Department Of Homeland Security Upa Nih An Chim Cangmi Cu Trump Caah El Awk A Tha Lo

Tutan thimnak hi a thianghlimbik thimnak a si tiah Department of Homeland Security upa hna nih an chim mi cu Trump nih zeitikhmanh in el awk a tha lo. Tei sawhsawh hmanh a si lo. Naan taktak in a naan ko.

Democrats le Independents cu chim lo, Republicans tamtuk nih pei Pu Trump an vote lo cu. White House ah Trump nih rian ngan a t’uantermi Kellyanne Conway i a pasal, George Conway, le a hawile(Lawyer minthang lawngte) nih “Lincoln Project” min in Trump nih President rian a peh khawhlonak dingah paisa tampi hmang in campaign an tuah.

Hi hna hi Republicans an si, Donald Trump hi American rampi le American mipi hruaitu dingah ai tlak lo an ti. Arizona State ah a thih tiang Senator a rak t’uanmi John McCain nupi le fale nih Donald Trump cu kan Vote kan pe kho lo an ti caah anmah chungkhar a dawtu Arizona mipi tampi nih anmah chungkhar he Joe Biden tu an vote ve.

Republicans pawl votes hmanh co dih khawh lo bu in US President si khawh asilo. Cucaahcun, zeibantukin Chinmi nih tongpa t’anh in t’anh zong Pu Trump cu inn ah a t’in ko cang lai.

Relchap duhmi caah:Donald Trump nih ninga ni zan ah khan White House, Rose Garden ah bia a chim i, “Zeipoh si seh law, caan a um rih mi ah hin zeipoh aa thleng kho i, biakhiahnak tuah dingah hin caan nih a rak kan chim ko lai” tiah a ti.

November ni 3 thimnak ah khan thil dik lo le vote ningcang a dik lomi a um tiah zumhnak a ngei hi a si. A mah a tanhtu hna sin ah, “Hi i thimnak hi a felfai lo a ti” a mah a tanhtu hna nih a tu hi lam zawh in duh lonak langhter an ti tim. Hi duhlonak langhter ah hin US Representative Marjorie Taylor Greene of Georgia zong te an i, tim ve.

Donald Trump nih a sungh hi a cohlang duh bak lo i, Joe Biden nih cozah thar a ser ding transition team hmalaknak zong a kham rih hna hi a si.

Tulio vote an rel cangmi State by State Electoral College ah Joe Biden nih Vote 306 (projection) a hmuh cang i, Donald Trump nih vote 232 (projection) a hmuh ve. Donald Trump le amah a tanhtu hna nih i thimnak ah hin thil felfai lo tamtuk a um tiah an chim nain a mah tang intelligence official bak in ” Hi i thimnak hi US i thimnak vialte lakah a him bik a si” tiah an chim ve.

BBC nih a tial ning ahcun Joe Biden nih Georgia ah teinak a hmuh than i, A vote hmuhmi dihlak ah 306 a hmuh cang a ti. Whit House ah lut dingin a dirhmun nih a tlinh hrimhrim tiah a ti. President Donald Trump nih North Carolina ah teinak a hmuh ruangah vote a hmuhmi dihlak hi 232 a si ve tiah a ti.

Ninga ni ah khan Donald Trump le a tuantu pawl nih tazacuainak an tuahmi cu Arizona, Michigan le Philadelphia, Pennsylvania biacheihtu hna nih an pom piak hna lo. Vawlei huamp ah thawngpang tialtu min thang Time Magazine nih hin biadik hi raltha tein a thanh tawn i, Mimolh deuh thei ding zongin a tial tawn. Donald Trump cu a caah ni atla cang a ti. Ref: MWN