Cozah Riantuan Tu Nih CDM An Tuah Hi, An Hrut Maw?

Cozah rian tuan khawhnak ding ah hin tampi thap ta a hau – cacawnnak ah nu le pa retheih in a hau, phaisa le caan tampi thap a hau. Cozah rian ah an luh khawh nakhnga heh tiah i zuam a hau.

Cozah riantuan cu a nuam, tha a dam. Lahkhah lawng a si lo, a cheu cu umnak inn tiang an pek hna. Pensen an ei rih. Mi nih kan upat hna. An covo a tam tuk.

Ziah atu hi mi tampi nih an rian an chuah tak? An nunnak ah tih a nun hi an thei hnga lo maw? Umnak inn in an thol hna lai hi an hngal lo maw? Khuasaknak, nupi/va le an fale hna hmailei kong an ruat hnga lo maw?….. An pule pawl hi an tih hna hnga lo maw? Harnak maw ton an duh? An rak thapmi vialte hi a lak maw siter an duh?
*
An hrut maw? Hrut naisai hlah, mifim an si. Nunnak tih a nunnak a theimi an si. Hmailei khuasaknak, nupi/va le fale kong a tuakmi an si. Amah ca lawng lo, mipi le ram ca khuaruat an si.

An tuahmi hi an hngalh tuk, an i fiang tuk. Khuaruat bu tein an tuah. An kalnak ding lam an hngalh. Zeidah a cang lai ti an hngalh. Zeizong vialte hngal buin an tuah; zeicahtiah annih cu cathiam le mifim pei an si cu. Mipi ca riantuantu pei an si cu.

Cucaah, kei cu, ka upat hna, ka dirkamh hna, thla zong ka campiak hna. ‘Bawipa nih thluachuahnak in pe hna seh’ tiah ka ti hna. Credit: Za Mang