Dr. Van Hlei Thang nih Covid-19 Zawtnak Kong Bia Fak Piin A Chim Cang!

Tulio Zawtnak kongah ‘Ttih hlah uh’ ti lawngin thapek bia chim sawhsawh ding a silo : Dr.Van Hlei Thang

Psalm 88: Tu tan kan tonmi kong he pehtlai in, micheu nih upa le hruaitu nihcun “Tha peknak bia” long bak chim ding a si a ti mi an um. A si ko. Lungrethei vansan in kan um lio ahcun pei tha petu cu kan herh reng cu. Amah belte, kan ton cuahmah mi hi, thihnak le nunnak bak a si caah a dikmi thapeknak a si awk a si.

“Tih hlah uh” “Tih ding a si loh” ti sawh sawh cu a dik mi thapeknak a si loh. Cu bantuk cu tih zong a nung. Cu nih cun daitlannak le zeirello nak a chuahpi bak. Nan theih cio bantuk in, Tuluk zong nih ai thawkka ah hi tluk a si lai hi an rak ruat loh. Wuhan ah a rak chuah ka, “Hi hi Tihnung a si hih” tiah a rak phuangtu pa Sibawipa Dr LI Wenliang kha nawlngeitu pawl nih a kan an phih, an deihter. Hi tluk tih anun lai hi an rak ruat hrim loh.

Nitlak lei zong cu thiam an si. US zong mu. Tu tluk hin tih a nung lai ti hi pel te hmanh an rak ruat lo. “Cumpi tlangrai phunkhat a si ko cuh. Tih ding a um loh. Kum khat ah tlangrai in a thimi kan um peng ko” tiah a ti salam mi zong an um ve. A van den ciammam hna cu, an mual a pho. Tamtuk te an zaw, nunnak tamtuk a lak fawn. Tu tiang ri a sining tuak tik ah “Tlangrai sawhsawhnak in a let sawmli in tih a nung deuh” ti a si. Nizan “White House Press Conference” kha cu, thinlung a nuam lo. An thiamsang hna nih “US ah tingkhat in tinghnih le cheu thluk kan thi kho” ti a si. Cu caah “Tih hlah uh” ti sawh cu a dikmi thapeknak le hnangamnak bia a si hrim loh. Mah ral mah kawh tluk a si.

Cu caah kanmah cio zong kan I ralrin cio awk a si. Fimthiamnak a ngeimi le Nawl ngeitu hna nih tuah ding timi poh cu zulh I zuam ding kan rian a si. Hi zawtnak I tha tein tu an kan chimhning bantuk in um ahcun tampi kan kham khawh lai. Tulio ah Sibawi te le Damnak lei riantuantu nih “Chun chun zanzan in, anmah zawn hmanh ruat lo in mizaw an kan thlop. Mi chonh a fawituk ti an theih tuk bu ah. Cozah nawlngeitu nih a sikhawh chung in, tuntuk khuasaknak ah harnak an tongtuk sual lai tiin, heh tiah an kan dirkamh.

Chun zan it lo ngacha in rian an tuan. Thong an kan thanh. Cu I kanmah daithlang dom in “Kan I leng hna, kan I kai hna” mi hi a phung hrim a si loh. Mi hmaikhah ding hmanh khi a si loh. Kan hawi nih thih thih nun nun in heh tiah hi ral an doh lio ah, anmah hlawm le chawmmi mi nih zulh ding phung an kan ser piakmi hmanh zulh loin um cu asi te a si loh. Kan I leng, live kan I thlah. A dik bak loh.

Cun rian a tuan lio cuahmah mi zong nan um. Cu zong cu hi ral kan doh lio ah mi zapi ca le Pathian caah kan tuan ti in ruah ding a si. Kan mifim pawl nih an kan chimh bantuk in tu lio hi Ral 2 do kan si. Rai le a mah nih a van chuahpi mi sungh zatlaknak a si. Cu caah cozah ni a herhmi rian a si tin a ruah rih le nan Company nih a tuan khawh rih caah mi zapi dirkamhtu nan si. Ralring le thatho tein tuan ko uh.

