Facebook Nih President Trump Hmanmi NAZI Symbol Fakthanh Nak An Hlon Piak

Khrihfa tha tiah an aupi ngai mi Pu Trump nih lainawng mithat pawl hmanmi symbol a hman ve caah Facebook nih an hlonh piak bak ve. Presideng Trump nih ara lai mi US President thim nak ding ah tiamhlamh nak a ngeih mi campaign a tuah nak fakthanh pawl cu NAZI party nih an rak hman mi symbol a si caah Facebook nih an hlonh piak hi a si.

Facebook nih a hlonh mi Pu Trump campaign tuahnak pawl hi President Trump le Vice-President Mike Pence hmangmi Facebook page ah an rak post mi a si i suimilam 42 a rauh hnuah Facebook Policy a kalh in an post mi a si tiah an ti ruang ah an rak hlonh piak hna.

Hi kong he pehtlai in Facebook palai pakhat nih a chim mi cu “President Trump nih aralai mi US President thimnak ah campaign tuah nak i a hman mi symbol hi hlanlio NAZI party pawl nih an ral pawl thah nak ah an rak hman mi thantar (flag) ah an rak cuanter mi a si. Cu ruang ah hi thil nih a langhter mi cu miphun thleidan nak le remlo nak a si caah Facebook kan phung a buar.

Cun hihi Hateful organizations (or) hateful ideologies aiawh in hman symbol a si fawn caah Facebook nih cun a khap mi a si. Midang nih a hmang mi an um than rih zong ah Facebook nih cun kan hlonh piak than ve ko hna lai” tiah a chim.

Hi symbol an hman mi ruang ah President Trump lei nih an chim ve mi cu “hi symbol hi Antifa pawl nih an hman ve mi a si caah kannih nih cun ANtifa hi kan rem hna lo, kan dohbak hna tiah langhter nak ah hi symbol hi kan hman ve mi a si tiah zong an chim ve.

 168 total views,  2 views today

This function has been disabled for Chin 11 News.