lonak kum 2 a si cang. Dohthlen lio caan a si caah kum dang bantukin sunglawi tuk in tuah khawh a si lai lo, tiah an langhter.

Pumhnak le Pathian thangṭhatnak he Biakinn ah tuah cio ding a si lai. Sang le veng ah sathah le mibu piin rawl dumṭinak tuah a si lai lo. Mah le siarem ning in Biakinn chungah ṭamhnak tuah cu kan onh, tiah cathanh an chua

Cu pinah Biakinn leng vialte ṭamhnak tuah lo ding le Biakinn hmai signboard lawngah ṭamhnak tuah ding a si lai. Cu ṭhiamṭhiam in mah le inn cio ṭamh a duhmi zong nih inn tual ṭamh khawh a si lai lo, inn chung lawngah ṭamhnak tuah a si lai.


Dohthlen lio caan a si caah Pathian thangṭhatnak tu in Christmas le Kum Thar cu tuah cio a si lai. Hi cathanh kan chuahmi hi Hakha mizapi nih nan zulh cio naklai kan in nawl hna, tiah an langhter.

Relchap>>>>>Lungrualnak In Teinak Ah
===================
SAC ralkap cu nawlpeknak pakhat tang i an um caah lung i rual lo bu zongin an i funtom kho. Chinram dohthlennak ralkap hna hi nawlpeknak pakhat tangah kan um khawh lo caah i lungrual kan herh tuk. Nawlpeknak pakhat tangah um cu ahopaoh nih kan duhmi a si nain atu kan dirhmun ah cun a si kho lomi a si.
Asinain thachiat ding a si lo. A ruang cu nawlpeknak pakhat tangah um lo bu zongin kan hmuitinh ah lung i rual khawh a si ko.

Mirang phungthluk ah “Maimomh hmanh nih an i lungrual ahcun Chiandeih zong an hren khawh (When spiders unite, they can tie down a lion)” ti a um. Dohthlennak ralkap hna kan i lungrual ahcun kan thiamnak le hriamnam hme hmanh seh law uknak ṭhalo hi kan tei khawh ko.

Lungrual timi cu ruahnak le hmuhning i khah viar khi a si lem lo, hmuhning le ruahnak i dan buin rianṭuanṭi khawh hi LUNGRUAL cu a si.
Chinram ah pengtlang hoih in hriamtlai kan um cio i kan ruahnak le hmuhning aa dang liangluang ko lai. Asinain thil pakhat ah surlu bang kan i funtom dih ko. Cucu uknak ṭhalo tei a si. Zeiruangah dah tangka kan thawh? Zeiruangah dah hriam kan tlaih? Cucu kan i fian cio mi a si.

Atu i kan dirhmun cu kan Laiholh i “Thlan kam ah dir/thih ri le nun ri ah um” timi kha a si. Thlan kam ah kan dir bu hmanh in kan i lungrual khawh lo ahcun Chin miphun nih kan ca le holh chungin LUNGRUALNAK timi biafang hi kan hlonh a hau hnga!

Nihin ah cun uknak ṭhalo tei ding hi i hmaithlak cio ko usih. A tei hmanh kan tei hlan ah tei hnu i covo le umdan ding kong ruah len a hau lo. Uknak ṭhalo hi kan tei hmasa a hau. Kan tei hnuah a simi paoh si te ko seh.

Kanmah le kanmah kan i doh zong a si kho, kan tei hlan nakin kan buai deuh zong a si kho. Asinain cucu a si rih lomi an si, a si khomi lawng a si. Atu i kan ton cuahmah mi le a tak in a cang cuahmah mi tu hi i hmaithlak phot ko usih. Kawl nih “A hnu i buainak cu a hnuah tuahremh ding a si (နောက်ပြသနာ နောက်မှရှင်း)” an ti bantukin kan tei hnuah a cangmi cu kan tei hnuah tuahremh ding a si ko lai.

A cang cuahmah mi hmanh kan tuahremh khawh rih lo lioah a cang rih lomi kong i kan buai ahcun zeitindah lohma a kal khawh hnga! Hmailei ca cu ruah phung, tuaktan phung a si, asinain thaizing ca na ruah tuknak ah nihin na rian tlolh ding a si lo.

BC chan lio i Latin caṭialthiam Publilius Syrus nih “Lungrualnak a umnak paoh ah teinak a um zungzal (Where there is unity there is always victory)” tiah a rak chim. American ramkhel thiamsang Thomas Paine zong nih “Milu zat ah si loin kan lungrualnak ah kan ṭhawnnak cu a um (It is not in numbers, but in unity, that our great strength lies)” tiah a chim ve.

Lungrualnak kong cu tampi chim len a hau lo, a ṭhatnak kan theih dih. A ṭhatnak kan theih cio ko caah a tak in i rual cang usih. Hmailei ah zeidah kan lawh lai ti chim khawh a si lo. A zungzal in lungrual khawh zong a si fawn lo. Asinain tutan khuapau dohthlennak ah kan lung aa rual ahcun kan miphun tuanbia aa thleng hrimhrim lai ti tu cu ka chim ngam.
Salai CP Lian
CEO, The Chin Post

Be the first to comment

Leave a Reply

Your email address will not be published.


*