Dr. SaSa : Kan Caah Ruahchannak A Um Tilo Caah Ralthawh Dingin Kan Thanhnak A Si

September 7, cu NUG cozah Acting President nih SAC ralhrang uknak kongah fianghlang tein DDay aphuan. Mah D.Day phuannak a tuah ah hin, ramchung mipi hna cu, mah le umnak tlang le hmunhma cio kha fek tein dirhkamh dih ding in le, mipi vialte hna cu tha tein himnak kawl cio ding in nawlnak le theihternak a tuah. Mah D.Day phuannak kongah Dr.Sasa cu biahalnak an tuah.

Zeiruang ah dah D.Day hi NUG cozah nih aphuan tiah an hal. Dr.Sasa nih hitihin lehnak a tuah hna: Kan ram kongah ASEAN riantuan le cawlcangh ning zohtik ah ruahchannak a tlawm cang.

UN cawlcanghnak zong zohtikah Kawlram Democracy chuah thannak dingah UN cung zongah ruahchannak a um ti lo. UN nih ASEAN mithai a zoh chung poh cu, kan caah ruahchannak a um lo khi asi ko, kan caah ruahchannak dang hlei a um tilo caah hihi kan i thim mi a si ko cang. Cu caah mipi nih dirkamhmi NUG cozah nih ASEAN le UN cawlcangh ning a hngah peng ko ahcun zei caan dah kan hngah rih hauh lai.

UN le ASEAN nih cun anmah nih tuah an duhmi cu hei tuah ve te ko hna sehlaw, a tu cu, kanmah nih kan pehtlaih khawhmi vawleicung ram hna sin tu ah bawmh kan hal ve cang lai.

NUG cu mipi nih dirkamhmi, mipi caah Federal Democracy a fight mi asi caah, hriamnam in a kan thattu cu hriamnam in lehrul ve an hau cang. Cu caah D.Day hi phuan asi tiah a chim.