Good News: Mipi Ralkap Hna Nih Ralhrang Sakhan Le Palek Sakhaan An Kah Hna

Good News: Mipi Ralkap Hna Nih Ralhrang Sakhan Le Palek Sakhaan An Kah Hna

Kachin ramkulh, Mohnyin peng Mohnyin Myoma palik sakhan le SAC ralkap sakhan 2 cu kah an ton caah SAC ralkap 2 an thi, tiah Mohnyin PDF in ṭuanvo ngeitu pakhat nih a chim.

March ni 7 zing suimilam 5:00AM hrawng ah SAC ralkap sakhan, Khah Lah Yah 15 le Mohnyin palik sakhan cu KPDF, KIA-PDF hna i bawm in an kah caah ralkap tam tuk hliamhma an pu, sakhan chung ummi ralkap 2 an thi, tiah theih a si.
Cu kahdohnak ah PDF ṭangṭi phu lei in a thimi le aa hliammi kan um lo. Kahdohnak hi zeitik caan paoh ah a chuak khomi a si caah mizapi nih umkal i ralrin le SAC ralkap an umnak pawngkam ah um lo ding in Mohnyin PDF nih ralrin peknak an tuah.

Cu pin ah Mandalay ramṭhen, Taungthar peng Chaungsone khua ah umhmun a khuarmi SAC ralkap cu drone in bomb thlakhnawh an ton caah 2 an thi, tiah Myingyan Battalion 4 Natogyi PDF in ṭuanvo ngeitu pakhat nih a chim.
March ni 6 zanlei suimilam 2:00PM hrawng ah SAC ralkap 35 hrawng nih umhmun an khuarnak cu PDF ṭangṭi phu nih drone in bomb voi 3 an thlak caah 2 an thi i, 2 hliamhma fak ngai an pu, tiah theih a si.

Cu kahdohnak ah Myingyan pengkomh Battalion 4 Natogyi PDF, Myingyan District Drone Strike Team hna i bawm in an kah hna. SAC ralkap nih an kah ve ko hna nain ṭangṭi phu lei in a thimi le hliamhma pumi an um lo, tiah theih a si.

Relchap>>>>>>Eidin le bawmhnak tangka pek a tlawmnak Banladesh ram um Rohingya hartongmi hna cu bawmhchanh khawhnak ding ah dollar nuai 876 a herh, tiah Office of the United Nations Resident Representative for Refugees nih March ni 7 ah an langhter.

A luancia kum zong ah dollar nuai 553 lawng an co i an herhmi zat nakin a tlawm tuk. Hi bantukin pekchanhnak a tlawm tuk cang caah WFP nih March thla thawk in hartongmi Rohingya ca ah bawmhchanhnak a zor ngaingai, tiah theih a si.

Rohingya bawmhchanhnak a tlawm tuk cang caah nikhat hnu nikhat in harnak an tong chin lengmang. Hi nak fak deuh in harnak an ton hlan ah ramkip um bawmchantu hna nih bawmhchanh ding in UN-Banladesh aiawhtu nih a chim.

Rohingya mi hna cu an umnak camp pin ah ah va chuah in rianṭuan a ngah lo i bawmhnak pekmi lawng an din-ei caah harnak an tong. Nun duhdim deuh in um khawh ding ah rili tan in ramdang ah kal aa timmi Rohingya 200 tluk zong an nunnak a rak liam cang, tiah theih a si.Crd.. TCP

Relchap>>>>>>