Covid 19 Theihnak Ding Lam Thar An Hmuhmi Cu A Mak Tuk!

Uico pawl thil haw theihthiamnak hmangin Covid-19 zawtnak ngeih le ngeih lo thleidan ning a laar ngai.
============================================
Namibia ram ah uico pawl cu haw an hnimh ter hna i Covid-19 zawtnak a ngeimi le ngeilo mi thleidannak phunkhat an tuah lio. Covid-19 zawtnak ngeimi pawl hi an haw phundang a si i cu haw cu German tuu cawngtu uico pawl le Beagle uico pawl nih an thleidan kho ti asi. Africa, Namibia ram ah Covid-19 zawtnak a ngeimi an karh chin lengmang caah University lakah Veterinary University i haw phunphun a thei khotu uico pawl cu Covid-19 zawtnak theih kho dingin chimh le cawnnak an thok pi hna. A luancia mi thla 2 hrawngin thok asi cang i hihi a tlamtling asi
ahcun vanlawng bual, ramri karlak, ti lawng pawl luhchuahnak pawl ah mi lutchuak pawl sin ah Covid-19 zawtnak an ngei maw ngeilo timi thleidan ding caah hman an si lai.

Columbia ram zongah haw phunphun a thei khotu uico pawl hmangin Covid-19 zawtnak a ngeimi le ngeilo mi thleidan cu rian hma a kal ngai tiah an ti. Cuca’h Namibia, Finland le France ram pawl zongnih cu bantuk tlamtlinnak cu an i ruahchan ve nak hi asi. Africa ram vialte lakah Namibia ram hi atu bantuk thil a tuah hmasa bik tu ram zong asi, kha hlan ahcun hriam nam pawl le ramsa hna in a chuak mi thilri pawl kawlnak lawngah uico pawl cu rak hman asi. Uico pawl nih haw hnimh in Covid-19 zawtnak a ngeimi an thleidan hna tik ah zatuak in 95 tiang hi a tling kho tiah hmuhfiang asi tiin Namibia University in Vet. lei ṭuanvo ngeitu Elmareth nih a chim. Uico pawl cu Covid-19 zawtnak lawng si lo in nauinn lei cancer, zun thlum, thi thlum le a dang zawtnak pawl zong haw hnimhnak in an thleidan kho tiah a chim chap. Atu an tuah lio mi ahcun uico pawl cu zarhkhat ah voithum cawnnak an tuah piak hna i hihi a tlamtling asi ahcun Covid-19 zawtnak test ding caah cozah lei nih an dih mi chawva le caan pawl i aa rel deuh ngaite ding asi. Atu bantuk cawnnak an tuah piak mi hna ah ral asi kho mi thilri pawl him tein chiahnak bawm (Training Aid Delivery Device-TADD) pawl hmang in uico pawl cu haw hnimh ter asi.
Cun, Covid-19 zawtnak a ngeimi pawl i an thlan haw kha hnimh le theih ter asi. Hi bantuk zawtnak a ngeimi pawl thlan an hnimh tik ah direct tonghtham kho lo dingin uico pawl cu ṭha tein cover tuah piak an si. Cu tuahsernak pawl zoh tik ah uico pawl pum chungah zawtnak pawl a karh mi aum lo. Kha hlan rak hmuh mi Covid-19 mizaw sinin uico sinah zawtnak rak i chawnh asi tiah hlat mi zongah uico pawl kha an dam i an him ko ti asi. Hi chung ah a tel mi uico pohpoh zong ṭha tein an ngandamnak lei zohkhenh piak an si i Covid-19 zawtnak a ngeimi pakhat hmanh an um rih lo. Uico pawl atu bantuk cawnpiaknak an tuah hna tik ah chikhat lawng haw hnimh ding ca si lo in rianṭuan caan bantuk tein caan saupi um thiam ve ding in cawnpiak an si. UAE. Chili, Argentina, Brazil le Belgium ram pawl zong ah Covid-19 zawtnak ngeimi le ngei lo mi thleidan kho ding in uico pawl cu chim le cawnpiak an si thluah mah i UAE ram vanlawng bual tam deuh ah cun rian hna an thok pah cang tiah Yoyarlay cherhchan in theih asi. Ref: Chin Cable Network Channel

 116 total views,  1 views today

This function has been disabled for Chin 11 News.