Gangaw Peng Kahdohnak Ah Ralhrang Minung 4 An Thi

Gangaw Peng Kahdohnak Ah Ralhrang Minung 4 An Thi

Magway ramṭhen, Gangaw peng Saidu khuachung ah a lut i khuami thilri a firtu SAC ralkap hna cu, drone in bomb thlak hnawh an ton caah 2 an thi, tiah Hyper UAV Force sin in theih a si.

March ni 5 zinglei ah Gangaw khua Khah Lah Yah 50 in Battalion in ralkap nih, hriamngan le hriamhme he an kah hnu ah khuachung ah an lut i inn khat hnu inn khat in khuami an thilri cu an firpiak dih hna. Zanlei suimilam 5:00PM tiang hrawng an fir i, thilri cu leilawng nih a kalpi, tiah theih a si.

Khuami thilri a firtu SAC ralkap hna cu drone in Hyper UAV Force in bomb an thlak hnawh hna caah 2 an thi i 4 nak tlawm lo hliamhma an pu, tiah theih a si.
March ni 6 zong ah Gangaw khua Khah Lah Yah 50 in SAC ralkap nih Saidu khua lei ah hriamngan an kah, tiah theih a si.

Cu ṭhiamṭhiam in Mandalay ramṭhen, Minygyan peng Myingyan-Semihkone lam ah SAC ralkap motor bomb puahhnawh an ton caah ralkap 2 an thih pin ah motor pakhat a rawk, tiah Naungyu Special Guerrilla phu in ṭuanvo ngeitu nih a chim.

March ni 5 zan suimilam 11:40PM hrawng ah Kyi khua ah umhmun a khuar i Myaung peng chung ah rallam a sialmi SAC ralkap cu, Kadaw le Wyashi khua kar ah PDF nih hmanhmi bomb lung 5 in puah hnawh an ton caah ralkap 2 an thi i leilawng pakhat a rawk, tiah theih a si.

Cu kahdohnak ah Myingyab No.6 Battalion, Companny 1 Naungyu Special Guerrilla le Myingyan pengkomh Battalion 1, 27 Revolution Force ṭangṭi phu hna i bawm in an kah hna i anmah lei in a thimi le aa hliammi an um lo, tiah theih a si.
Crd.. TCP