A pahnihnak, thapeknak “Zumtu kan caah tih ding aum loh” ti hi sullam 2 angei. “Zumtu cu a kan tong kho lai loh” ti cu Bible cawnpiak ning a si loh. Zumtu he zumlo tu he ton ding a si ko. Bible cawnpiaknak tha tein zoh tik ah “Zumtu nih harnak nan tong lai loh” timi a um loh. Vulei a si caah harnak hi zumtu he zumlo tu hi ton cio ding a si ko. An ti theu mi bia pakhat cu “Zumtu na si ruang ah na tonmi ai dang lai lo. A sinain na tonmi na cohlan/lehrulh ning tucu ai dan awk bak a si” ti a si.

Bible ning tein, Hlan ahcun Prophet hna hmang in bia a chim, tu ahcun Pathian nih a fapa (Kan sin a ummi Pathian) nih a kan chimh. Cu cu Jesuh hi a si. Jesuh nih fiang ko in a kan chimhmi cu “a sualmi thih in dingmi nun a si hlei loh” ti a si ko. Shilome Innsang nih a cimh hnawh I a thimi hna kong ah “An sual hlei loh” tiah tha tein Luk 13 chung ah kan hmuh. Amah zultu hmasa pawl hna zong, zapi tonmi cu chim hlah, anmah thengte thlir in hrem le thah an rak tong dih. Paul nih “Hi Vulei hi an caah umnak a tha tuk theng loh” tiah a rak hlawi phahnak kha a si.

A sullam pahnihnak: “Zumtu caah tih a nung loh” ti hi zumtu nun a pemh tak tak mi hna caah a dikmi a si. “Kan thih ah kan nun ah Pathian nawl a si ko” ti in Pathian sin ah hnangamnak an ngei cang. Paul le bang nihcun “Ka thiah ah amiak, ka nun ahcun Krih” tiah a ti ngam. Pathian a thatnak le a dawtnak kha an pemh tuk cang caah, “Zei an ton poh kha Pathian nih a tha bik in a khan piakmi” ti an cohlan. Pathian thil tuahmi kong le an tonmi kong ah lunghrinnak an ngei ti loh. Paul nih “Pathian a dawmi hna caah zeizong te hi a tha lei in a khan piak hna ti kha kan hngalh” ti khi cu bantuk nun in a ra a si.

Pakhat te tenh ta ka duh. Zum lo tu hna nih Khrihfa mi cu “Trilema” in an sung an ti theu. Cu cu zeidah a si ti ahcun, “Zei zong ti kho tu Pathian, Dawtnak Pathian le Vulei sifah/harsatnak hi hmunkhat ah an um ti kho loh” an ti. Phundang in chim ahcun, “A thawngmi Pathian, dawtnak Pathian nih hi thluk Vulei sifah harnak hi a zoh sawh ne? Vulei ah harnak a um ti cu el awk a um loh. A tuah khawh lo ahcun A thawngmi Pathian a si kho loh. A tuah khawh ko tung I, a tuah duh lo ahcun, “Dawtnak Pathian a si kho loh” an ti. An biafunnak cu, “Vulei ah sifah harnak in a khat. Cu caah a Thawngmi le Dawtnak Pathian a um lo” ti a si ko.

Cu cu Indian theologian Ravi Zacharia nih hi tin a leh hna. Amah nihcun, “Quartlema?? a ti” nih vangkau in hi ruahnak cu a tengh a ti. Pathian hi “A thawngmi le Dawtnak in a khatmi Pathian long a si loh. Zeizong te, hmailei kong tiang hngal dih tu a si” a ti. “A thawngmi Pathian, Dawtnak Pathian, Zei zong vialte hngal dih tu, le Sifah harnak hi an um ti kho tuk” a ti. Hitin a langhter. “Hngakchianu te pakhat cu a pi nih, Vaccine (Sii) chunh ding ah a kalpi. Hi ah hin, Api nih nawl angei dih. Duh le chunhter, duh lo le chunhter lo khawhnak nawl al ngei.

Cu long si loin, Vaccine hi ka fa hmailei caah a tha ti a theih fawn” a ti. Cu caah a tu nu cu Si a chunh ter” a ti. A tu nu nih an chunh lio ahcun a thei loh. A pi dawtnak le sichunh fahnak a ruahti tik ah alung a fiang kho loh. Nain a hawn upat tik ah “Api dawtnak” a si kha a hngalh. Cu nun a pemhtu nun in a hawng luangmi hla cu, “Zei kip si hna seh, ka cung a tlungmi kha, ka thlarau caah an tha dih ko” ti kha a si. A va thuk hringhran dah!

