George Floyd A Tthattu Pa, Derek Michael An Tleih Cang: By Zasang Cinzah

George Floyd a tthattu pa, Derek Michael Chauvin cu nihin zinglei suimilam 11 ah an tlaih cang. Third degree lainawng in sual an phawt. Anmah Ninnesota ramkulh phung ning cun Third Degree lainawng hi a tambik kum 25 tiang thongthlak khawh a si an ti. Kum zeizat thong dah an pek lai hngalh a si rih lo.

Third Degree Lainawng cu, “itimh loin minung thah sual” ti hi “Third Degree Lainawng” tiah an auh. Palek officer, Derek Michael Chauvin sualphawtnak hi Floyd chungkhar nih an lungtling lonak an langhter colh. A za naisai lo an ti.

Derek Michael Chauvin nih Floy a hngawng in a rial chung hi minutes 8 le second 45 bakte a si. A hawi officer dang pakhat nih “kan leh a ttha hnga maw” a ti ko nain, Derek nih “No’ staying put we got him” a ti. A fawinak in chim ahcun, a duh lo.

George Floyd cu Derek nih a rial chung ah a col ti lo. A col ti lo caah officer dang, J. Alexander Kueng nih a thaw cu a check. “A thaw a chuah ka hmu ti lo e” tiah J. Alexander Kueng nihcun a chim. Asinain mah tiang ahkhan Derek nih a rial chih peng rih.

George Floyd a nunnak thaw a cah hi a col ti lo hnu in minutes 2 le second 53 chung ahhin a si tiah sualphawtu nih an langhter. Nihin tiang ahcun Derek lawng cu an tlaih. A hawile pathum zong hi tlaih chih viar dingin mizapi nihcun an au hnawh hna.

 208 total views,  1 views today

This function has been disabled for Chin 11 News.