Federal Kong Ah NLD Dirhmun: Thil Hman Le Zumh A Tlak Mi Phuan Chuah A Si Ko Cang Hih

Myanmar ram cu independence kan hmuh hnu tlawmpal ah ram chung buainak nih a zulh colh i vawleicung ram buai bik lakah aa tel vemi a si. Myanmar buainak hi mifim pawl nih cun phunghram ruangah a chuakmi buainak (Constitutional Crisis) a si an ti theu. A ruang cu mizapi duhnak in sermi phunghram an si lo caah a si bik. Aung San nih Panglong Hnatlaknak he aa tlakmi federal democracy phunghram a rak ser ko nain a lim manh hlan ah misual kut in a thih caah U Nu nih a chawn i Aung San tuah ciami a hran hmanh kha a si lo zawngin a merh i , Panglong Agreement in a pialmi phung asi caah 1947 i sermi cu 1962 (kum 15) lawng a daih. Ne Win nih 1974 kum in amah duhningin phunghram cu a ser ve i mipi duhnak in a pial ve caah 1988 kum (kum 14) ah a dong ve. Atu Nargis phunghrampi hi ralkap pawl nih anmah nawlngeihnak fehternak caah kum 14 khengte caan la in 2008 kum ah an fehter ve i zeitik tiang dek a nguh ve te hnga?

Kan chim cang bang khan tlangcungmi le mipi duhnak tel loin sermi phunghram nih a chuahtermi cu ram chungah buainak aa chap chin lengmang. Mah cu daihternak caah cun Pressident Thein Sein chan lio 2015 October 15 ah tlangcung hriamtlai phu 8 hna he cozah nih ram pumpi huap kahdaihnak NCA ( Nationwide Ceasefire Agreement ) minsen an thut. Biatlang tam nawnte a ummi lakah tlawmpalte tein lungtlinnak cu chap chih lengmang a hung si. NLD cozah kai hnu zongah tlangcung hriamtlai phu 2 an hun i chap ve.

Octorber 28,2019 lio ah khan Naypyitaw ah NCA kum 4 tlinnak camtuak tonpumhnak an ngei than i mah lio ahcun State Counsellor Aung San Suu Kyi nih NCA lamthluan ah ( NLD) cozah dirhmun kong fiangte in a chim i tlangcung hriamtlai pawl Ethnic Armed Organizations ( EAOs ) hruaitu pawl zong an rak i lunghmuih kho tuk, an duhnak aa khat bak. Mah cu i a chimmi chungin a tawinak tein kan langhter tuah lai.

( 1 ) A dikmi federal ( genuine federal ) ramkomh kan ser hna lai

( 2 ) Federal phungning bantukin nawlngeihnak( powers ), ngunkhuai ( tax ) le ram chung chuak thil phun phun ( Natural resources) i then cheuh cio ding

( 3 ) Federal ramkomh chung i a ummi ramkulh le ramthen ( units ) vialte i tlukrualte in khuasak tti ding

( 4 ) Ramkulh ( states ) kip mahte khuakhan lairelnak ( self- determination ) phung fehternak caah state phung i ser cio ding

( 5 ) Ramkulh ( states ) kip nawlngeihnak ( powers ) cu mipi duhningin phawtzamh cio ding, ti hna an si.

Mah NLD cozah kalpining a chimmi ah hin ralkap pawl nih a cheukhat number ( 1 ) le ( 5 ) khi atanglei bangin remh ding an ti ve.

( 1 ) Democracy le federal he aa tlakmi ramkomh ser ding

( 5 ) Tlangcungmi hna umnak state kip ah Union ( ramkomh ) phunghram he aa kalh lomi phung serpiak ding, tiin a biafang remh an duh.

Ralkap pawl duhning bang asi ahcun federal ngaingai si loin federal he aa tlakmi ( federal he aa lo ngaimi, a deu ) a si te lai tinak a va si hnga?

Khah, atu lio ah mi cheukhat nih NLD nih federal a duh loh an timi cu a dik lo zia mahka hin fiangte in a lang ko. NLD Party nih cun kan ram buainak hrampi hi phunghram ruangah a chuakmi buainak ( Constitutional Crisis ) a si timi a fian tuk caah phunghram remh hmasa hi biapi bik ah a chiah.Phunghram remh hmasa loin cun zeihmanh tuah khawh asi lo ( zei bantuk federal hmanh hmuh khawh a si lo ) ti a theih. NLD cozah kalpimi hi kan pale EAQs pawl duhning he zong aa khat bak ti hi kan theih cio a hau. Zahan August 13,2020 ah Naypyitaw i EAQs pawl he tonpumhnak an ngeih lio zongah khan Daw Aung San Suu Kyi nih cun mah NCA Process hi phunghram remhnak he voi khat lo ah kan tuah chih hna lai a ti rih caah kan ram thlennak cu NCA Process nih khul rang deuh in a kalpi khawh lai tinak asi. Cucaah NLD hi ralkap tlaihhrem uknak dokalh in Myanmar ram chungah Federal Democracy phung a um khawh nakhnga hmaisuang bikah a kalmi People’s Party ( Mikip a funtomtu party ) a si ko ti thei cio hna u sih.

By-Victor Pa

 388 total views,  1 views today

This function has been disabled for Chin 11 News.