Korea movie pakhat ka rak zoh bal. Parellel World ti a si rua, k acing ti loh. A umtuning cu, Tuchan sibawi thiam kha, Vulei dang a thangcho lo tuk mi, nih dam duh ah an fir (kidnap). A va phak tik ah a thluak ah thi alutmi kha, bawmh duh ah operation a tuah. A lu ruh kha kha a khuai. A hlai dih. An hmuh tik ah an duh naisai ti loh. Thah a timh bi bak in an ruah. An mawh lo cu mu. Nain nihin operation tuah a thatnak atheih cangmi caah cun kan cohlan khawh. A kan tuahtu cung ah kan I lawm lehlam. Zeimaw vanchiat ah operation tuah awk a tha ti loh, an kan ti hmanh ah kan tha a chia. Pathian thil tuah hi minung nih tling tein hngalh khawh a si loh.

Nain Zumtu caah cun, Pathian nih kan caah a tha bik a khanmi a si ko timi nih khan thawnnak a pek hna. Ruahchannak nih in khawhnak a kan pek cu mu. Tutan ah Mitha tha, zumtu thatha a thimi ah an I tel ko. Italy ah a thimi Pastor pa le bang cu, Zumlotu Sibawi hmanh zumtu ah a dam lo buin a ser ti a si kha mu. Cu bantuk thiam thiam Pathian nih a duh ahcun a dam ter hna. A si ahcun zeitindah kan ti ne lai? “Pathian nih nan ruahnak le ka ruahnak cu, Van le Vulei bang ai thlau” a kan ti mi kha a si tak tak. Minung nih theih a kan sianh lomi a si.

A sinain kan theihmi pakhat cu Jesuh nih “A thawnnak (Miracle) ruang ah a mah zumh le zulh kha a duh bak loh. Phundang in chim ahcun, amah le kanmah kar I pehtlaihnak ah zeihmanh tenhter a duh loh. Rumnak maw? Damnak maw? Hlawhtlinnak maw? Umter a duh loh. Hi Bible cacang pawl hi zoh hna hmanh! Mitcaw hnachet pa a dam ter. Mi sin va chim hlah a ti (Mark 7). Mathai 16 ah khuaruah har tuah an fial. A duh naisai loh. An khua zong ah an fial, a duh loh. Tukforh a in ah “Biakinn pharpahlek in zuang law, nai khong lai loh” ti mi kha a duh loh (Luk 4). Athawnnak langhter in Vulei mi hip a kan timh loh. Cu long hlah. Vailam cung an tlai ah khan, khatlei misual pa nih “Messiah ka si na ti lo maw? I khamh law, kan khamh ve. Kan I zumh lai” a ti ah khan a duh loh. Jesuh nih a ruang a ummi zumhnak in a fa le he pehtlaih hi a duh loh.

Nihin pumpak kan nun le krihfabu sining he ai dang tuk ti uh law. Nihin zumtu tampi kan nun he ai thlau tuk hringhran. Khuaruahhar umnak ah Pathian a um deuh tin a ruatmi kan si deuh ngawt. Ni chiar pumhnak ah I biatak ti loin Crusade le Camping long ah pianthar timh. I biatak. Cu hmanh ah hlasa (Singer nan ti maw cu) um lo ahcun nun a phok ti loh. Huham le rumra, worship tha tha le music, inn le lo le thilri thatha ah ai lunghmui mi kan tam cang. Tlamtlinnak, damnak le hlawhtlinnak long kha Pathiam umpi nak ah a ruatmi kan tam cang.

Kan Bible thimmi zoh hmanh uh sih! Psalm hi fung 150 aum. Cu chung ahcun thangthatnak deuh long an si. Fahnak le harnak in ai awt hmanh ah ruahchannak le thanthatnak in a dongmi long te an si. Nain tuchun kan thimmi, 88 le 39 te long hi a hramthok in a dongh tiang, fahnak le muihnak in akhat. Ruahchannak um lo tein a dongmi an si. 39 I a donghnak le bang cu Bawipa, “Thlanmual ka liam lai te tal ah hin hnahnawh loin ka um ter ko” a ti.

