Covid-19 In A Thi Mi Pakhat Hmanh An Um Rih Lo, A Zaw Mi Chung In 90% An Dam Than

Ni 10 (10 days) chung ah mizaw thar pakhat hmanh an um lo, zawtnak rungrul a ngei mi chung in 90% an dam cang. Cambodia ram ah cun COVID-19 hi ni 10 chung ah felfai tein an chek hlai hna ning ah cun mizaw thar an um bak ti lo e tiah thawngthanh nak an tuah. Cun Cambodia ram hi nihin thiang ah COVID-19 in a thi mi minung pakhat hmanh an um rih lo nak ram zong a si. April 22 ni ah thawngthanh nak an tuah ning ah cun COVID-19 rungrul a ngei mi (positive) hi an dihlak in minung 122 an si hna cu chung ah minung 100 hi an dam than hna.

Cun positive case 122 chung in minung 40 hi French ram in a rak kir mi pawl an si, minung 13 hi Malaysia in a rak kir than mi an si, Minung 5 hi UK in a rak kir mi an si, Minung 3 hi China in a rak kir mi an si, cun a dang minung 3 zong Vietnam in a rak kir mi an si ve. Cun ram dangdang in a rak kir than mi hna chung in minung 7 an I tel chih I a tang mi minung 51 hi cu Cambodia ram chung ah a um mi hna an si tiah an langhter.

Khmer Times thawngzamh nih a langhter ning ah cun Cambodia ram nih Quarantine tuah nak kong he pehtlai in biachah nak a tuah ning hi Facility Quarantine hmun ah duh zong duh lo zong ah um dih vial ding bak in nawl an chuah ti a si. Cun Thailand ram in a rak kir mi hna pawl zong hi ramri in ralkap nih an hngah hna I mawtaw in direct bak Quarantine hmun ah an chiah cawlh hna.

Hi kong he pehtlai in Council for the Development of Cambodia director pa nih a chim mi cu “COVID-19 hi cu zeitik caan paoh ah a karh cho kho mi a si caah kan I ralrin thiam ngaingai a herh ko. Kan thih dih hnu in ralrin nak in a tha deuh mi cu zawtnak nih an kan phak hlan ah ralrin zia kan thiam hi a biapi mi a si” tiah a chim hi a si.

Ref: Focus Myanmar

 201 total views,  1 views today

This function has been disabled for Chin 11 News.