Elaw Khah NLD Cozah Cu An Bia A Sang Bak Hi!

NLD cozah nih Chin ramkulh caah kum nga chung a rianṭuannak pawl cu a luan ciami kum 50 chung rak ṭuan mi nak in a ṭha hnem tiah Chin ramkulh Hluttaw le Chin ramkulh NLD party Chairman Pu Zo Bawi nih a ti. “Kum 5 chung kan ṭuan mi vialte hi Chin ramkulh cozah nih a luan cia mi kum 50 chung an ṭuan mi nak in thil kan ti kho deuh. Tonzang in Paletwa tiang lam kan cawh kho. Khuate pawl zong 100 ah 85 cu lam pem lak in kan tuah piak kho hna. A herh mi hlei tibantuk pawl zong kan donh piak hna. Cucu mipi nih mithmuh kut tongh asi. A luan cia mi cozah pawl nih kum 50 chung an ṭuan mi nak in a tam deuh tiah chim ka duh” tiah Pu Zo Bawi nih cun a chim. Atu lio Chin ramkulh cozah le hluttaw hmunhma tam deuh cu NLD an si.

Daw Aung San Suu Kyi hrim voiki kheng te Chin ramkulh ah a rak ra i kan sining cu a hmuh tik ah a ruahnak leng in kan harsa deuh timi a hmuh. Cu caah Budget ṭhencheu tik caan zong ah a hlei in ruahpiak deuhnak aum. Chin ramkulh ah NLD nih zatuak 78% teinak an hmuh mi hi mipi thawng in asi. Cu caah Chin mipi nih NLD cu zakhat ah zakhat an dirpinak thawng in Vice President tiang kan mah an kan pek. Ramkulh chung zoh asi zong ah sianginn thok in lam pawl tiang Kan Pi Suu nih Chin ramkulh lei cu ruah a tam nak asi caah thing in sak lo in motor a kal khonak pohpoh cu Steel Structure in sak ding tiah a kan ti. Cu caah sianginn zapi 1,500 leng cu an sining sang ter chap asi i patkar steel zong in kan sak dih hna. Nikum ah tangka fang in Kyats 133 billion hrawng asi lai. Tu kum budget zoh than tik zong ah tangka fang in Kyat 143 billion asi. Zeibantuk cozah an va kai len zong ah hitluk in pek kho asi lo” tiah Pu Zo Bawi nih cun a ti.

Pu Zo Bawi nih chim mi kongkau he pehtlai in kamkhat lei party asi mi CNLD party in Chin ramkulh hluttaw chungtel asi mi Salai Aung Lian nih cun kamkhat lei ah a ṭhawngmi party aum ve a herh. Ramkhel hruaitu lei zong ah ramkulh zapi huap in rianṭuantu ding asi biapi tiah langhternak a tuah. “Ṭhanchonak lei ah cun Chin ramkulh pakhat lawng si lo a dang ramkulh zong an zapi tein budget chap cio an si. Tangka a tam tik ah thil a kal kho deuh. Cuve bantuk in eihmuarnak zong a tam khun. Kan Chin ramkulh nih 2020-2021 kum caah hmuh ding mi Kyats 180 billion leng aum. Yangon ramṭhen nih Kyats 920 billion, Yangon ramṭhen nih an duh ning in an hman kho. Budget a tam poh ah thil tuah kho asi deuh ve. Budget timi zong cu tangka cawi chom mi zong tampi asi” tiah kamkhat lei party CNLD in Salai Aung Lian nih cun a ti. Ref: Chin Cable Network Channel

 242 total views,  1 views today

This function has been disabled for Chin 11 News.