Zeiruang ah dah Bible, Pathian bia ah um ding in Bawipa nih a sianh hnga ti hi ka ruat. Bible cu Pathian hruainak in tialmi, Pathian bia a si cu mu. Pathian thawchuah hnawhmi an cu chim hau lo. Ka hmuh khawhmi cu, Pathian nih hi nun hi cawnpiak a kan duhmi a um ti cu a fiang. John cauk (20: 30) Jesuh nih a tuahmi tampi a um rih. Tial cawk a si loh. Cu chung cun nunnak nan hmuhnak ca an bawmtu ding long ka tial” a si kha mu. A tialtu hi a ngan a fak tak tak. Cankhat hnih longhmanh si loin a chanchung a si. Ka hngakchiat te in fahnak le zawtnak ni a zelh in a ka zelh.

Tlawmpal van char hna ahcun: Kan hngakchiat lio in nihin ni tiang ka zaw peng (88: 15). Harnak tamtuk nih khan an ka tlunhnawh peng (3 ), Thihnak aphang dengmang mi ka si (4). A thukbikmi muihnak horkuang ah ka tla (6)
Tihnung na thinhannak nih khan chun nitlak an ka tlunh (16). Harnak nih a kenkip lo in an ka chuah hnawh (17). Ka hawi le nih fih in an ka fih (8) Ka hawikawm tha bik hna hmanh nih khan an ka kaltak (18). A sinain cu harnak le fahnak chung cun a nun ai dawh tuk mi hmuhkhawh a si. Zeitluk harnak le Fahnak a ton zong ah thlacam a ngol hlei loh. Ka thlacamnak le ka auhnak ka ngaih piak tuah (2). Bawipa ni fate kana uh, nangmah sin ah thlacam in ka kut ka thler (9). Zing fate na sin ah thla ka cam (12)

A ngan a fahtuk bu in Pathian a fuh peng ko rih. Mi tampi kan krihfa nun cu a tlu cang lai. Hi dirhmun hin Pathian Kan fuh kho hnga maw? Zumtu tha tuk a sinak a lang. Pathian a duhnak hi, damnak ruang le hlawhtlin ruang ah a si loh ti cu fiang tein a lang. Damnak ruang ah Pathian sin a biami a si ahcun biak khawh ding a si ti loh. Pathian lungput hi Job tuanbia chung ah fiangtein kan hmuh khawh. Job kong ah Sehtan nih Pathian kha “Job nih an tihmi cu a lakka in maw a si? A si tung lo e, thluachuah tamtuk na pek caah pei a si ko cu” a ti. Zumhawkthlak in a um khawhnak ding ah Thluachuah in pei na tham cu! “Na thluachuah ruang ah a si” a ti. Cu caah Pathian nih Nawl a pek. La tuah ngat. A ka thangthat le thangthat lo na hmuh lai. Pathian nih thluachuah hmuh duh ruang ah biak a duh lo kha a lang.

Luke 9 “Jesuh zulh a duhmi pa” kan hmuh. A bia a tha tak tak. “Bawipa na kalnak poh ah kan zulh lai” a ti. Jesuh nih “Cenghngia nih kua an ngei, Vate nih bu an ngei. Sihmanhsehlaw, Mi fapa cu luchiahnak hmanh a ngei loh” a ti. A cohlang loh. Mi vialte ra uh, tiah sawmtu pa nih a cohlang loh. Zeidah a sullam? Taksa thluachuah ruang ah zulh ai tim kha Bawipa a hmuh. Cu caah a cohlang loh. Na hmu lai loh a ti. Hinak fiang deuh in John 6 ah kan hmuh rih. Mi tampi nih an kawl. Rili khatte lei ah a kal tak diam hna. Bawipa hi kan hi maw na um. Kan in kawl tuk cu teh an ti. Zeitin a leh hna kha? “Nan kan kawl hi kan bia nan duh caah a si loh, changreu khim tein nan ei caah a si (John 6: 26).

Thluachuah ruang ah Bawipa a zulmi cu a kaltak hna lai. A ruang zeidah a si? Ngandamnak ruang long ah Bawipa sin ai lawmmi cu an ngandamnak lakpiak a si tik ah a tlu lai. Thluachuah ah ai hngatmi cu a thluachuah a um lo tik ah a tlu lai. Peter nih a um kho ti loh. Bawipa bia a hal ve. “Bawipa Inn le lo le nupi le fa le kal tak in kan in zulh tung. Zeital kan hmu lai lo maw?” tiah a hal. Jesuh nih “Keimah ruang ah inn le lo a sungmi nih 100 in an hmuh lai (Mtt 19: 26-29). Bawipa sin kan I lawmhnak a muru tak tak hi, taksa thluachuah ruang long ah si hlah seh. Harnak chung zong in Bawipa au ko hna sih.

