Hakha In Falam Lei Ah Motor Cycle Khualtlawng Kal Mi Cu Ralkap Nih Meithal In An Kah Hna, Khuami Naupawi Mi An Kah Chih

Nihin zing suimilam 10:00 hrawngah Hakha lei in motor cycle pathum cu Falam peng Lungpi khuachung an phak hlan ah, ralkap nih a lang in hmanbilu an i bih hna i, Lungpi khuachung, an rak luh bak ah Ralkap nih hnipuan dum a hruk mi motor cycle cu meithal in an kah. Asinain an mah khen loin khuachung mi nutung pakhat tu an khen , meithal i an khen mi nu hi naupawi liomi a si i a rannak in sizungah an tlikpi i a tutiang ahcun a tha ko rih tiah thawng theih a si.

Ralkap nih meithal i an kah nak hna hmun hi tuzing i ralkap i meithal i an kah i a nunnak a liam mi Pi Ngeih Tling te inn hmai a si . a tuzing kahnak a um ti theih in hmundang i a va zam i, kahnak le meithal thawng a dai cang tiah inn lei a van fuhmi naupawi liomi nu cu meithal in an kah hi a si.

Nihin cu nikhua a that caah ralhrang pawl nih hmunkip hmanbilu in an zoh, a choklet mipoh tha tein an ngiat hna. Dawr ah thil cawmi a lut chuak an um pah caah Miakpi in cu dawr minung umnak cu an kah. Mipi cu an lautuk i inn chungah an i nawk dih colh. Mino pathum nih an tih caah an zaam i an dawi colh hna, an hnu lei in meithal in an kah thluahmah hna tiah theih a si.

Caan sau hmanh rauh hlan ah mino 5 a chok mi cu ralkap nih an tlaih hna i an kalpi hna, asinain a rauh hlan ah an dihlak in an thlah dih hna. Tuni cu zing in zaan lei sang tiang khuachungah Bomb an puah meithal an puah i khuachungmi cu thir le phang in an um hna tiah theih a si.Kokek Journal