COVID-19 nih a Tlunh hnu in Trump cu Ralkap Sizung ah Ni Tamlak Thlop Ding a si

WASHINGTON (Reuters) – Nov. 3 election phaaknak dingah thla 1 te lawng ai duh lio caan ah US President Trump cu Covid-19 nih a tlunh caah Saturday khan ralkap sizung ah an um cang.

Covid-19 test an tuahnak in nazi 17 hnu ah Trump cu White House in duhsahtein a hung chuak i, Bethesda, Maryland ah a ummi Walter Reed National Military Medical Center lei zuampi dingin a hngaktu helicopter lai cu a fuh.

Kai ningcang ngai ko tiah kai ruah ko. Asinain, zeizongte a tluang ko, timi cu kan fianter a hau lai cu, tiin video in biachimnak tawite a ngeihmi cu Twitter ah a taar. Ka thaisung Melania zong Positive a si ve, tiin a chim.

Ralrin ngai hau a si caah, a ra laimi ni tlawmpal chung cu sizung ah a hleice in thlopbul a si ko rih lai, tiah White House press secretary Kayleigh McEnany nih a chim. Friday zanlei hnu ah khan Walter Reed sizung lenglei ah khin Trump a tamhtu mi tlawmpal te khi “Trump 2020” timi flag an i ziit len hna. Tam u cu mask zong an i hruk hna lo.

“Kum 74 a si cangmi Trump cu a tak a lin ngai. Trump hi a dirhmun a tha ngai ko i, oxygen pek zong a hau lo, Remdesivir sitlang zong a din cang. Hi sii hi Gilead Sciences Inc nih an zuar mi a si i, sizung ah caansau um lo dingin mizaw pawl thlopnak ah an hmanmi sii a si,” tiah White House doctor Sean P. Conley nih Friday zanlei ah a chim.

“Ka tha ngai ko, tiah kai ruah ko hih. Nan dihlak cungah kai lawm hringhran. Kan DAWT hna!!!,” tiin Friday zanlei ah khan Twitter in amah Trump lila nih ca a vun tial.

Nov. election zuamnak he pehtlaiin nihin tiang i polls an tuahmi ningah cun Biden nih Trump hi a siak ngaingai. Cu bantuk dirhmun a si lio i Positive a si mi nih hin Trump hi a donghkhanh ngaingai cang.

Covid-19 a tlun ka tein khan siseh, cun US mipi 200,000 lenglo a thah hna hnu le US economy a chiatchuah cikcek hnu tiang ko zongah cun Trump nih hi zawtnak hi zeirel lo huaha in a um piak peng.

Khahlan White House senior advisor Kellyanne Conway, Republican senators Mike Lee le Thom Tillis telhchih in Friday i Covid-19 test an tuahmi ah Republican lubaan minung ceilak te Positive an si.

Trump a zawt a zualtuk sual ah cun a ai a awhtu ding hi Vice-President Mike Pence hi a si. Anih belte hi cu Negative a si ko, tiah a aiawhbiachimtunu nih a chim. Khahlan Indiana governor, Mike Pence, kum 61, cu White House he meng tampi ai hlatnak ah a ummi Indiana i a inn tangin a langin rian a tuan cang.

Trump hi kum upa le mi khingrit a si caah, a dirhmun hi tihnung ngai a si. Nihin tiang i office i rian a tuan chungah hin cun ngandam ngaimi a lo ko nain, punghmangtein exercise a tuah le tuah lo, cun a ngandammi tirawl a ei le ei lo belte theih a si lo.

A tu lio i Covid-19 thlopnak dingah an hneksak cuahmahmi sii in Trump hi ai thlop cuahmah cang. Sii min cun Regeneron’s REGN-COV2, ti a si i, zawtnak phun tampi thlopnak ah hmankhawhmi sii zong a si, tiah Conley nih a chim.

Vitamin D, famotidine, melatonin le aspirin zong a dinei chih hna, tiah Conley nih a chim.

Trump Positive a simi thawngpang nih Election boruak a fianlo ter chinchin cang caah, Wall Streets i Stocks pawl an tumchuh colh ve.

