Hakha Khuapi Chung Ah Hmankhawh A Si Ti Lo Mi Sii Tamtuk An Tleih Hna

Chin ram chung ah ei-din le sii-ai lei tuanvo ngeitu zung riantuan hna nih Hakha khuapi chung ah sii an zuar mi hna pawl cu zohfel nak an ngeih piak hna hnu ah hman khawh a si ti lo mi, a ni-thla luan cang mi (expired) pawl hi Ks ting 186400 man kan tleih tiah Chin ramchung ei-din le sii-ai lei tuanvo ngei lutlai a si mi Daw Mon Mon Khine nih cun a chim.

“A ni-thla luancang mi hna pawl an zuar mi hi cu dantat nak kan ngeih hna lai le ngeih hna lai lo kan ceih rih lo. Atu lio ah cun sii zuar mi kip nih phungning loin sii an zuar maw, license a ngei lo mi le hmawngkhu in an siam mi sii pawl hna an zuar chih maw, cun kanmah ngandam nak lei nih cathanh kan chuah ning in sii an zuar maw ti hi a bik in kan zohfel mi hna a si.

Nihin ah kan theih mi sii a si-thla luan cang mi (expire) hi cu mei in kan khangh dih cang hna.  Hi bantuk in a ni-thla luan cang mi le zawtfah tikah hman khawh a si ti lo ding mi sii an rak zuar mi hi cu sii a zuar mi hna dawr ngeitu pawl daithlan ngaingai ruang ah a si ko” tiah Dr. Mon Mon Khine nih cun a chim.

Cun Dr. Mon Mon Khine nih achim rih mi cu “sii-ai a zuar mi vialte kan zohfel (check) dih hna lai i an sii zuar mi a hman le hmanlo kan zoh lai. Ei-din zuarnak, facang le ei khaw a si mi poah a zuar mi hna pawl zong kan zohfel dih hna lai” tiah zong a chim.

Source: Chin World 

 272 total views,  1 views today

This function has been disabled for Chin 11 News.