Covid-19 He Pehtlai In Biahal Lehnak

Europe le USA te pawl nih Korea, Singapre le Tuluk bantuk in an tuah awk a si a titu an um pah i zeidah a si? Atu ning a si ahcun rian lo in sau tuk a ummi le company pawl pei an sung tuk lai hi. Na ruahning theih kan duh ko.

– Europe ram tamdeuh cu rian (company/sehzung) khar lo awk a ttha lomi khar an si, i sianginn zong an khar dih. Ramri zong an khar ko hna. Asinain Democracy ram a simi mipi thimmi parliamentary cozah pawl hi duhpaoh in thil an tuah kho lo i debate tuah ta lengmang an herhnak a um tikah biakhiahnak khualrang in an tuah kho tawn lo. USA le Europe an tuahning cu nan vun theih cio ko lai caah Tuluk, Singapore le Korea te pawl an tuahning tu tlawmpal ka vun chim lai.

Tuluk nih mah zawtnak fiang tein an theih hnu, an khualipi Beijing ah an hmuh hnu lawng in Hubei peng khuapi 15, minung million 60 leng an khar, an phih hna. Cun sii-ai le rawl herhmi lawnglawng onh a si i a dang paoh inn ah an i erh. Mawtaw, tlanglawng le vanlawng an khar dih. January dih ahhin Tuluk milu 760 leng hi inn ah an i erh tiah New York Times nih a ttial. Wuhan an khar hnu ni thum ah i chonhmi a par (peak) a phan, i cu hnu cun a zor ti a si. WHO nih Tuluk ripawt ning in 81 000 leng an i chonh a ti nain a let in a tam kho tiah ruah a si. Sihmanhsehlaw, mah hi zawtnak hi ai thupmi a si i mi tampi caah a zual in thihnak a phanmi a si lo caah siibawi te nih theih lomi an tampi kho ko.

Singapore le Hong Kong hi WHO nih khualtlawn phih (ram khat le ram khat kar) a hau lai lo an rak ti ko nain Covid-19 thawng an theih in khar khawhmi paoh an khar colh ti si a si. Singapore cu inn ah an ierh colh, rian le dawr an khar hna. Cun million 5 hrawng Test an tuah i azapi Covid-19 in a zawmi 90 hrawng lawng an si. 2002/3 i SARs-covid-2 nih fak tuk in a rak den balmi Hong Kong le Siangapore cu an rak iralrin pinah an phung sermi a har (strict) tuk ti a si.

South Korea hi an ram ningpi in Shutdown cu a tuah lo nain Taiwan bantuk in mizaw kha a kawl bak in an kawl hna. Covid-19 a ngei ti theih tikah cu mizaw he naihniam minung le takpum naih in a rak i pehtlaimi kha an kawl hna ti a si. Cu hnu ah a dang tein an chiah hna, an zawtnak le i chonh ning kha an hlat, an zohfel. Taiwan le bang cu Technology hmang in Privacy zong buar dih in aa chonh kho, mizaw he an i pehtlai timi paoh an kawl hna. Cun ram dang an a tlungmi pawl kha an luh ni tiang hlathlai piak an si.

Mah hi Covid-19 kong i khar le phihnak tuahning hi ram khat le ram khat an i lo hna lo. Cucu uknak ruang zong ah a si pinah uktu ruang ah a si kho. Abiana ah Belarus ram hna cu atu tiang bawlung (club), le a dang zanglek phunphun an on rih, i dawr zong ni dang bantuk in on a si. An president nih zei ah a rel lo, i zuu a pinmi a hleiin Vodka tamdeuh tu in ding u tiah a fial hna. Asinain tu chun ah khan an ram Covid-19 in zawmi 600 hrawng an um cang i 8 an thi. Mah cu a zeipoi rih lo.

Europe le USA tibantuk pawl hi rian le ramri kharnak an tuah a tlaideuh pinah covo a upatmi ram le democracy ram an si ruangah an phung a dindeuh (a strict lodeuh) ruang ahhin chawleh lei le rian lei ah cun sau lak cu an tuar ve rih ko lai tiah an ruah.

Keimah ka ruahning cu chim ding um lo, kan leh ning na lungtling dek maw, infomation le ruahning Comment ah i Share khawh a si ko.

Laknak: Teirial CaŠĻ≠ialtu

 226 total views,  1 views today

This function has been disabled for Chin 11 News.