Ramchung le ramleng in, Trump le a thaisung damnak hmuh dingin duhsaknak a langhtertu hna he thin khat lungkhat tein Chinese President Xi Jinping zong nih an nupa damcah zaunak dingah a duhsaknak a langhter ve.

ELECTION DAY Nih le ai Hnawham chinchin

Election Day phaaknak ah ni 31 te lawng ai duh lio caan ah cun, Trump nih campaign tuah dingin ai hmaithlaaknak hmun le hma, ni le caan pawl cu kan thawn chung rih ko lai, asilo le online tal zong in kan tuah te ko lai, tiin Trump campaign tawlreltu nih an chim.

Friday i Positive a simi lakah khan Trump campaign manager Bill Stepien zong cu ai tel ve i, a inn tang lawngin rian bawmh dingin a chim cang.

Biden cu Negative a si caah, online in campaign lawng ai za ve ti lo i, Michigan lei ah Friday ah khan a vung zuang ve cang. Khulrang tein a dam khawhnak hnga Trump caah thla ka campiak, tiah Grand Rapids i union hall i biachimnak a ngeih lio ah Biden nih a duhsaknak a langhter. Mask kai hruk ruangah heh tiah a ka nih sawh. Cun campaign a tuahnak ah mipi tampi cu social distance tuah lo in a pumh hna caah a tu bantukin thil a ton hi a si, tiin Biden nih Trump cu a soi ngaingai.

“Ram a dawmi vun si ko. Ka thawng, ka cak, ti khi a si lo eh. Nangmah le na rian te vun tuahn, khi biapi deuh a si,” tiin Biden nih a chim.

Trump hi nincang lei a panh lo sual ah cun, Republican National Committee nih a ai a awhtu ding an thim a hau te lai. Asinain, state tampi ah cun ballot i Trump a min phiat i min thar khenh than dingah a tlaituk cang fawn. Million 2.9 tluk hrawng nih vote an pek dih cang, tiah University of Florida i professor Michael McDonald nih a chim.

Governors pawl le cozah rian in ai din cangmi phu hna pawl sinin a rami phone paoh cu Trump zaka in Mike Pence nih tuanvo a lak cang. Oct. 7 i Biden nih Vice-president hrangah ai thimmi Kamala Harris he debate tuah dingin nithla an tuk ningtein Mike Pence hi timhlamhnak a ngei ko rih. Harris zong hi test an tuah ve nain, Negative a si ve.

Sumpreme Court ah thu dingin Trump nih Amy Coney Barrett a timhlamhpiakmi zong hi tutan a thil tonmi hi a vaivonh khawhmi a si. Barrett an thimmi kong thawng a thanhtu ah ai telmi Republican lutlai pawl hi positive an si cang hna. Trump a thaisungnu, Conway, Lee, Tillis le University of Notre Dame President John Jenkins hi Friday i test tuah lio ah khan Positive an si dih hna.

Lee le Tillis hi Republican nih an ukmi Senate Judiciary Committee member an si veve i, Oct. 12 ah khin Barrett an thimmi kongkau ceihmai thok dingin timhlamhnak a ngeimi an si.

Tillis hi cu positive a si ko nain, zei symptom hmanh a pum ah a langh lem lo caah anih tu hi cu ni 10 chung a inn tangte ah a um lai. North Carolina i a thutdan cuhtu Democrat lei in Cal Cunningham nih hin a phaak dengmang cang, ti a si. November election i Senate Majority ca i teinak hmuhnak dingah Cunningham hi Democrats lei nih an i zohtla ngaimi a si.

Vawlei cung i Covid-19 nih a tlunhmi ram pakhat a hruaitu vialte lakah Trump hi a nehnungbik a si. March lio ah khan British Prime Minister Boris Johnson zong kha tha lo in a zaw bal i biatak tein an thlop bal. July ah khan Brazil President Jair Bolsonaro zong a tlunh ve. Annih cu an dam than cang.

Catialtu: Chelsea Bawi