Floyd Cu “Big Gentle Giant” Tiah A Min A Thang

By Sazang Cinzah

Nihin News outets ah ‘Big Gentle Giant’ timi a tam ngai. Floyd cu “Big Gentle Giant” tiah a min a thang. ” Giant” biafang nih khua ka ruahter ngai. Zeicatiah, nihin kan Vawlei ah a cang cuahmah hna hi Bible he a pehtlaihmi lawngte an si.

Floyd a thihnak nih USA ram lawng siloin Vawleipi a hnin. USA ram khua 150 ah sandah an piah. Europe, Canada, le Australia tbk zong ah an rak au lulh cio. ‘Big Gentle Giant’ thihnak nih Vawlei pi a khuh, ti khawh a si.

Floyd hi Pe 6 le Lehmah 4 a sang. Mi ngan taktak a si. Cucaah, ‘Big Gentle Giant’ tiah an auh. A chungkhar hna nih “GoFundme” an tuah colh i USD Millions 13 hlei ($13,285,200) a chuak cang. A chuak chin lengmang lai. T-Shirt Anki le Poster kip ah ‘Big Gentle Giant’ hmanthlak cu an tar. ‘Big Gentle Giant’ upatnak ah tiah Vawlei ah minute 9 an bawk. An dawtnak le a zuun an ngaihnak cu a phun phun in an phuan cio. Criminal pakhat kha over-night in Hero ah a cang ko. A mak.

Tulio hi CoronaVirus nih Vawlei pi a tuam lio a si. Ting 4 dengmang (397,411) an thi cang i, US lawng ah Ting 1 le thong 5 an thi cang. Hi vialte minung a thimi hi an dawtmi hna nih ttah le tthutpi ngam loin an phum cio hna. Thih lak ah thih fak taktak in Ting tampi an thih lioah ‘Big Gentle Giant’ cu a sunghlawi taktak. Khuaruahhar a si. Princess Diana a thih lio hna kha mitthlam ah a cuang.

“Giant” hi Bible ah zeitindah a chim? Genesis Account zoh tikah “Giant” tiah khawhmi cu mithawng le minthang/ Hero an si. Pathian fapa le minung fanu hna nih an hrinmi, mixed ci in a chuakmi an si i, “nephilim” tiah hngalh an si. Bible Scholars cheukhat nihcun Pathian fapa timi hi, fallen Angel/ lucifer le a zultu hi an si lai tiah an zumh. Cucah, Noah buanchochuk zong hi mixed in a chuakmi “nephilim” ci hlohnak program a si kho tiah a zummi an um. Zeicatiah, Pathian sermi minung ci, DNA kha, Lucifer nih mixed ci/ Nephilim DNA in a thur hnawmh hi a duh lo caah a si kho tiah an chim.

Noah Buanchochuk hnu zong ahkhan “Gaint” hi an lang tthan lengmang. Joshuah le a ralkap zong nih an hmuh hna. (Number 13:33). Pathian nih nu le ngakchia zong nan zuah hna lai lo. Nan thah viar hna lai a timi kha, Nephilim ci hmihnak a si hnga maw tiah a ruatmi an um. Giant mi nganpipi hi David le a ralkap kut in pali (4) an thi.(2 Samuel 21:16-22).

“Giant” tiah a min a thangmi a thihnak ah “looters le rioters” pawl kengkip ah an pawt i cawlcangh ning vialte hi Bible Account in zoh cio ve hmanh u. Lucifer a von lang tikah, Armageddon ral timi hna hi mahbantuk tete in pei aa thawk kho ve ko lai hi tiah ruahnak phun dang ngaite a ka ngeihter.

Note: Tuaktan cio awk sawhsawh ah ka rak thaimi a si. A rel huammi caah 🙂

 208 total views,  1 views today

This function has been disabled for Chin 11 News.