Facang Phur Ding In A Kal Mi Chin Pa Pakhat Lampi Ah Thi Lakin Meithal Kah A Rak Tong

Paletwa pengkulh ah ralzam in khuasa a si mi Naan Chong Wah khuami U Myo Thanh (kum 46) cu nizan June 10 ah khan facang phur ding in a kal nak ah zeibantuk hriamtlai ti hngalh lo mi nih lampi ah meithal in an rak kah caah a nunnak a liam tiah theih a si.

Meithal kah nak in a nunnak a liam mi U Myo Thanh hi Naan Chon Wah khua mi a si I AA le Tatmadaw kahdoh nak ruang ah Seinh Sein khua ah ralzam in hmun a khuar mi a si. An khua Naan Chong Wah ah an zamtak mi facang le thilri tlawmpal lak ding in ralbawi ngan sinah tha tein nawl an hal hnu ah an kal hi a si mi an dihlak in minung 21 tluk an si hna. An kal cuahmah lio ah cun zeibantuk hriamtlai tiah hngalh loin meithal in an rak kah hna ruang ah U Myo Thanh hi a hmun ah a nunnak a liam I midang tu cu an him ko tiah U Kyaw Aung nih cun a chim.

Naan Chong Wah khua hi April 7 ah khan ralkap helicopter in an rak kah mi kha  si I an dihlak nawn in khua an chuahtak hna. Cheukhat cu Paletwa khuapi chung ah a zam mi an um hna I cheukhat cu Seinh Sein khua ah a zam mi zong an rak um hna.

U kyaw Aung nih a chim rih mi cu “hi bantuk in thil kan ton lengmang mi hi cu ngaihchia ngai a si ko. Bomb kah nak le meithal ah nak in a thi mi hi kan tlam hrim ti lo. Hriamtlai phu cheukhat nih an tleih hna I nikhat maw nihnih hnu ah an ruak in kan char than mi hna zong hi an tlawm ti lo caah fak piin kan ngaih a chia ko cang. Cun kahdoh nak ruang ah ei-din le hruk-aih zong lungrethei ngai kan si ko” tiah zong a chim hi a si.

 292 total views,  1 views today

This function has been disabled for Chin 11 News.