Fapa Duhnung Ngai An Ngeih Mi Cu A Min ‘Sanitizer’ Tiah An Sak

India ram chung Utta Pradesh state ah a um mi nuva hna nih tuthla hramthok hrawng ah khan fapa pakhat an rak ngeih i cu an fapa te cu a min ah ‘Sanitizer’ tiah an sak hi a si. Hi hna nuva nih an duhnak pakhat cu an fapa ‘Sanitizer’ tiah min an sak mi nih hin mi vialte nih zeitluk indah kut tawl hi biapi kan rak chiah timi sullam a theih ter than lengmang hna lai tiah an duhnak hi a si.

Hi kong he pehtlaih Omveer Singh (nau te hringtu pa) nih a chim mi cu “kan nih cu sifak santlai lo ngai kan si caah hi pulrai Covid-19 dohnak ding ah zeihmanh ngeihchiah chawva in kan i teltum kho ve lo. Cu ruang ah kan fapa min kan   sak mi nih hin vawlei cung pulrai dohnak ding ah kan hman cuahmah mi Sanitiser hi kum caan saupi hnu zong ah mipi niha n theih peng khawh nak hnga ding le zeitluk indah kuttawl hi biapi ah kan rak chiah timi hi an theih than lengmang ding ah kan duhnak a si ko” tiah zong India thawngzamh sinah a chim.

Cun Preeti Verma (nau te hringtu nu) nih a chim ve mi cu “Coronavirus hi tihnung tuk hringhran a si ko. Minung nunnak ah thinphang thlalau in kan um lio ah hi bantuk in fapa hna dam tein kan ngeih khawh hi a sunglawi tuk mi a si. Cu ruang ah kan fapa min ah ‘Sanitiser’ tiah kan sak mi hi thil tha a si ko tiah kan ruah” tiah zong a chim ve.

Ref: Newsweek.com

 141 total views,  1 views today

This function has been disabled for Chin 11 News.