Fale Chawnhbiak A Hmang Lomi Lai Pa Hna

Laimi hi miphun dang he kan i dannak pakhat a um i uar a um lo taktakmi cu pale nih fale chawnhbiak hman lo a si. Phundang deuh in kan chim ahcun pale nih fale hawikhawmh a hmang lomi an tam ngai. Midang hawikawmh cu kan thiam ngai ko nain fale hawikamh kan duh/hmang lo.

Hawileng kan ngeih i hawi sin kan um ahcun kan biaruahnak le caan hman a nuam i a sunglawi ngai ko nain kanmah chungkhar lawng kan um tikah pale nih fale he hawikawmhnak a um ti lo. Nupi he biaruahnak ngeih pinah cun fale he biaruahnak ngeih le caan hman hi a tlawm ngai.

Cheukhat pale hna cu fale he hawikawmh hrimhrim hi an hmang lo. Anmah um in an um i, fale zong anmah um in an um. A caan ah chungkhar nucan nih bia a ruah hna i mah pin cu zeihmanh a um ti lo. Fale chimh an ngeih lo caan ah pabik nih sik le velh lawng hi a hmanmi a si.

Fale he ih ti, ei ti, nuamh ti, tlonlen ti le hawikawmhnak dangdang ngeih lengmang hi nu le pa rian lianngan cem a si ko nain Laimi tampi nih cun zeihmanh ah kan rel lo. Hawileng sinah ahcun kan siang i kan thlumel ngai ko nain fale sinah cun kan siang i kan thlumel tawn lo.

Fale kan daw hna lo tinak si loin kan fale hi kan fale an si ko ti phun in kan zoh sawhsawhmi hna hi a za lo. Midang le hawile kan zoh hna i kan hmuh hna bantukin kan fale zong kan hmuh hna i kan hawikawmh hna ding an si. Fale caah caan ka ngei lo ti phun in fale he aa hlat i aa chawnbia lomi pale kan tam ngaingai. Zeitin dah na hmuh ning a si ve?

 170 total views,  2 views today

This function has been disabled for Chin 11 News.