COVID-19 a ngeimi cu COVID-19 nih a tlaak duh deuhmi minung an rak si. Zeibantuk minung dah COVID-19 nih a tlaak duh khunmi cu an si bik? COVID-19 ai ralring lomi minung an si bik. Ram dang ah siseh, Kawlram ah siseh COVID-19 ni a tlaakmi minung a tam deuh cu iralrinnaak chambau deuh ruang ah asi ngawt.
USA zong i a rak karh tuk naak kha ai ralring lomi an rak tam tuk caah asi, India zong i a karh tukmi hi an biaknaak puai ah ai ralring lomi minung tan 13 hmun khat ah ti an i khawh caah asi fawn. Atu Laitlang cheukhat le Kalay Valley i a karh tukmi zonghi kan i ralrin lo ca tthiamtthiam ah a si bik ko.
Keimah hi COVID cu kai ralring bak tiah kai ruat. Kan campus minung hi nikum March thla khan leng ah an chuah ti lo. Bazar kan kai ahhin mask kan hman hlei ah plastic face-shield kan hman chih rih. Motor ah hand-gel le virus-spray kha phun hnih ning hrimhrim in kan chaih peng. Motor ahhin mask hi a bawm in kan chiah peng. Kut-ttawlnak ti le sahpiat hang ready in kan chiah peng fawn. Minung hi pe 6 hlat lawnglawng in kan chawnh hna. An ka naih deuh ahcun ka zaam taak hna.
Bazar i kan cawkmi vialte kha sahpiat in kan ttawl dih. Tawl awk a ttha lomi kha spray in kan kah dih. Phaisa zonghi ni thum kan chiah hnu lawng ah kan hman ngam. Mi nih phaisa an kan kahmi zong kha kan laak tikah kan kut kha hand-gel in kan i ttawl cawlh. Hi ti kai ralrin kha mi nih an ka hmuh tikah keimah kha mihrut ah an ka rel i Kawl he Lai he a ka sawiselmi zong an um.
Atu Laitlang cheukhat le Kalay Valley i COVID a karh tukmi hi khuaruahhar ding cu a um lem lo. Zeicatiah kan i ralring lo tuk hna. Pumhnaak kan tuah, kan i lengkai hna, mask kan hmang hna lo. A zaw taktak lomi cu a dammi zoh in kan i zoh dih hna. Ai chawnh lo dingmi hi kan rak si pah hrimhrim lo. Cuhlan vialte hmanh kan rak himmi hi khuaruahhar tu asi leh lam.
Keicu ka hmuhmi minung poh hi zawtnak a ngei kho men timi mit in ka zoh dih hna i pe ruk dan in hrail khawh dih kai zuam hna. Hi thluk kai ralrin bu hmanh hin kan campus i a ummi minung pakhat nih zawtnaak a von luhpi sual ahcun an ka chawnh tthiamtthiam khawh rih. Cucaah atu kan i ralrin ning nakin a let in rak i ralring rih hna usih law kan him deuh hrimhrim ko lai tiah ka ruah.
Atu ning hin cu Laimi tam tuk kan thi te sual lai. Vaccine zong zeitik kan i chunh khawh lai aho hmanh nih hngalh asi lo.Philh lo dingmi cu zeitluk hmanh in kan i ralrin ko zongah inchingkhar ah pakhat nih ai ralrin lo ahcun um zia a ngei hlei lo. I ranrin dih a hau. Credit: Aung Myint Thang
Leave a Reply