Myinmu ah PDF nih Tank 1 an rawk, ralkap 20 leng hliam fak tuar
Sagaing ramtthen Monywa khuapi in a ra mi Tank 3 cu mipi vengtu ralkap phu fonh nih an rak kah hna caah Tank 1 ai rawk i ralhrang 20 leng fak ngai in hliam an tuar tiah PDF nih an langhter.
Myinmu peng i tuzing suimilam 8:00am hrawng i SAC ralhrang Tank 3 lak ah 1 a hrawktu mipi ralkap hna cu Sagaing PDF batallion (1), Chaung Oo FRF, Chaung Oo CRA 2, Black Eagle Defense Force – MMU phu 4 fonh nih an kah hna tiah Sagaing PDF battalion (1) nih an thanh.
Cun tuzing suimilam 8:00am hrawng tthiam ahcun Chaung Oo le Myinmu lampi ah SAC ralhrang pawl cu Farmers Revolution Force hruainak in Black Eagle Defense Force, Chaung U Revolution Army le Zarmini MMU fonh hna nih landmine an rak puah hnawh hna caah ralhrang lei in minung 20 an thi tiah Black Eagle Defense Force nih an thanh.
Relchap>>>>>Karenni ram ah Dalan tiah lunghrinh i tlaihmi 24 an thlah hna
Karenni ram ah ralhrang thawngpetu Dalan tiin lunghrinh ruangah rak tlaih mi hna cu tuchung May 26 ni ah thlah tthan an si tiin KSCC nih an langhter.
Karenni ram ah Dalan ti i lunghrinh ruangah tlaih mi 126 chung ah minung cio zangfah zawnruahnak he minung 24 cu biakamnak tuahter hnu ah thlah an si.
“Tha tein kan hlathlai hna, bia kan hal hna hnu ah hi hna cu zei sualnak ngaingai hmuh an si lo. Cun sualphawt in thongthlak hmanh si hna sehlaw kan tlaih hna chung a sauh cang caah an thong in an chuah caan hmanh a tling cang men lai caah tutan ah zawnruahnak he kan thlah hna hi a si” tiah KSCC in chimnak nawlngeitu nih Myanmar Now sin ah a chim.
Tutan ah an thlah mi 24 hna hi thla hlawh ei, ni ca in siseh a cozah rianttuan an si hna, dawr tuah mi zong an um, 80% cu Naypyidaw, Mandalay ramtthen, le Magwe ramtthan in an si hna, 20% tu hi Loikaw khuasa an si tiah a chim chap.
An tlaih mi hna hi an sining ai khah lo caah a cheu cu thla 2 , a cheu cu thla 1 lawng zong kan tlaih mi hna an um tiah a langhter.
A tang rih mi 102 chung ah hin cun Dalan zong an um, misual zong an um, cun SAC ralkap a cohlang tu an miak nak ding ah rian a ttuan piak tu zong an um hna, mi fir zong an um, rithaisi a zuar mi zong an um hna tiah a chim chap.
Dalan tiin lunghrinh in tlaih mi cheukhat cu an hlathlai hna i an sual kan hmuh lo cun ni 3-4 hnu zong ah kan thlah tthan mi an um ko tiah a chim.
“Ralhrang lei ah an dir ahcun mipi kan mah le mah kan i thah tluk a si. Ralhrang lei ah a dir, rian a ttuan ahcun kan tlaih ko hna lai, phungning tein sualphawt an si ko lai tiah KSCC in chimnak nawlngeitu nih cun a chim.
Ref; Myanmar Now
Leave a Reply