Evan Rualuk Nih Lih Fianternak A Van Tuah Cang Hih!!

LIH le BAIBAL LIH fianternâk, A silomi kha a si tiah chim le A simi kha a si lo tiah chim hi LIH timi cu a si. Lih ai thawknâk: Lih cu Biatak a simi Pathian ralchanhtu Sehtan asiloah Khuachia in ai thawkmi a si. Jesuh nih ‘Nannih cu nan pa khua ta nan si. ….Lih a chim tikah amah kokek kha a chimmi a si. A nih cu mi lih chim a si i lih pa zong a si’ tiah a ti. Johan 8:44. Lai Baibal thiang ah cun ‘lih vialte pa a si’ tiah a ti.

Eden dûm ah Sehtan nih lihchim a thawk i Pathian nih ‘Na thi lai’ tiah a timi kha ‘Na thi lai lo’ tiah a ti. Cucaah Biatak or biadik si loin lih a cohlângtu Adam nunnâk ah lih nih hmunhma a lâk cawlh i ni hin tiang minung nih lih a chim tawnmi hi a si.

Cuticun lihchim hi chunglei nun ah Sehtan or Khuachia fa si hmelhchunhnâk phun khat a si. Cucaah Baibal nih lih a chimmi vialte cu Hell ah an kal lai tiah a ti. “Asinain miralchia zûmlotu fih a nungmi lainawng horduhcuaimi doih a thiammi milem a biami hna le lih a chimmi vialte umnâk ding cu mei le kât mei tili thih voihnihnâk kha a si. Bia. 21:8

Baibal nih lichim le milem (siasal) biak sualnâk cuailung hi ai khat bak in a chiahmi a si. Zeicatiah lihchim le milem biak hi chunglei ah Sehtan fa si hmelchunhnâk ve ve an si.  Cucaah zûmtu cu lihchim ngol dingin nawlpek kan si.

“Cucaah lihchim kha ngol in mikip nih mah le innpa sinah biadik kha chim cio hna seh. … ‘ Efe. 4:25 Zeicatiah zûmtu kan si hlan ah lihchim pa kan pa Sehtan kha kan chuahtâk i biadik lawng a chimmi Pathian fa ah kan i can cang caah Sehtan fa si hmelhchunhnâk a simi lihchim cu kan ngol bak a herh cang.

Cuticun Sehtan fa maw na si Pathian fa dah timi kongah nangmah tein nai chek i nai hngalh khawhnâk lam pakhat cu lihchim hi na ngol ve cang maw? Asiloah lih chim hi a poi theng lo tiah ruat in lihchim ah nai nuam rih maw ti kha i chek.

Baibal nih ‘. ..lih chim ah an i nuam. .(Sâm 62:4) tiah a ti banginmi pakhat khat cu lih chim ah ai nuam ko rih a si ah cun Lih pa a simi Sehtan fa ka si ti kha fiang tein i hngal seh.  Jesuh dirhmi van Jerusalem thar ah lut kho loin khualipi lenglei ah a um hngami Baibal nih a chimmi cu ‘. …lih a tlaihchantu hna le a hmangtu (whoever loves and practices a lie) an si tiah a ti. Bia. 22:15

Lih hi kan tlaihchan i kan hman peng ko rih ah cun zûmtu deu hrințhân lomi lenglei ah Pathian fa bangin a nung i chunglei ah Sehtan fa kan si ko rih tinâk a si. Jesuh nih ‘A simi kha ‘A si’ tiah ti u law a silomi kha ‘A si lo’ tiah ti ko u. Zeicatiah cu pin lei pauh pauh cu mițhalo pa (Sehtan or Khuachia) sin in a rami a si’ tiah a ti. Mt. 5:37

Cucaah Jesuh cu Khamhtu le Bawi ah a cohlâng i Jesuh keneh a zultu Kristian nih cun. . A simi kha ‘Asi’ tiah kan ti i a silomi kha ‘A si lo’ tiah kan ti peng a herh. LIH LE HROKHRAWL HI PA LE FA AN SI