“Gone With The Wind” Chan An Phan

“Gone With The Wind” lenhloi cu Margaret Mitchell nih 1936 hrawngah a rak ṭialmi si an ti. A ṭialmi kong belte 1860 lawnhka hrawng US ram chung Chak le Thlang ral an rak ituk in ral a daihka hrawng tiang kong khi a huap. American Civil War cu sal zuat duh Thlanglei pawl le Sal zuat ti lo ding titu mifim deuh Chaklei pawl rak ituknak ral a rak si.

Abraham Lincoln an rak thah lio chan hrawnghrang zong a huap. “Gone With The Wind” ah cun Minak sal pawl Lincoln nih luatnak a rak pekka hrawng an buai ning a langhter. An rak luat ka ah, sal pawl cu an rak inuam tuk. Vunrang bantuk cun a pumh zong an rak ipum kho lai lo. Cawnpiaknak ṭhaṭhi zong cu an rak ngei lai lo.

An von luat bak cun saram tlon in an tlong ko hna ti awk khi an rak si. Nu an hmuhmi khi an dawi hna i saram bang an va raih ko hna. Lincoln nih sal luatnak a rak pek i thangṭhat cu a rak si nain, a rak tuartu Vunraang an rak tampi ve. Zabu 21 luhka tiang Chicago tbk khuapi chungah cun, zanlei a von muih hnik khin cun ichawh ngam si lo, an rak ti.

Nu le bang, an tlaihhrem lio hmuh ko zong ah hohmanh nih an chanh ngam hna lo. Palik zong daidep an um. Asialei mi khualtlawng le cacawng pawl nih cucu iralrin dingin an icawnpiak tawnmi a rak si. Trump chan Minak thin phawh, puahnak a chuah cu a van zong a chia. A fim lo chinchap le zeiti tawlrel aa thiam ve lo.

Mifir, inn baoh, inn khangh, motor duah, thil den le cozah ta hrawh cu tam ngai dawh si ko. Social media i a hung kaimi video pawl hmanh ah zohchia kho taktak khi an si. Trump nih China ai soi sual i a lo cikcek. Xi tawpherh hmanh a tluk lonak a lang.

Tutan George Buainak ah, tlaihhrem, hmuhmi nu paoh dawi, mi thah le lainawn belte kan thei tuk rih rua hna lo. “Gone With The Wind” chan nakcun an fim deuh cang tinak si men lai. Uktu ṭhalo chan ah cun ram cu a dai bal lo. Uktu ṭha le fim nihcun misual puarthaunak zong an daihter khawh.

Donald Trump khi Khrihfa kan Bible cu ai tlaih ve i hman ai thla tawn. Nain, Bible a rak rel taktak lo ti a lang. Phungthluk bia ah uktu ṭha le ṭhalo kong tehna aa tel. Fimnak le hruhnak aa dannak aa tel. Zei dang rel loin mi hmai ai tlaih tawnmi Bible lawng hmanh khi rel taktak sehlaw cu, a ram cu dai tein a hruai khawh ko hnga. A tar hnu ah politics thurhhnawm idea ai hruhpi sual i a poi ngai. Rome chan si ti lo. Machiavelli tehna chan si ti lo.

Tutan George Buainak zong cu conspiracy theory phun rumro in ai la. A herhlo i conspiracy theory ihruhpi cu molh phun khat a si. US rammi dihlak caah an thimmi hruaitu a si aa hngal rih lo. Republicans pawl ca lawngah hruaitu si aa tim. Ram hruaitu nih khi bantuk phun party lungput an ngeih tawn ruangah cheukhat ram ah cun, ram hruaitu i an thim hna hnu cun an party cu an hlawtter tawn hna. A term dih lai tiang a dirhmun aa hngal lomi Trump a si caah si lai, Lai reps pawl nih Vom tiah an rak saknak khi.

Catialtu: Salai C Alexander

 158 total views,  1 views today

This function has been disabled for Chin 11 News.