Doctor Ciocio Ah Dr. Sa Sa Nakin Dr. Ngun Cung Lian Ruahnak Hi Chinram Le Mipi Caah A Tha Deuh Tuk

Nihin cu Zomi Broadcasting nih Dr. Andrew Ngun Cung Lian biaruah/halnak an tuah mi ka ngai pah i kan kawlram Constitution kong theih tlei tampi kai chap. Dr. Andrew hi a rak men lo. Biahaltu zong ahal zia an thiam, a hal awk an thei i a ngai tu kan i lunghmuih ngai ngai.

Naypidaw rian ttuan cuahmah mi zong an um len ko na in bia i sum reng lo in an chim thluahmah ko i democracy hi amah bia i hlan ah cun Sairang tleirawl tluk cu kan hmuh ve cang ko ti khawh ding asi.

Mah belte a unau asi ve mi Dr. SaSa he an chim mi point hi ti le tlang bantuk in an i ralkah nak a um. Dr. NCL nih Pyithawngsuh Cozah hi a herh lo mi asi ati lio ah Dr. Sasa nih cun Pyithawngsuh Cozah lo cun zei hmanh kan tuah kho lai lo ati. Kei nih cun kan mifim hna hi Pathian thluachuah kan don mi bantuk in ka ruah hna i an bia hi a ttha lei in ngaih piak khawh peng kai zuam hna.

An i kalh le an i al leen hi ka duh lo ngai. Biahaltu pakhat nih a hal mi ah Kawlram chung upadi lei thiamsang minthang rampumpi a thleng kho tu pathum an um i cu hna cu… U Chan Thun, Dr. Maung Maung le Dr. Andrew an si ti in Journal pakhat nih a ttial ati. Asi taktak ko ah cun i lunghmuih taktak ding asi.

Dr. Sa Sa nih miphun le ram caah rian a ttuan ning, abia ka ngaih lengmang tik ah Sayama Nu Khan thlacamnak aw hi ka hna thlaam ah a leng chih peng. Sayama Nu Khan nih hi ti hin a chim.” Pathian nih World Bank caah thla na cam lai aka ti i Pathian nih aka fial, cu tik ah kei cu World Bank office hna cu luhnak nawl a ngei mi ka si ttung lo i zei si poh ah ka luh pei a hauh cu ka ti i ttha te in official phun khin kai thuam ve i zung akai ding bantuk khin ka luut, security nih ziah khakha na luh ve an ka ti i kai theih ter lo ka luut chih thluahmah i cu ka luh khawh tiang poh ah thla ka cam pah thluahmah. a hnu ah security nih an hong ka tlaih an ka hnuh i leng ka an ka chuah ter i zei a si poh ah ka tuah khawh mi tiang kha ka tuah ko.” a rak ti. Dr. Sa Sa le world bank te hna rian an ttuan ning pawl ruah tik ah background ah rian a rak ttuan tu taktak hi zumtu hna thlacamnak thawng in asi ti hi kei cu 100% ka zumh.

Mah belte. Ka lung aka tuai ngai mi cu hi hi asi. Dr. Andrew nih cun Laimi kan future Laimi kut le Pathian kut ah a um awk asi ko, miphun dang vai i bochan leen a herh lo ati lio ah Dr. Sa Sa nih cun Pyithawngsu Cozah lo cun zei hmanh kan tuah kho lai lo nan lung i fim uh ti asi ve. Pathian nih hin Lai ram le Laimiphun based te i Amah bochan bu te i cawl ve hi maw akan duh piak deuh hnga, zumlotu kawl sin in dah thluachuah hi peek akan timh taktak hnga ti kongkau hi?

Catialtu: Salai Bawiukthang Cinzah