Daw Suh: Thlen A Herh Nak Ah Raltha Tein A Thleng Ngam Mi Le Intuar A Herh Nak Ah A Ingtuar Kho Mi Si Kan Herh

Thlen a herh nak zawn ah raltha tein a thleng ngam mi le intuar a herh nak zawn ah raltha tein a ingtuar kho mi kan si khawh ding hi a biapi tuk mi a si. Cun thlen a herh lo mi kong ah hman te le dingfel tein biachah nak a tuah kho mi fimthiam nak le khuakhan thiam nan si khawh nak hnga saduh kan thah piak hna.

Asinain thlen a herh mi hi zeidah a si tiah fak piin tuaktaan a hau, cu kan tuaktaan mi cu raltha tein kan chim ngam a herh caah hi ka zawn ah hin fimnak a biapit tuk nak a  si. Tlawmpal te a hardeuh zong ah kan tuar chih ko lai. Ka si kho lo, ka tuah kho ti lo tiah kan ti tawn mi nih hlawhtlin nak le thancho nak lam a phih lengmang. Ipad kan I tleih cio mi hi zohhmanh uh! a si kho lo tiah a rak chim mi le an ser kho lai lo tiah a rak chim mi an rak tamtuk hringhran, asinain hlawhtling tein harsat nak tampi he an serchuah khawh ko hi teh.

Myanmar ram hi cu a rawk ngai mi le thancho nak a rak um lo nak ram a si caah kan ram ah zeidah thlen ding a si ti zoh tikah a tamtuk hringhran ko. Hi tlen a herh mi Myanmar ram caah fak piin kan I zuam cio hna a herh mi a si. pulrai zawtnak kong he pehtlai in a si zong ah kan thutdir ning kan thlen mi zong hi kan ram chung thancho nak le thlennak ti mi ah ai tel ve mi a si. Ram tthawngttha kan si ve lo caah, ramdang nak hmanh in kan thazaang, ka lungput le kan ruahnak hi fak chinchin in kan chuah a herh deuh rih mi a si.

Kan ram thancho nak le ram tha sinak ding ah thlen a herh mi a tamtuk hringhran, asinain lungdong in um hlah. Harsat nak tamtuk na ton mi ruang ah na lungzor hlah seh. Nangmah lawng na si lo kha philh hlah, kan dihlak in hmunkhat ah kan tuanti hna lai. Lungthinkhat ruahnak khat le lungrual nak he tiah thangthar mino nih ruahnak tha he conglawmh nak Certificate a hmu kho mi bochan tlak mino nan chuak lai ti hi ka ruahchan ko.

 128 total views,  1 views today

This function has been disabled for Chin 11 News.