Chin ramkulh Tedim peng ,kalay lamzin tluan Hiangzing khua ih umhmun khuar ralhrang ralkap pawl cu CDM Siyin, PDF Zoland, CNA, Kalay PDF tatyin 3,8,9, PDA, Zongam Army le CDF KKG pawl in tuini January 21, zinglam 1:45 hrawngah an do ih, ralhrang 15 an thi tin doawknak ih tel CDM Siyin cun thusuah in mipi theihternak an nei.
CDM Siyin cun “Kalay le Chin ramkulh pehtlaihawknak lamzin tluan Hiangzing khua ih umhmun khuar ralhrang ralkap pawl cu January 21, zinglam nazi 1:45 hrawngah kannih CDM Siryin, PDF Zoland, CNA, Kalay PDF tatyin 3,8,9, PDA, Zongam Army le CDF KKG pawlin kan do ih,ralhrang 15 an thi. Ralhrang hriamtuar tampi an um ih,kannih mipi humhimtu komkhawm lamin hriamtuar 2 an um nan,an besia lo,” tin mipi theithernak an nei.
January 13 in Tedim le kalay lamzin tluanah ralhrang ralkap le mipi humhimtu komkhawm pawl an do aw zo ih, tu cun zarh khat leng a kai. Tu ah ralhrang pawl cu kalay phunsang tlawngah mipum an finkhawm aw rero ih, hlaral kahnak ralthuampi 2 khal Kalay phunsang tlawng sungah an ret zo tin kiangkap mipi cun an sim.
Tuizing January 21 khalah Kalay phunsang tlawngih umhmun khuar ralhrang ralkap pawl cun hlaral kahnak ralthuampi in Chin ramkulh Tedim peng sung cu ralthuampi in vei 7 tluk an kap.
Zarh khat leng Tedim le kalay lamzin tluanih mipi humhimtu le ralhrang ralkap pawl an doawk hnuah doawknak a dai thei hrih lo ih, mipi cu Kalay le Tedim lamzin tluan feh hrih lo dingin simthan rero an si. Khatlam ah Falam in Kalay lamzin khal a him hrih lo ih, Tamu le Kalay karlak lamzin khal zan sim hnuin zingkham khawvan hlan tiang feh hrih lo dingin mipi theihter an si.
Leave a Reply