Pathian a daih ko lio zong ah Bawipa bochan a ngol hlei lo, Bawipa kha ka Khamhtu a ti khawh. Hi Psalm tialtu hi, a ngan a fak tuk. Thla a cam leng mang. A tlacam leh a si loh. Ai ruahchanmi pakhat hmanh a tling loh. Nain ka dang ah a kal hlei loh. Bawipa thiam kha a auh ko. A thlacam a ngol lo I, Pathian auh a ngol kho hlei loh. An caah Pathian cu a dai. A ruah ning in Pathiana lang loh. Na nunnak ah Pathian a daih lio can a um maw? Na thlacam leh a si lo a um maw? A thawngmi Pathian a sinak na hmuh khawh lo can a um maw? A poi loh. Pathian a dai rua kan ti lio can zong ah kan sin ah aum in rian a tuan pengtu Pathian a si.

Joseph nunnak zoh hmanh. A lamthluan a tluang loh. A nungmi Pathian a sinak a sin ah ai lang loh. A thawngmi Pathian a sin ah ai phuang lomi a lo. Ningcang lo tuk in fahnak le hremnak a in. Pathian nih a bawm hlei rih loh. Pathian a dai. Nain zeitik hmanh ah Pathian a pialtak loh. Thonginn chung zong ah a fel I, Faroah a van a san I mang a leh lai hmanh ah, “Bawipa, Mang leh khawhnak cu keimah ah aum loh, Pathian a ah a um” a ti. A donghnak ah Pathian nih a cawisan. Hi Psalm tialtu hi, Fahnak le Harnak chung zong in Pathian “Ka khamhtu” a ti peng. Pathian sin ah khamhnak a um kha ai fiang pengmi a si. Harnak le muihnak chung kan um lio a um ko lai. Pathian aw a daih can um ko lai. Nain hi Psalm tialtu pa bang “Bawipa, Ka Khamntu” tiah Pathian au ko hna uh sih.

Tutan thil kan tonmi nih Vulei kalning tu hmanh ah tampi a tlen. A dih tik zong ah tampi ai thleng lai. Ramri phen ah kan him loh. Vulei kan I hrawm ti kan fiang chin chin lai. Minung thawnnak bochan awk a tlak lo zia a kan hngalh ter chin. Kan Vulei a zawt tuk cang zong a kan hngalh ter. Kan uar mi zong tampi ai thleng. Tuan ahcun kan lawmhnak le nuamhnak a kan petu kha kan uar. Celebrity timi, Movie fitlaw maw, hlasa maw, muidawh maw kan uar tuk hna. A tha ko. Pakhat te in langhter ahcun, nai hmanh ah kanmah miphun chung in Kawlram hlasak zuamnak ah ai zuammi hna tha kan pek hna ning nih a langhter. Kan I lawm cio.

Mi tlawmte, Kawlram ah mithan khawh ah kan rak ruah lomi kha a tu an van tlen cuahmah. Lawmh lo awk a tha loh. An fan pawl nih “Motor cawk piak” hna a lar tuk. An uar tuk hna tinak mu. A sunglawi tuk. Tutan nih Fak ngai in a van thlenmi cu, “Sibawi le Nurses, sizung ah riantuantu” caah zanlei poh poh leng chuah in “Lawmhnak Kut bengh piak” a si. Volunteer in rian a tuanmi an um len. Midang caah harnak a tuartu man a ngeih zia a hung Lang. Kan pawng te ah Melbourne Coffee dawr ngeitu nih Bawmhnak zung ah rian ngei lo tamtuk an I tlar a zoh kho ti hna lo. A bank ah a va kal. $10000/ bak phaisa fang in a va chuah. Bawmhnak zung I ai tlar mi $100/ cio in a phawt hna. Ai dawh tak tak ti pin chimzia ka thiam loh. Kan uar mi tampi ai thleng.

A tak hi harnak in a lang ton. Bible nih Sui hmanh hneksak a si, Zumhnak chin chin cu” a ti bang a si. Harnak horkuang na um buin nan Pathian kal tak hlah. Neih deuh. An leh lo zong ah thang deuh in au chin chin ko. Cu cu zumtu nun a si.Nan dihlak cung ah Pathian daihnak tlung ko seh.

 604 total views,  1 views today

This function has been disabled for Chin 11 News.