Hakha Ah Inn Kanghnak A Tongmi Chungkhar Hna Le Inn Hlaangtu Hna Bawmhnak An Pek Hna

HRC nih Hakha inn kaang innngeitu le innhlangtu tangka bawmhnak pek. Hakha Rescue Committee (HRC) nih 2020 October 11 ah Hakha Chin Oo Si, Nazareth Sang, Saya Ngun Lian inn (a hlangtu Pi Sui Tin) cu a kaang i inn ngeitu tangka Ks.500,000 le innhlangtu Ks. 200,000 bawmhnak an pek hna, tiah kan theih.

“HRC nih kan si khawhtawk in bawmhnak kan pek mi hna a si. Tukum chung ah hin Aive inn kaang, Chuncung inn kaang, Phai inn kaang le Cinkhua ah thli nih inndi a hawh mi zong kan tikhawhtawk in bawmhnak kan pek hna,” tiah HRC in Pu Chan Hrem nih The Hakha Times ah a chim.

Hi inn kaang mi hi TV plug in aa thok mi a si. Hakha Peng Meithat Zung nih caantanh in kan phalh manh i innpa inn a tlaih manh lo, tiah Hakha Peng Meithat Zung Lutlai Pu Thian Nuam Maung nih The Hakha Times ah a rak chim bal.

2020 kum fuurpi chung, Hakha Peng ah inn kaang hi voi 5 a cang cang. Aive khua ah voi khat, Phai ah voi khat, Chuncung ah voi khat, Hakha ah; Thingram Zung pawng, Pehtlaihnak Zung pawng le Chin Oo Si, Nazareth Sang tiin voi 5 tiang inn kaang a cang, tiah kan theih.

#Photo: HRC

Note: Hi thawngpang hi Hakha Times Daily Newspaper ah kan lak chin mi a si.