Dr. Sasa Thlacam Piak Ko U Sih! A herh taktak!

UN nih thaizing ah Innka kharkhumh in meeting a tuah than lai. Mah cu cu Myanmar kong ceih ding a si. Tutan meeting hi cuhlan bantuk asi ti lai lo tiah UN chungtuan pakhat nih a chim. Meeting an tuah cang lai caah, Dr.Sasa nih UN Security Council lutlai bik Secretary General Antorio sinah ca a tialmi a tawinak in ka vun langhter lai.

Atimi cu, Dear Secretary General Antorio Guterres, UN Security Council meeting nan tuah lai caah na sinah ca ka rak tial. Nihin tiang Kawlram mipi a kan thah cuahmahtu SAC cungah fak piin dantatnak nan kan tuah piak lai timi ruahchannak le zumhnak kan ngei. Nihin tiangah thah nawnnak a karh chin lengmang.

Armed Force Day nikhat chung ah minung 114 an thah hna. Cu lawng asi lo, Karen state cu vanlawng in a tuk hna, bomb athlah hnawh hna caah harnak faktuk an tong. Nihin tiangah thah nawnnak an ngol hlei lo, meithal kahnak ke hremnak mipi cungah an tuahmi ngol an tim lo.

Nuhrin covo faktuk in an buar. Cu caah hibantuk in ramchung mipi cungah zaangfahnak a nei lomi, ralhrang cawlcanghnak hi a daih khawhnak hnga tuanvo kan lak piak u. Myanmar mipi nih daihnak le zalonnak kan hmuh than khawhnak hnga, UN SC nih cun nan kan bawmh khawhmi asi. Kan caah a tha bikin khua nan kan khan piak lai tiah kan I ruah chanh ko, tiah Dr.Sasa nih cakuat a tial cang. Ref: Daily Chin Star

Relchih Ding: A him ti lomi ‘Maw Kalay khuadawh te aw’ Kan semnak Kalay khuadawh te cu a rawk cuahmah cang ti kan mit in kan hmuh le kan theih hnu cun, ni khat ah rawl voi zeizah kan ei cang ti hmanh kan rel kho ti lo. Khuachung lam zong chun le zan thleidan khawh a si ti lo, minung an kiang dih i dawr vialte zong khar dih an si. Innpa chak le thlang zong hohmanh ilen kai kan ngamh ti lo.

Kan nih Mino ca cun aa zia deuh! Ngakchia, pitar le putar ca ko tu hin ruah ah chum a pit! Meithal puah thawng an theih pengmi nih an chan zong a tawiter dih cang hna lai. Inn a zamtakmi le khua a chuah takmi zong an tam lengluang cang, mah le himnak ca ruahnak paoh ah thial le kaam kan si hna. Chawlehnak lam zong a pit dih, tlawmpal ah eidin a har than lai, kan nih Kalay kan har cun Chin ram zong nih fakpi in an tuar ve rih lai. Inn zuat satil hna tiang zong an rawleika a thaw ti lo! Hna lawng in kan rak theih tawnmi ralram kan timi cu atu a tak in kan ton ko cang!

Sunsak ngai in kan hman tawnmi ‘Good Friday’ zong thaizing kan phan than cang lai. Kan Khamhtu Jesuh thihnak darkhing si loin mipi thihnak darkhing hna aa tum sual te hnga maw! Atu (hi ca tial cuahmah lioah) Natchung, Natmeung, Ngaphah, Chaungkhuah lei ah ralkap si lo sualnak ngei lo mipi a kaptu hna nih an khua tampi an kulh cang. Hriamnaam a nganmi lawngte an hman rih! Kan nih ca cun zei ni hmanh hi aa ‘Good Day’ kho ti lo! Credit: Za Bawi Thawng