Hakha Khuapi Ah Ralhrang Nih passport zung An On Hnu In A Hngak Tu An Tam Taktak

Hakha Khuapi Ah Ralhrang Nih passport zung An On Hnu In A Hngak Tu An Tam Taktak

January thla thawk ah Myanmar ram pumpi huap um passport zung hna ah ni rikhiah um loin khar a si hnu ah, February ni 24 in passport zung hna cu an hon ṭhan.

Chin ramkulh, Hakha zong ah February ni 27 thawk in passport tuah a duhmi hna nih nikhat a hlankan in catlap laak a si i, nikhat ah minung 100 tiang an cohlan tiah theih a si.
Passport chuahnak zung ah cun zarhtin cacawn nikhatni in ningani tiang cozah zungkhar a um lo ahcun caankel tein passport tuahkhawh a si tiah kan theih.
Chin World

Relchap>>>>>Chaung U Peng Khinmon Khua Ah SAC Ralkap Hriamngan An Thlah Caah Tualchung Mi 2 Nunnak Liam

Sagaing ramṭhen, Chaung U peng Khinmon khua cu SAC ralkap nih March ni 3 ah hriamngan thlah in an luhhnawh hna caah tualchung mi minung 6 nih hliamhma an tuar, cu chung ah minung 2 cu an nunnak a liam tiah tualchung mi hna nih an chim.

Monywa in rallam sial ah a chuakmi SAC ralkap minung thazaang 150 hrawng cu tualchung hriamtlai phu nih an doh hna hnu ah, SAC ralkap hna cu Khinmon khuachung ah an lut tiah tualchung mi pakhat nih a chim.

“SAC ralkap nih an thlahmi hriamngan cu tualchung mi hna umnak inncung ah a tlak caah minung 2 an nunnak a liam, hliamhma tuarmi hna zong an hliamhma a fak. Tualchung mi hna cu an dihlak in ral an hrial, nunnak liammi hna nih Daw San Kyi (kum 60) le U Phoe Min(kum 50) hna an si” tiah a chim.

Khinmon khua cu inn 1500 hrawng khuasaknak khua ngan pakhat a si, inn 10 hrawng khanghpiak an tong, tualchung mi 6,000 hrawng ralhrial in an zaam tiah theih a si.
RFA