Elaw Khah! Donald Trump Le US Caah Cun Thawng Tha Bak Si Ko!

Home Depot dawr ngeitu Bernie Marcus nih a ngeih chiah 90% cu president Donald Trump thim thannak ca le , ralkap pensen le kutke tlamtling lo hna caah a hlut lai ti a si. Mah chung ah President Donald Trump election campaign caah tam bik a pek lai ti a si 2016 election lio ah Trump caah 7 miilion a rak hlu cangmi zong a si. Barnie Marcus cu $5.9 billion reng lo a rummi si.

Source: Salai Lairamthang

US Dirhmung kong relchap ding!

Thawng Za Lin: A Tu Lio USA Ram Dirhmun Cuanhnak

(REL THLU LO IN LIKE LE COMMENT TUAH LO DING)

Kan vawlei pi zei lei kong hmanhah a hip kho bik mi, laimi zong ting cheu hrawng khua kan sak ve nak ram cu Covid-19 le George Floyd thihnak nih a hninh cingling lio a si. Cu a phen ah a um mi sining zei maw zat hi theih khawh cawk loin a um mi nih mi thinlung a buaiter a zual. A hnawmtam mi politics hi rel cawk lo. Democracy ram kan ti mi zong hi zapi hmuh loin a rak hnawmtam ngai ngai ve ko.

Hi ramah kan laimi zong tampi kan um ve cang bantuk in Citizen a si cang mi le hruaitu thimnak Vote zong a pe kho mi tampi kan um ve cang. Kan ram bantuk in kan ruah a hauh ve cang caah kan umnak ram kong hi a zapi kan theih khawh lo hmanhah theih a herh mi cu kan theih ve an hau tawn.

USA ram ahhin a tlangpi in politic party pahnih a um, Democratic le Republican party an si, a dang dang independent tbk zong an um nain D le R hi hmunhma a la deuh mi an si. Ui le meheh bantuk deng an lawh caan a tlawm lo.

Tutan ah US nih a ton mi mangtara buainak Covid-19 le George Floyd thihnak ruangah a chuak mi buainak pinah ai thup mi le a hnu in riantuannak hi zoh a har ko. Media ngan ngan hna zong dirkamh hlei le ttanh hlei ngei in ui le meheh bang an i er peng hna. Kan laimi upa tampi zong an hmuh ning le pomning, party ruang zong a si kho, ui le meheh ngai ngai cu si lem loin i er pah cuah mah a si.

2016 thimnak cu Russia probe ruangah Pu Donald Trump nih bual a co ti in Democratic party nih an hmuh caah meihma chunh in a chunh hna. Pu Obama nih Secretary of State ah a hman mi Pi Clinton cu Democratic in candidate a si, Pu Biden cu Vice president a si. Cu an party nih an rian ngan bik an i hmaithlak mi cu Pu Trump tlakter a si. President a tuan hlan deuh in rap chiah nak ah khau hri an i damh kan ti lai. An naam an i taat colh. Thlithup meeting an tuah. Impeachment hearing lio ah an meeting kong pawl fiang ngai in a um ko khah. ka telh ti lai lo.

Pu Barrack Hussein Obama nih kum 8 chung a hruai hnu ah Pu Donald J. Trump nih businessman dirhmun bak in Pi Hillary Clinton cu a van tei ciammam tikah vawlei pi ah tuanbia a tial. Politician tam taktak thah cawk lo an umnak ram cu sipuazi tama pa nih a van uk tikah – cu nih a langhter mi cu Campagn lio ah a chim mi; politicians pawl hi zum hna hlah u, an chim bantuk in an tuah bal lo, an campagn lio lawngah an kan theih, an bawi taktak tikah an kan philh, an tuah khawh mi a um lo, timi le America Great Again timi bia pawl nih mipi thinlung cu a ei dih, hmunhma tampi a laak caah teinak a hmuh.

A chim mi le biakam mi pawl cu a tuah hna, an ram pi cu sipuazi a kaiter. An ram tuanbia ah a sang bik mi siapuazi thanchonak a chuahter. Israel ram cu a chim bang a dirkamh. President hlun hna nih Jerusalem cu Israel Capital ah kan chiah lai tiah an rak ti nain an tuah ngam bal lo mi cu a chim bangin a tuah. ISIS ralhrang a den hna. Iran deal a hrawh. Pu Biden te party nih billion in an bawmh tawn mi Iran deal ti mi cu a khuai.

Mexico ramri vanpang cu a chon cuahmah. Mihrut vanpang ti tiang in an rak doh mi cu meng tampi saklim a si. Communist ram a si mi, kan kawlram zong a thawtnak duh men ah kum sau taktak a rak dirkamh tu le a hrawktu China cu conrup in a van tuah. Theih cuahmah in US a do tu le a zuamcawh tu cu China a si.

Impeachment kong an ruahnak ah kum thum chung zei rian hmanh tuan lo in ( lo voi khat hmanh kal lo in) a um mi Democratic party cu Pu Trump rawiphiar dingin million tam taktak dih in investigation an tuah. Nain senate ah an sungh caah an thum kho lo. An fial mi an mizumh bik mi nih zeihmanh ka hmu lo a ti.

China ramah Covid-19 ai thok lio cu Christmas lai ah a si. Impeachment kong an buainak ah Christmas le Coronavirus kong zong an thei kho ti lo. Coronavirus ruangah mawh a phurhtu cu Democratic party an si than, mipi nih thim mi hruaitu pawl cu lo kal cu chim hlah zei rian tuan cu tim hlah, Pu Trump do dingah thim mi bang an i buai pi khim.

An ram sipuazi cu Covid ruangah tlak taktak in a hung tla ve. Trillion 3 bak ram mipi caah hman a si. A dang Trillion 3 hman rih dingin D party ti ko sih, House nih an chuahpi. An ram sipuazi tlakter cu Pu Trump tlakternak caah an ruah khawh chun ah a hung cang. America First a ti peng tu pa chuihnak ah an hman.

Covid-19 sipuazi kip, company kip cu khar a hung si. Ram sipuazi a tla mi ruah lengmang tik le Covid sining cuanh tikah on than caan a cu an ti cuahmah lio ah Democratic party hruaitu upa hna nih an soisel hoi. Minung nunnak zei a rel lo an ti.

Thilmak tuk a hung si mi cu Minesota ah Goerge cu Police nih hun thah a si tikah khuakip, state kipah protest an tuah, police pa li cu tleih an si cang nain dongh an hngal kho lo, police officer tampi fahnak an pek hna. Inn an duah, thil an fir, a bu bu in lam an zawh. Covid-19 (CDC) nih guideline a chuah mi pawl vialte cu protest a tuah mi hna nih an buar. D pawl nih indirect in an an dirkamh hna. Covid-19 a tolrelning a tha loh tiah an rak doh peng mi cu rap dang an chiahnak ah philh hoi.

November thimnak an ruahnak ah zeizong te hi a buai khunnak a si. Ram ka daw a ti mi hna poh poh hi zumh awk an tha tawn lo. Cu phen ah zeidah a um ti mi cuanh a hau.

Monday ah khan Russia investigation lio an thuhnawh mi pawl cekhlat thannak US Senate Hearing an tuah. Pu Biden te pawl, pi clinton te pawl thilnawh langh te dawh a si. (Cu kong cu kan peh than te lai.)

 305 total views,  1 views today

This function has been disabled for Chin 11 News.