Donald Trump Nih Hillary Clinton A Teining

BIAHMAITTHI

Kum 2016 U.S. President thimnak ah Pres. Donald Trump (R) nih Hillary Clinton (D) state 4 ah a rak teining kong kan zoh hnik lai. State 4 cu Michigan, Pennsylvania, Wisconsin le Florida an si. Pres. Trump i a tthawnnak le a thazaang a kan hmuhsak lai. Electoral Vote le Popular Vote kong tlawmpal kan fianter lai. Cun, Opinion Polls hna nih an rak chimh chungmi zong ttha tein kan kherhlai lai. Cu hna nihcun Nov. 3 a muisam zeimawzat a kan suaiter khawh men lai tiah ka ruat

  1. ELECTORAL VOTE LE POPULAR VOTE

Pres. Trump nih Electoral Vote (EV) 304 a hmuh, Hillary Clinton nih EV 227 a hmuh ve. EV azapi 538 an um. EV 270 a hmumi nih teinak co ding a si. Trump nih EV 77 in a tei. A tengh bak, el awk a um lo. EV a sullam ti hin a si. Tahchunhnak ah, Michigan mipi nih thimfung (vote) an thlak. Trump nih Clinton a tei caah Michigan nih a ngeihmi EV 16 kha a lak dih. Cu ti cun state pakhat hnu pakhat EV an i cuh. An teimi EV vialte kha an fonh dih. EV 270 hmuh an i zuam. Cucaah EV hi thimnak biakhiaktu a si.

Ramchung mipi vialte thimfung (national popular vote) ahcun Clinton nih 2.09% (mipi thimfung 2.86 million) in a tei ve (Clinton: 48.18%, Trump: 46.09%). Ramchung mipi thimfung vialte kha an fonh dih. Cucu popular vote an ti. An rel ve tthiamtthiam, teinak caah lai a rel lo nain. French ram ahcun ramchung mipi vialte thimfung an hmang. U.S. he cun a ling ta let. French phung a duhmi hruaitu an um pah cang, U.S. ah.

Pres. Trump nih EV lawngin a tei caah khelkhat lawngin a tei kan ti lai, Lai Paih sisehlaw. Khelhnih in a tei lo, mipi thimfung ah a sung. (Pres. Barack Obama nihcun khelhnih bakin – EV le Mipi Thimfung he – kum 2008 ah John McCain a tei; kum 2012 ah Mitt Romney a tei rih. Vankheng in a tei hna). Khelkhat in tei zong ah tei a si ko. Cucaah EV hi Nov. 3 ah a biapi bikin an zoh cio lai.

  1. MICHIGAN, PENNSYLVANIA, WISCONSIN, FLORIDA

Pres. Trump nih hi state 4 hi a lak dih. Pennsylvania, Wisconsin le Michigan a tei khawhmi hrimhrim hi an khuaruah a har cio. Amah Trump zong a khuaruah a har ve. President a si lai a rak i ruat lo. Opinion Polls hna nih Trump a sung lai an ti (FOX News zong) dih, LA Times/USC Tracking pakhat lawng dah ti lo cun . Opinion Polls hna nih Clinton nih a tei lai an ti (RPC Average: 3.2%). Thimnak a phi a chuak tikah Clinton nih 2.09% (2.86 million) in a tei taktak ko. A tam ngaingai. Nain, Trump nih EV 270 leng (EV 304) a hmuh caah President a tling.

Kum 2012 thimnak ah President Obama nih mipi thimfung ah Opinion Polls (RCP Average: 0.7%) nih Mitt Romney a tei lai an ti. Thimnak a phi a chuak colh. Obama nih 3.9% in a tei. EV zong 332 a hmuh. President Term 2nak a ttuan.

Cun, kum 2008 thimnak ah Obama nih John McCain a tei lai a ti (RCP Average: 7.6%). Aphi a chuak tikah 7.3% in a tei. EV 365 a lak. President term 1nak a ttuan colh. Mipi thimfung ah Clinton nih 3.2% in Trump a tei lai ti a si tikah EV zongah a tei ko lai tiah rak ruat cio a si. Mipi thimfung ahcun an rak hman dik ko. EV ah an ruah bang a rak si lo. Kei zong ka rak si ve. Ka khuaruah a har dih.

Cucaah kum 2016 thimnak nih state 4 an biapit zia a thar in a langhter tthan. Nov. 3 zongah an biapi rih ko lai.

Swing states dang Ohio le North Carolina kan kal tak rih hna lai, Trump a rak tthawng ngai ko caah.

Pres. Trump nih a teining a tanglei hi an si.

*Michigan (EV-16): 0.23%. A teining a fak lo ngai.

*Pennsylvania (EV- 20) : 0.72%. A teining a fak lo.

*Wisconsin (EV -10) : 0.77%. A tening a fak lo.

*Florida (EV – 29) : 1.20%. A teining a fak pah ko.

BIAFUNNAK

Hi state 4 hi Clinton nih a sungh ding a si lo. Zeicahtiah Pres. Obama nih tha dam tein a rak lak cang hna. Nain, Trump nih a chuh khawh ko. A menmen lo. Amahbelte, a rak teining a fak tuk lo. Nov. 8, 2016 nakin Nov. 3, 2020 ah Trump nih fak deuh in a tei khawh men. Nain, Joe Biden nih hi state 4 ningin a si lo zong hmanh ah 3 a chuh tthan sual ahcun Pres. Trump caah thinphang dai lo a si ve ko lai. Cucaah hi state 4 hi Nov. 3 ah U.S. mipi lawng hmanh siloin vawleicung nih mit tthep loin an zoh cio lai ka zumh.

SOURCE: United States Federal Election Commission, Washington, DC (December 2017)

Catialtu: Zo Tum Hmung

 355 total views,  1 views today

This function has been disabled for Chin 11 News.