Hakha Ah Ralkap Nih Meithal An Puah, A Sinain Mipi Nih An Tih Nemmam Lo!

Pasaltha Nusaltha tampi kan ngei, nihin Hakha Boruak nih Chin Thisen van ah a cawi chin ka ti Kawlram chung hmuntam pi ah Police le Ralkap nih tharung an hman, meithal an puah, mibu an kah hna, Mandalay ah thisen a luang, Rangon ah tlaihkhih nak an tuah i mibu thenthek an i zuam. Ralhrang nih Meithal he mibu an kulh hna, Mibu lei zong raltha tein au cuahmah asi.

Hakha zong ah Ralkap nih Meithal an puah, Water cannon an hman i mino pawl thenthek an i tim ve. Hakha mino/mibu cawlcangh ning, an raltha ning le thildik ah thih ngamh in an dir mi ka hmuh tikah kaa lawmhnak mithli a luan. Ka hnarno ruh a ttam i Chin thisen ciammam, kan pupa Chan ah Chin miphun cu miraltha an si timi kha nihin ah a tak in a lang ka ti. Police/Ralkap lei nih Meithal an puah, Water canon in an kah hna nain minung pakhat zong hnu an pil lo, lungrual tein an au i hmai ah an fong chinchin.

Police le Ralkap nih Hakha mino rual, Sandah piahtu mibu an hrocer hna bak in inn ah mizei hmanh aum sawhsawh kho ti lo. Chikhat ah Hakha zalam pi ah an chuak lulh cio. Sandah piahtu mibu cu a let in an karh colh i an i dirkamh dih colh hna. Thisen thap in rampi damnak, zalennak le a dik mi hruainak a chuah khawhnak ding ah tiah mino tampi nih lam zawh in nihlawh tamtuk an pek cang.

Cozah rianttuan tampi nih an dirkamh hna i CDM ah an i tel cuahmah. Kan nulepa, kan putar tiang in zalam ah an chuak. Hi tluk in thisen le nunnak thap, nicaan vialte kal tak in dinnak, diknak le zalennak an au pi lio ah zeitin dah capo cu kan chim ngam lai. Zeitin dah kan thut sawhsawh khawh ve lai. Kan ti khawhnak lam paoh in kan dirkamh ve hna lai.

Mino tampi, kan Chin mipi tampi nih thisen thap in hmai an kan hruai lio ah zeitin dah Ralkap Cozah pek mi nihlawh men ruang ah zung cu kan kai ngam lai. Dinnak a chuah i zalennak kan hmuh colh tikah kan hawi thisen hmai kan khah tung lai lo. Raltha tein, thisen thap in hmai an kan hruaitu ka dawtmi unau nupa dihlak upat kan pek hna. Photo: The Chinland Post/ Catialtu: Salai Cung Dawt