Dr. Aung Myint Thang Nih Laimi Sining Cu Fak Taktak in A Phomh!

1 TIMOTE 4: 1-2 NIH KAN LAIMI HNA SINING FIANGTUKIN AKAN CHIMH

Ca na rel dih langlawng ah comment biaruahnak ah na kan tel pi lai

1. NI HNUHNUNG CAAN AHCUN MICHEU NIH ZUMHNAK KHA AN KAL TAAK LAI (4: 1)

Intlak lei ram ahcun zumhnak kha an kal taak dih ngawt cang hna. Biakin a panhmi hi tar chia deuh an si cang. Zarh khat ah Sunday chun lawngah pumhnak an tuah khawh cang hna. Lai Tlang zongah crusade, khampi, conference, Christmas le campagin caan ahcun kan laam tthat ning le kan holhtheihlo holh hi a poipui ko. Acheu vanmi he an i lo. Acheu khawhchia he an i lo. Vawlei cungah Laimi hi hlahmaw Pathian nih a dawt cen hna tiawk in kan um. Vawlei cungah Laimi hlah maw Pathian a thei bik kan si ko ti awkin kan um. Vawlei cungah Laimi nih hlah maw Thlarau thilpeek hi kan don cem ko rua ti awkin kan um. Asinain kan khawmpi, crusade and campaign a van dih cun Sunday le nuthimni zan ahcun ai pummi cu minung 20-30 hrawnglawng umhar tak in an i pum cang. Baibal kan tlin ter ko lo maw?

2. ZUMHNAK AN KAL TAAK LAI (4: 1)

Khrihfa i kan zumhnak hrampi cu Baibal hi asi. Jesuh nih chim le phuan a kan fialmi cu Bible hi a si. Baibal cu Pathian bia asi. Baibal cu a nungmi asi. Asinain Lai Tlang ahcun Baibal ngaih an huam ti lo. Baibal kong an chim tuk ti lo. Anmah nih an hmuhtonnak kha an chim deuh cang. Nangmah hmuhtonnak kha khuaruahharmi asi ve kho ko. Asinin Baibal bia a tluk lo. Baibal bantukin Pathian thawchuah hnawhmi asi lo. Jesuh nih na hmuh tonmi kong kha va chim hna an ti lo. Na caah an tuah piakmi kong, an khamhnak kong kha a chim an fial deuh. Pentecostal zumtu tamdeuh nihcun Baibal bia nakin anmah hmuhtonnak kong kha chim le ngaih an duh deuh.

3. ZUMHNAK AN KAL TAAM LAI (4:1)

KHrihfa i kan zumhnak hmanpi cu Baibal hi asi. Asinain Baibal hi rel dingah kan ruat ti hna lo. Baibal bia hi zulh dingah kan ruat ti hna lo. Baibal bia hi thazaang i lak nak ding caah kan ruat ti hna lo. Baibal bia hi i ruah dingh kan ruat ti hna lo. Baibal bia thei lo in, Baibal bia tu thiam loin hla tu kan thiam, laam khawhtu kha kan i zuam hna. Baibal a thei lomi cu an laam len zongah Pathian a theimi an si lo. Pathian kan theih khawhnak cu Baibal bia hmang hin asi.

4. MICHEU NIH ZUMHNAK KHA AN KAL TAAK LAI (4: 1)

Baibal nih micheu nih zumhnak kha an kal taak lai ati caah zumhnak a kal taak dingmi minung hicu nan rak um hrimhrim. Zi zumhnak a kal taak dingmi hna hi vawlei cungah chuahchan ngei lo bikmi, mi van chia bik cu nan si. Zumhnak kal taak timi cu zeidah asi? Jesuh sinin i tthen kha asi. Khamhnak chungin i tthen kha asi. Mizeidah Jesuh le a khamhnak he cun an i tthen? Baibal a rel ti lomi, Baibal ningin a kal lo i mah ruahnak poh i Pathian a biami an si.

5. KHAWCHIA HLENNAK CAWNPIAKNAK KHA AN ZUL LAI (KHAWCHIA DOCTRINE) (4: 2)

Khawchia rian cu mi cawnpiak hi asi ve. Khawchia nihcun zeitindah mi a cawn piak? Sehtan nih Eve kha zeitindah a rak cawnpiak? Jusuh kha zeitindah a tukforh? Sehtan le Khawchia hna nihcun Baibal le ai lo ttung i Baibal ning asi deuh ttung lomi in mi an cawn piak. Thlarau rianttuannak he ai lo ngai ttung i Thiang Thlarau rianttuannak he ai khat ttung loin mi a cawn paik. Kei ka hmuh ning ahcun Laimi nan holhtheihlo hlasak tehna hi Khawchia doctrine bak nan zul tiah kan ruah ko hna. Zeicah tiah Thiang Thlarau nih a rak peekmi hna holh cu miphung holh, leh khawhmi holh kha asi. Cucaah Paul zong nih a lettu um hrimhrim hna seh tiah a rak ti. Atu i nan sakmi cu aho thlarau fa hmanh nih an let kho bal lai lo. Zeicatiah leh khawhmi phun asi lo. Asinain a poi ah nan chia lo. Atu nan holhtheihlo hlim-laam ning te hin cu vawlei cung hmunkip ah va sa va laam hmanh uh, mi zei miphun poh nih cawnpiaknak hman lo ah an in chiha dih hrimhrim hna lai.

6. KHAWCHIA CAWNPIAKNAK CU LIH ASI (4: 2)

Khawchia nih ai tinh bikmi cu zumtu ttha hna kha zeitindah zumhnak deu ah ka pial pi khawh hna lai tihi ai zuam bikmi asi. Cucaah laimi cu diktein lehmi Baibal ah a um lomi holhtheihlo bak hin a kan hlen i holhtheihlo locun atu ah crusade tuah khawh asi ti lo. Khawmpi tuah khawh asi ti lo. Holhtheihlo hlasak le laam an tel lonak crusade ahcun mi zei nih thawngttha an chim hmanh ah an man ti lo. Holhtheihlo hla (Bible zong i a um lomi) sak i laam kha a lianngan bikmi revival ah an chiah cang. Zeitluk hlennak ngan dah asi?

7. AN CHIATTHA THLEIDANNAK KHA THIR LIN IN KHAWCHIA NIH A DUAH HNA (4: 2)

Cawnpiaknak hmanlo i voikhat na luh cang ahcun zeitluk hmanh in Baibal biatak in cawnpiak hna selaw, na cohlang kho ti lai lo. Zuri cu cawnpiak khawh an si rih. Cawnpiaknak hmanlo i a um cangmi minung cu cawnpiak lo ah a ttha deuh. Cawnpiak khawh an si ti lo. An tuahmi kha a hman bik ah an ruah. Baibal i a um lo zongah a poi ah an chia ti lo. Biatak nakin a numammi cawlcanghnak kha biapi deuh an an chiah cang. Cu ti i an um cu Bible nih an chiattha theidannak kha khawchia nih thir lin in a duah cang hna caah asi ati. Chia ttha thleidannak kha tir lin duah hnu ahcun thil ttha le thil dik kha chimh zongah an hmu kho ti lo.

 669 total views,  1 views today

This function has been disabled for Chin 11 News.