Dr. Hmuh Thang: Kanmah USDP Kutah Ahmanmi Federal Democracy Thlennak A Um

Dr. Hmuh Thang cu kan theih bantukin USDP party ah Chinram chungah cun zumhbikmi pa asi. NLD party zongah um sehlaw, zumh bikmi asi thiam thiam ko lai. 2020 thimnak zongah Pyine-2 in Hluttaw aa cuh than lai ti kan theih. Dr.Hmuh Thang cu The Chinland Post nih suimilam pakhat renglo bak interview an tuah. Biahaltu zong athiam, a ngaihnuam. Dr.Hmuh Thang nih a chimmi chungin tlawmpalte langhter ka duhmi cu, kan Kawlram uknak kong asi. Biahaltu nih zeiruangah dah USDP ah hin um na duh, zeidah hmailei ah kan ram caah timhlamhmi le ruahmi na ngei maw tiah a hal tikah, Dr. Hmuh Thang nih lehnak a tuahmi pakhatte hi a biapi ngai ngai tiah ka ruah.

Atimi cu, Kan Kawlram thlennak le uknak full Democracy/Federal Democracy cu kanmah USDP kutah a um, kanmah lawng lawng nih ahmanmi federal Democracy hi kan chuahpi khawh lai tiah a ti. USDP party chan ah khan President Thein Sein nih rampi phungram chungin 50 renglo a rak remh. Mah a remhmi kha atu i Democracy phung kan zulh kawhnak hnga caah a si tiah Dr.Hmuh Thang nih a chim chap.

Hika zawnte ah hin ruah awk tamtuk a um cang. Zeiruangah dah NLD chanah USDP nih ralkap an dirpi hna I, 2020 ah teinak kan hmuh ahcun kanmah bak nih kan ram uknak federal Democracy tak tak kan chuahpi khawh lai tiah an ti hnga? Cun, Dr.Hmuh Thang nih pakhat a chim rihmi cu, Uknak le phunghram hna hi voikhat piin thlen timi hi tih anung, zeicatiah kan duhfahtuk ahcun, Democracy phung hi kan sung suallai ti ka phang tuk a ti.

Hi ka zawnah a fiang tuk komi cu, USDP nih rampi cozah an tlaih zongah, rampi uknak phung hi duhsah tein an remh lai ti a lang, chikhat te ah phunghram remh timi cu a si lai lo. Cun, termkhat chungah hin remh aherhbikmi zawnte hi remhkhawhlo a fawi. Dr.Hmuh Thang nih achim ningah cun, Duhsah tein, pakhat hnu pakhat tete in rian kan tuan lai I adonghnak ah teinak kan hmu lai tiah achim ko khah.

Cu caah Dr.Hmuh Thang achim hoih ningah cun, 2020 ah NLD nih cozah nak an tlaih than ko zongah rampi phunghram hi zeitik hmanh ah remh khawh dawh in an lang ti lo. Zeicatiah NLD nih cozahnak an tlaih chung paoh paoh cu USDP nih an dirpi hna lai lo a fiang ko. Parliament ah USDP nih NLD cozah an dirpi hlanlo chung paoh cu NLD nih ralkap nawlngeihnak phunghram zawn khi a remh kho lai lo tinak a si (Gen.Min Aung Hlaing NLD ah a luh ti dah lo cu).

 181 total views,  1 views today

This function has been disabled for Chin 11 News.